1 Tessalonicenses 3

1 I kətlə li, ki dung achu kə tsi shəm chə. Ki gə lə ki she sisi i Atens 2 tə ka fang Timoti, nwənə wa wi la nəm wə bu si i Gbəm li ishe ichiyə Shung Nyɔng yə i Kristos bi. Ki fang lu idə li be ungə afyəng be igə wenti shəm i Gbəm bi, 3 iwufawəbi tə mu wen jo akə fyətlə chujəm bansə bifəm byən. Be sef ake lə kəyi byən bifəm adung taa nlə wi Gbəm isi li. 4 Katə agabki ki dung kətə bu be, ki tifi be agab bəmtə li lə bu fəmnə si; tɔ tə ba nke ndzumi, ləwi banti wə afət li. 5 Ləi ləwi Mi kənə wə ifang li Timoti. Ma dung achu kə kafi ichu tsi shəm chə, tɔ Mi fang lu mə lu bə mɛ gə shəm wen. Ashe kə lə dung Nkung wi muyi lu bap be lə bu nəm ben bo butsən ashe i nyə chəǃ

6 Tɔ fa Timoti abə jəm, la bə si bu shung yi gə shəm wen bu nlə. La tifi si lə ba yunə anɔng isi li bamkɔt, lə ba lələ be mɛ si katə jəng tə sitə alə lə ki mɛ be. 7 Iwufawəbi, i bifəm bya ti bitsən bu ukaan wa ki kənə bansə be, nsu ya. Dung gə shəm wen i Gbəm bi lu daan si utaptə, 8 bansə lə fa ki banti wə sing ba yak gbɔk bu gə shəm wen iwə wenti i abətə ken bi bu Bə. 9 Fa ki itə ndəli nlang i Gbəm ya li ibeli. Ka lang lu i dirə shəm wa li wi ki kənə wə ilu lo afwəbi bansə be. 10 Ushe bu uchuk ka bifi lu bu shəm ya yitsən lə lu chənə si chu ki bə mɛ bifwe byən adə be ləwi ba nyanə wə i gə ti shəm i Gbəm bi.

11 Fa chu Gbəm Bəbə wa sefsef bu Bə wa Yeso tsəngnə dze yə isili ibɛ bə mɛ beǃ 12 Chubə fa Bə fət nlə wen igɔd yen li buni budobo li butsən gak bem achu shin tə nlə wa ibeli. 13 Idze yənti lu taplə be, be she jəng achu gbung i Gbəm bu Bəbə wa lo afwebi agabki Bə Yeso ibə kə bubu ba dung bo ilu li.