2 Coríntios 6

1 Acemǝnana sǝm nda ɓituro sǝnǝa Ɓakuli ka, sǝm nggǝ zǝmba wun, wu kǝa ak ɓwamuru mala Ɓakuli mǝnana pa wun ngga ɓà, wu pàngŋǝ̀nà túró nǝi ɗàng. 2 Ɓakuli ka, kǝ bang ama:

<<Àkǝ̀ bu-pwari mala

lǝmdǝ earmúrú

mem ngga,

ǝn oeo.

Lang pwari mala amsǝo

yina ka,

ǝn dupo gbasha.>>*6:2 Ɓalli gbal aɓa: Isha 49:2.

Sǝni! Ado mǝno ka ndà pwari mǝnana Ɓakuli kǝ lǝmdǝ earmúrú male ka; yalung ndà pwari amsǝban.

Atanni mala Bulǝs

3 Sǝm ngga, sǝm nggǝ dukdo a njar mǝnana ɓǝ̀ sǝm ngga dupî kǝɓwa tǝ́r annda raka, ace mǝnana kǝɓwa ɓǝ̀ kǝa kum mǝɓane aɓa túró mishan ma’sǝm ɗàng. 4 A kúnì ka, aɓa koyagir sǝm pak ka sǝm nggǝ lǝmdǝa ama sǝm nda ka amǝturo-mishan mǝ’mǝsǝcau nì mala Ɓakuli. Sǝm nggǝ pe nǝ shakminǝu kǝ̀rkǝ́r aɓalǝ atanni, aɓa rǝpina, andǝ domǝkwane. 5 À walki sǝm, à ramta sǝm a ndàkurban, aɓwabundǝa lo arǝ sǝm aɓa bumlulla; sǝm pak túró aɓa aulǝa, sǝm dum nǝ gandǝrǝu aɓa ɗwanyi ntulo andǝ nzala.*6:5 Ɓalli gbal aɓa: Atúró 16:33. 6 Sǝm nggǝ lǝmdǝ ɓamur rǝ sǝm nǝ doɓoarnsari, andǝ sǝlǝe, andǝ munyi, andǝ pe mǝɓoarne, nǝ bu Bangŋo Mǝfele mǝnana aɓalǝ sǝm ngga, sǝ nǝ earcearǝu mǝɓafoe. 7 Sǝm nggǝ hamnǝ mǝsǝcau nǝ ɓabum kat, sǝ nǝ rǝcandǝa mala Ɓakuli aban pak túró aɓalǝ sǝm. Sǝm nggǝ pak túró nǝ ɓealɓoarna ma’sǝm kǝla agirbura a bu sǝm mǝlì ace ká nǝ munǝo, sǝ a bu sǝm mǝ’nggare ace mgbàllì agirbura. 8 Sǝm nggǝ pakki Ɓakuli túró, ko aɓwana gusǝlǝ sǝm, ko à būrǝce sǝm, ko à twal lullǝ sǝm, ko à ɓwangsǝ sǝm. Aɓwana twal sǝm kǝla amǝ swarkiban, sǝama sǝm nggǝ pak agir nǝ ɓabum sǝm mwashat. 9 Sǝm do kǝla à súrǝ̀ sǝm ɗàng, sǝ à sùrǝ́nà rǝ sǝm pepè. Sǝm do kǝla sǝm nda kun lú, sǝ sǝm ndanǝ yilǝmu. À walki sǝm, sǝ à wal-lú sǝm ɗàng. 10 Kat andǝ amani ama à tsǝk sǝm aɓa bumkiɗikea ka, sǝm nda aɓa bumpwasǝa ko aya pwari. Ko ɓǝ̀ ndo ama sǝm nda ka amǝ’tǝ̀r ka, sǝm nggǝ tsǝk aɓwana pas à duk amǝ’kume. Mǝsǝcau na ama sǝm pànǝ kǝgìr ɗàng, sǝama girbunda kat ka ma’sǝma.

11 Wun aɓi sǝm mǝnana a Korinti ka! Sǝm sǝmbǝrǝa wun kǝcau ɗàng, sǝm na wun a banfana, sǝm mǝn ɓabum sǝm bwāng a ban wun. 12 Sǝm lǝmdǝ earcearǝu aban ká a ban wun, sǝ wun ngga, wu pànǝ earcearǝu arǝ sǝm ɗàng. 13 Ən nggǝ na wun cau kǝla amunem. Ace earcearǝu mǝnana sǝm ndanǝi arǝ wun ngga, pa wu nǝ̀ lǝmdǝa sǝm earcearǝu gbal re? Wu mǝn ɓabum wun aban yiu a ban sǝm.

Andamǝgule mala Ɓakuli mǝyilǝmuì

14 Wu kǝa kpapi ɓamur rǝ wun*6:14 Wu kǝa kpapi ɓamur rǝ wun Ko <<Wu kǝa duk ɓiu>> wunǝ aɓwana mǝnana à pa ɓamuria a ban Kǝrǝsti raka ɗàng. Mana kpapi ɓealɓoarna andǝ ɓealɓikea? Sǝ tǎlaban ngga, lang sǝ à nǝ̀ do andǝ pǝndǝa? 15 Sǝ ya dotarǝu na kpapi Kǝrǝsti andǝ Shetan? Sǝ mana kpapi mǝkwaɗi andǝ ɓwa mǝnana mǝkwaɗi na raka? 16 Sǝ mana kpapi Ndàmǝgule mala Ɓakuli andǝ nda ka alú? Sǝm ngga, sǝm nda ka ndàmǝgule mala Ɓakuli Mǝyilǝmui. Kǝla mǝnana Ɓakuli na ka:

<<Mǝ nǝ do aɓalǝ

aɓwana mem,

mǝ nǝ gya aɓalǝia,

Mǝ nǝ duk Ɓakuli amúrià,

sǝ yia ka, à nǝ̀ duk

aɓwana mem.>>*6:16 Ɓalli gbal aɓa: Pǝris 26:11-13; Ir 32:38; Ezǝk 37:27; Pur 25:8; 29:45; Sǝn 21:3.

17 <<Acemani ka, wu purî

ɓalǝ amǝ’ɓealɓikea,

wu duk zak!

Wu kǝa gbashi rǝia ɗàng,

anggo sǝ Mǝtalabangŋo na.

Wu kǝa je kǝgìr mǝnana

mim Ɓakuli ǝn ginǝce ka ɗàng,

sǝ mǝ nǝ gingsǝ wun.>>*6:17 Ɓalli gbal aɓa: Isha 52:11.

18 <<Mǝ nǝ duk Tár wun,

sǝ wun nǝ̀ duk amunem.

Mǝnia ka nda cau

mǝnana Mǝtalabangŋo

mana Karban kat

bang ngga.>>*6:18 Ɓalli gbal aɓa: 2Sam 7:14; 1Acau 17:13; Isha 43:6; Ir 31:9.