1 Tessalonicenses 5

Be Yak Dzumi Ibə wi Bə Wəli

1 Ma dung kə mə ichu nyaklə lə də be bu nwənə, i bigab byə li tə Kristos ibaan chə, bu tə nwam mɔni i fətsi chə. 2 Sələ be sefsef abanti nke lə Anang ki Bə ibaan kə idung tə muwi wudzəp abə uchuk. 3 Agabki buni achiyə kə lə,<<Nwam mutsən jəng afəm chichə,>> iwufawəbi afəm i nkəm bu. Ki baan ka lə wak tə a nlo ikpan bi lu njon ikə, buni idung akənə kə agab ilaptə li chə. 4 Tɔ chubə be bu nwənə, bang kə i afəbəti oh chə, Anang kə abəkə shətə be tə mwi wi wudzəp chə. 5 Be butsən adung buni bu ba dung bo asamə kəli, bu ba dung boli ushe. Ka dung kə i uchuk li mə i afəbə li chə. 6 Iwufawəbi tɔ, ka she kə inem tə budobo chə; ki shin yətyu ikənə li utaptə igɔd ya bi. 7 A dung uchuk ləi agabki buni anem kə; A dung uchuk ləi agabki buni atsi kə. 8 Tɔ chubə isi li ka dung i ushe li, ki kənə utaptə igɔd ya bi. Ka musi ikənə ilirə gə shəm i Gbəm bi bu nlə tə aki ki dzəm, bu ngə shəm wa wi fo ikpeti tə atsɔghɔ ki dzəm. 9 Gbəm idung asap kə si lə ki fəm ulo win kə chə, tɔ lə ki laghə nfo i adəti i Bə wa Yeso Kristos bi, 10 wi lu kpe wə isi li ichiyə li lə ka wə məmə bu lu, mə ki dung bu fu we mə ki kpe tə lu bə. 11 Tɔ iwufawəbi be kwənə buni budobo afyəng buni budobo, ka tə ba fət fa.

Təfyə Katlə wə bu Tsərə

12 Ka kwət be shang, bunwənə ba, ibanti li adə kwənə i buni bu ba nəm boli beti, bu ba təfyə bo be i nwə wen birə wəti Gbəm. 13 Fət bu banti bu kwənə wi manyən bu nlə bansə nəm wi ba fət wə. Be she bu shəm ti bwu bu gɔdyen.

14 Ka tifi be lə, bunwənə ba, ichong li bu buba she bo inəm li fyofido chə, be taplə bu ba ləp bo, be fyəng bu uchabə bo, be kaan shəm bu enimwi. 15 Be mɛ lə mwijo agəm kə abɛ bu abɛ chə, bigab byə bitsən be də shəm yen ifətli anɔng bu eni mwi, tɔ bu i buni li butsən.

16 Be she dzudzu bamkɔt, 17 be tsərə Gbəm bigab byəti bitsən, 18 be daan nlang i nwam muti mutsən. Ləi ləwi Gbəm aləwə ibekə i nwə wenti i abatə ti bu Kristos Yeso.

19 Ba nu kə bu Dzungti yi Gbəm yə chə; 20 ba nu kə iyɔkli jəyi itsan yi Gbəm bi chə. 21 Be bap nwam mo mutsənː tse ləwi adung wə dzum 22 be nu eni fyofi abɛ.

23 Chu Gbəm yi ya də yə si dirə shəm fət be gbung i eni dze ti atse gɔd yen yitsən, dzungti, bu gɔd yi ya kpe yə chə, bu gɔd fri i eni ginchə ti ibə wi Bə wa Yeso Kristos bi. 24 Wi lu ben wə be ifət lə, bansələ la buk kə chə.

25 Be tsərə taa Gbəm isi li, bunwənə ba.

26 Be tsərə buni bu ba binə bo Gbəm butsət bu kwatchə wi dirə shəm.

27 Ma tifi be i ugə wi Bə bi i benə li letə wəni i buni bu ba binə boli Gbəm butsən.

28 Dzɔng shəm wi Bə wa Yeso Kristos she bu be.