1 Tessalonicenses 2

Nəm wi Paul i Təssalonica

1 Bu nwənə, be sefsef ake lə ndzək wa ibe idung alə kɔt inyə chə. 2 Be nke tə bu fət bu si atɛ si i Filippi kikə chu ibə tsət be i Təssalonica. Mə tə bu dung aləkə si shəmti, Gbəm ya idə si shəm yə itifi be Shung Nyɔng yi ya fo yə ilukə. 3 Chiyə wa jəyi Gbəm bu be adung kə i ginchə bi chə, ibu yunchə bi bubelə chə, mə lə ka nlələ ki bukə mujo. 4 Tɔ ichiyə li, lə ka chiyə bamkɔt ka tə Gbəm alələ ki chiyə, Ka dung sa jokə lə ki fətsi chu dzɔng i buni li chə, tɔ chu dzɔng sing i Gbəm li, wi la bap wə bu yunchə ba. 5 Ba banti nke lə ki dung abə kə ibeli bu jəyi adze dzɔki chə, mə lə ki usi jə i bangnyə li wubɛnti, Gbəm amɛ iyɔk ləwi ka fət wə. 6 Ka jo kə lə chu mwijo se si chə, mə ibə kə mə budobo, 7 mə tə buni bu saplə bo bu Kristos ka chiyə lə be musi fət lə. Tɔ ki dung kpaki ki dung fo bu be, tə mənwə akənə binbin. 8 Bansə nlə wa ibe bi ki dung ayak kə igabli kə Shung Nyɔng yə i Gbəm kə chə, mə nwə wa. Be banti she isilo shəm biǃ 9 Nwənə wa, a dɔchə be itə iyunə li, tə ki nəm awət liǃ Ki nəm ki ushe bu uchuk chubə lə ka kə she afəm ado ibeli tə ki chiyə idə be Shung Nyong yə i Gbəm kə.

10 Be adung buni bu ba mɛ bo iyɔk ləwi ka fət wə, bu Gbəm ta, lə fwat wa bu be ka nke kə wi dung gbung, jəng, bu ginchə chə. 11 Ba nke lə ki fət bu eni mwi ibeti ka tə buni afət bu binbu bu. 12 Ki taplə be shəm, akɔklə be, ki bamki ka bu tifi be lə be wə nwə wi lu dzɔng wə i Gbəm li, wi lu ben wə be ikənə winti buni bu anɔng kin ti.

13 Tɔ kə jo yə li taa ka shebam bu də Gbəm nlang. Tə ki bə fo be bu jəyi Gbəm, be yɔk yi abinə yi, kə tə shung i buni kə chə tɔ tə jəyi Gbəm, yi ichiyə li ya dung. Sələ Gbəm wə inəmti iwəti wə wi wa binə wə. 14 Bu nwənə ba, nwam mumu fət mo bu be lə katə mu jəng mu fət bu tsɔt bu Gbəm bo i Jodea, i buni boli mə bu ba gə bo shəm i Kristos Yeso bi. Ba fəm katə bifəmnə byə jəng i ben bo buni kə, lə bu fəm i bu Jews bo kə, 15 bubu kpərə bo Bə Yeso bu profets bo, a fəmnə si. Ba nem Gbəm agbɔkǃ bansələ ba she gbɔk bu eni-mwiǃ 16 Ba jo kəyi ba nu yə bu si lə ka she kə ichiyə jəyə i buni bu ba dung kə bo bu Jews shung yiyə dung yə ifurə li bu ikpeti. Idze yəniti ba bə bu katlə wi bibɛ byə bitsən bi bu fətsi byə bamkɔt. Fa ulu wi Gbəm ashi bə ibu biǃ

Yunchə wi Paul Ichu Dzək Bu

17 Bu nwə ba, achubə isi, agabki ki gablə kə bu be ajəngtə chuat, angkə ibu yunchə ba ti chə, ichiyə li, tɔ ka igɔd li, kəyi ki nyanə yə be bu kəyi ki banti yə jo-li ichu mɛ beǃ 18 Ki laan lə ki chujəm bə ibeli. Mi səf mi jo ibəli jəm tɔd agab amu, tɔ Nkung wi afəbə idung achənə kə si. 19 Imuti mutsən, asi dung wə-wa, dung kə wə dung kə buni budobo chəǃ -we ba dung gə shəm wa, dzo ya, bu ləwi ka sennə wə mə bi i ngəglə wati i Bə Yeso lo afwebi agabki lu i bə kə. 20 Ichiyə li lə, ba dung asennə ka bu dzo yaǃ