Lucas 1

Mbaiŋna aiŋa morena ŋeroŋa Mariamo aindopatna, u Iesusmo mɨrnande

26 Karica an karwira parmbaiapa mbut kabena mɨnna, Elisabetta niktan ndeacri, Raraŋ Aetaniaca ndona mbaiŋna aiŋa morena ŋeroŋ, Gabriel mbagɨrica ma Galilina inikna auŋ teker ian mataŋgat. An auŋna ia Nasaret. 27 ✝1.27: Mt 1.18, na Lk 2.5Ma an auŋna mooŋ ŋgam ian ndambuŋa taŋgatna, an mooŋa mina manmo nuoc ŋgam ian laŋgona babuca eacrina, an nuoc ŋgamma, gagrirta ramoot paŋan Dewitna racaindpaikna ramoot, mana ia Iosep. Na an mooŋ ŋgamna ia Maria. 28 ✝1.28: RP 6.12, na Dan 9.23, na 10.19Ainda moca an mbaiŋna aiŋa morena ŋeroŋ Gabriel, ma taŋga an meac ndambuŋ ndaruca manmo aindopatna, "Ra laŋ, Maria. U iro inik wetwet laŋ ndeac, Kacootta unap eac te, unmo otaca u toŋtoŋ bagaraniacap eacraŋnande." 29 Aindopatke, Maria an kam mbaraca, tamtam ndamŋica gaindopatna, "Anna titna kambca aintan, aku anna mɨnɨŋa mba lamŋiapeke?"

30 Ri, an mbaiŋna aiŋa morena ŋeroŋa Mariamo gaindopatna, "U kai nanambi teac, Raraŋ Aetaniaca una toŋtoŋ aniacap tik, ma unmo otacnande. 31 ✝1.31: Ais 7.14, na Mt 1.21, na Lk 2.21Aintik u nik tɨkca nuocna mooŋnuoc ianna mɨrnande, an nuoc, u mɨr te, mamo i Iesus tɨk. 32 ✝1.32: Ŋap 132.11, na Ier 23.5, na Mk 5.7✝1.32-33: 2 Sml 7.12-16, na Ais 9.7Te, ma irembta ramoot aniac ian ndaru te, mina mamo Tamuŋna Raraŋ Aetaniacna Nuoc ŋgacnande. Te, Kacoot Raraŋ Aetaniaca mamo moi gagrirta ramoot paŋan ndaruca ma ndona ŋgamaɨr Dewitna kirar toc ndarunande. 33 ✝1.33: Dan 2.44, na 7.14, na 7.27, na Mai 4.7, na In 12.34, na Ib 1.8Te, ma Iakopna rɨmbnarapa ŋgamrirta gagrirta ramoot paŋan ndeac te, min aŋgɨri bubuoc te, mina mana kaŋgaukca iarwar ndeacraŋnande. Na mana an gagrirta i mananna mba mac maiitndai."

34 Aindopri Maria manmo gaindopatna, "Aku ramootap ŋgogoa lamŋi ŋgocor an kirara titoc ndaruit."

35 ✝ 1.35: Mt 1.20, na 14.33, na In 1.34 Ri, an mbaiŋna aiŋa morena ŋeroŋa Mariamo aindopatna, "Ŋeroŋ Ratta kɨpca unap eac te, Raraŋ Aetaniacna tamuŋna gargara umo wɨŋi kɨtac te, iŋmbaia u mooŋnuoca mɨrnande. Na an mooŋnuoca ma Raraŋ Aetaniacna lamnɨac ŋgoutmo ramoot wandoŋ laŋ ndeac te, mina mamo Raraŋ Aetaniacna Nuoc ndopnande.

36 "Aintik u warac. Una ocou ŋgaem Elisabet, ma kopica mombonikca mba mɨrenanna, ma aind ndeaca taŋga meac bagar ŋgoin, ma mooŋnuoca mɨrna towanaiŋ. Na mandeaca ma nik tɨkca anap eaca kɨpca karwira parmbaiapa mbut kabe malaruri. 37 ✝1.37: RL 18.14, na Ier 32.17, na Sek 8.6, na Mt 19.26, na Ro 4.21Na reac ianna, Raraŋ Aetaniacmo anna mona ndopna towanaiŋ, reikca ma ndo kabea morena."

38 Ri, Maria aindopatna, "Laŋ, u warac, aku Kacootna mbaiŋna aiŋa morena meac. Na an reik, u auk ndopapekna kirara, ma ainda mo te, aku toŋgonande." Ri, an mbaiŋna aiŋa morena ŋeroŋa man tɨkcarica mataŋgat.