1 Anzǝm mǝnia ka, Mǝtalabangŋo twal aɓea ɓwana lumi-tongno-nong-ɓari nǝ mǝsǝì ɓari atà amǝkpate, sǝ tasǝia ɓari-ɓari ɓǝa aki dǝmba o arǝ alá andǝ aban mǝnana yì ka, nǝ̀ ká kam ngga. 2 Nea wia ama:

Túró pwan gir ɓaban ngga ndakam kǝ̀rkǝ́r, sǝ amǝtúró ka à làkkì ɗàng. Ace mani ka, wu zǝmbi Mǝtala ɓaban ɓǝ̀ tasǝ amǝtúró a ɓaban. * 10:2 Ɓalli gbal aɓa: Mat 9:37 . 3 Wu kyane! Ən nggǝ tasǝ wun kǝla amuna-nzur aɓalǝ anvwa-bondo.*10:3 Ɓalli gbal aɓa: Mat 10:16. 4 *10:4 Ɓalli gbal aɓa: Mat 10:7-14; Mar 6:8-11; Luk 9:3-5. Wu kǝa twal boalo, ko luru gya, ko ankura, a bu wun ɗàng, sǝ wu kǝa makki kǝɓwa kún a njargula ɗang. 5 Ko ya ɓala na wu kútí kam ngga, wu tite nǝ na ama, <<Ɓǝ̀ dorǝpwala sulǝo a ɓala man.>> 6 Ɓǝ̀ mǝ’earce dorǝpwala na a ɓalae ka, makkun ma’wun ɓǝ̀ do amurí. Sǝ ɓǝ̀ pà kàm raka, makkun ma’wun ɓǝ̀ nyare atà wun. 7 Wu do a ɓalae, wu li, wu nu koya gir à pà wun kam ngga, acemǝnana mǝtúró ka ɓoaro ɓǝ̀ kum tangnakusǝi. Wu kǝa wu turkio arǝ aɓala ɗang.*10:7 Ɓalli gbal aɓa: 1Kor 9:14; 1Tim 5:18.

8 Ɓǝ̀ ya là wu kútí kam, sǝ à ak wun ngga, wu li komana à pà wun ngga. 9 Wu twalia wia ban arǝkwana mǝnana abanì ka, sǝ wu nea wia ama, <<Domurǝm mala Ɓakuli yina aban wun tù.>> 10 *10:10 Ɓalli gbal aɓa: 1Kor 9:14; 1Tim 5:18. La mǝnana wu kútí kam, sǝ à ak wun raka, wu puro arǝ akula malea wu na ama, 11 <<Ko nggearǝ tú la ma’wun mǝnana a kusǝ sǝm ngga, sǝm nggǝ kǝtǝrikia wuni. Sǝ wu sǝlǝ ama: Domurǝm mala Ɓakuli ka yina aban wun tù!>> 12 Ən nggǝ na wun, a pwari ɓashi ka, ɓashi mala Ɓakuli amur mǝno yì la ka nǝ̀ candǝe nǝ̀ kútì mala amǝ Sodom.*10:12 Ɓalli gbal aɓa: Tite 19:24-28; Mat 11:24; 10:15.

13 Caukwanban nǝ we, Korazin! Caukwanban ne we gbal Beseda! Ɓǝa agir-ndǝlǝki mǝnana à pakkia aɓalǝ wun, à pangŋǝnia a Taya andǝ Sidon ngga, ɓǝ à pwanǝna nzali ɗiɗyal, à makkina anggubyau keban a rǝia, nǝ tāpì aɓa tú. * 10:13 Ɓalli gbal aɓa: Isha 23:1-8; Ezǝk 26:1--28:26; Jol 3:4-8; Zak 9:2-4. 14 Gìr’kwanrǝu mana nǝ̀ yiu amur wun a pwari ɓashi ka, nǝ̀ ɓike nǝ̀ kútì mǝnana nǝ̀ yiu amur amǝ Taya andǝ amǝ Sidon ngga. 15 Sǝ we Kapanahum ngga! A kǝ́ sǝni kǝla à nǝ̀ loasǝo aban ká kùli le? Awo! À nǝ̀ túrǒ a nzali àkǝ̀ ɓá tūli-lú!*10:15 Ɓalli gbal aɓa: Isha 14:13-15.

16 Wun amǝ kpatam, ɓwa mǝnana kwakikiri arǝ wun ngga, nda ban kwakikiri a rǝam, ɓwa mǝnana ginǝ wun ngga, ginǝnam, sǝ ɓwa mǝnana ginǝam ngga, ginǝna Tárrám mǝnana tasǝam ngga.

17 Amǝkpata Yesu mǝnana lumi-tongno-nong-ɓari mǝsǝì ɓari ka à nyar nǝ bumpwasǝa à yiu à yì na ama, <<Mǝtalabangŋo, nggearǝ akukwar ka à kǝ oka sǝm aɓa lùllǝò!>>

18 Pǝlǝa Yesu pea wia eare ama, <<Ən sǝn Shetan pur a kùli aban kpa kǝla li’nzama mala mbulo. 19 Ən pana wun rǝcandǝa wu parki an’yau andǝ agenye sǝ wu limurǝm amur bangŋo mala ɓi’wun mǝbura, kǝgìr pà nǝ̀ kum wun ɗang.*10:19 Ɓalli gbal aɓa: Ang 91:13. 20 Sǝ ban ɓǝ̀ kǝa ɓoara wun ama akukwar kǝ oka wun ɗang, wu pak bumpwasǝa ama alullǝ wun ngga à gilǝnia a kùli.>>

21 Amǝno yì pwari ka, Yesu lùmsǝ nǝ bumpwasǝa aɓa Bangŋo Mǝfele sǝ bang ama, <<Ən ɓwangsǝkio we Dâ, Mǝtala kùli andǝ nzali, acemǝnana a sǝmbǝrǝ amǝnia yì agir ka arǝ amǝ’sǝlǝe andǝ amǝ’súrǝ̀e, sǝ a lǝmdǝia aban amuna mǝkèke. E, Dâ, mǝnia ka nda gir mǝnana pwasǝ bumo ka.>>

22 <<Girbunda kat ka Tárrám nyìngŋǝ́nàm mia a buam. Kǝɓwa súrǝ̀ koyan nda Muna ɗang, she kǝ Ɓakuli Tárrú nǝmurǝì, sǝ kǝɓwa pà kàm súrǝ̀ koyan nda Tárrú ɗang, she kǝ Muni, andǝ aɓwana mǝnana Muni tarkia ama nǝ̀ lǝmdǝí abania ɓǝa súrǝì ka.>> * 10:22 Ɓalli gbal aɓa: Yoh 3:35; 10:15.

23 Pǝlǝa pǝlǝ rǝì a ban alaggana male, nea wia zàng ama, <<Amǝsǝu mǝnana à kǝ sǝn gìr mǝnana wu kǝ sǝni ka, à ndanǝ earmúrú a ban Ɓakuli! 24 Ən nggǝ na wun ama, amǝ’ɓangnǝa mala Ɓakuli andǝ amurǝma ka, à kǝ earce ama à nǝ̀ sǝn gìr mǝnana wu kǝ sǝni ka, sǝ à kùmô à sǝni ɗàng. À kǝ̀ earce ok cau mǝnana wu kǝ oe ka, sǝ à kùmô à oè ɗàng!>>

25 * 10:25 Ɓalli gbal aɓa: Mat 22:35-40; Mar 12:28-34. A ɓekǝ pwari ka, ɓè mǝ’sǝlǝ Nggurcau mala Musa lo nǝ̀ kārǝki Yesu. Pǝlǝa ɗì ama, <<Malǝm, mana mǝ nǝ pa sǝ mǝ nǝ kum yilǝmu mǝnana málá male pà kàm raka?>>

26 Yesu eari wi ama, <<Mana ɗe à gilǝa aɓa Nggurcau? Lang sǝ a kǝ ɓalli?>>

27 Ɓwe eare ama, << <Earce Ɓakuli mô nǝ ɓabumo kat, nǝ yilǝmo kat, nǝ rǝcandǝa mô kat, nǝ ɗenyicau mò kat>*10:27 Ɓalli gbal aɓa: Nggur 6:5; Pǝris 19:18.; sǝ wu <earce ɓio mǝkunɓala kǝla mǝnana a earce ɓamúrò ka.>*10:27 Ɓalli gbal aɓa: Pǝris 19:18. >>

28 Yesu eari wi ama, <<A bangŋǝna mǝsǝcau. We ka, pàk anggo, awu nǝ auwa.>>*10:28 Ɓalli gbal aɓa: Pǝris 18:5.

29 Sǝ yì ka, earce nǝ̀ lǝmdǝ ama ɓwarki raka, pǝlǝa ɗì Yesu ama, <<Yana nda ɓiam?>>

30 Yesu ne wi ama:

Ɓè ɓwa lo a Urǝshalima aban ká Jeriko, kara amǝ’ɓǝmbǝriban kasǝ a kúni. À swárkì wi agir-nggūrǝì, à walki ue bǝti ɓǝ́ wuna, sǝ à o à ɗeki. 31 Anggo ka ɓè Pǝris twalǝna kǝ njargule aban ká. Mǝsǝì nǝ̀ yia kpa arǝì ka, kara kyanggi wi o a o male. 32 Sǝ anggo gbal ka ɓeɓwa Lawi*10:32 ɓwa Lawi: Amǝ Lawi ka à nda ka pǝris, amǝ pak túró aɓa Ndàmǝgule mala Ɓakuli. twal kǝ njarnì, lang yiu yi bik banì ka mǝsǝì kpa arǝì, kara twal ɓè njar ɗàng. 33 *10:33 Ɓalli gbal aɓa: 2Acau 28:15. Ɓè ɓwa-kúnɗàngna, ɓwa Samariya kar àkǝ̀ njargule, nǝ̀ yia sǝn ɓwa man ngga, mǝsǝswatǝr bwali. 34 Pǝlǝa kyang a baní, soapi wi mùrú andǝ mùr-anap amur anpenye, sǝ marǝki wi anpenye nǝ bugir. Twali tsǝì anzǝm ndambǝritso male. Wari nǝi a ban-sulǝo kya ɗenyinǝi. 35 Ban fana ka pusǝ boalo, dinari*10:35 dinari: Dinari nda mǝsǝ bolo-azǝrfa. ɓari pè mǝɗenyi nǝ ban-sulǝo, ne wi ama, <<Ɗenyi nǝ mǝnia yì mǝkwánó ka. Gìr mǝnana kat a kasǝi amurí kútì mǝnia ka mǝ nǝ yia mbweo ɓǝ̀n nyarna ka.>>

36 A masǝlǝate ka Yesu ɗì ama, <<Atà aɓwana mǝnia tàrú ka, yana a ɗenyicau mò, nda lǝmdǝ dokunɓala arǝ ɓwa mǝnana kpa a bu amǝ’ɓǝmbǝriban ngga?>>

37 Mǝ’sǝlǝ Nggurcau eare ama, <<Ɓwa mǝnana lǝmdǝì wi ɓwamuru ka.>>

Yesu ne wi ama, <<Kyane kya pa anggo.>>

38 * 10:38 Ɓalli gbal aɓa: Yoh 11:12 . Lang Yesu andǝ alaggana male bwalna njar ka, à yì bik ɓè muna-là a ban mǝnana ɓè ɓwama, lùllǝì ama Marta, gingsǝia, ea a ɓala male ka. 39 Marta ka ndanǝ mǝ’eambi muna-ɓwama lùllǝì ama Maryamu, yi do a ɓadǝm Mǝtalabangŋo Yesu aban ok kànìgìr male. 40 Sǝ Marta ka nyesǝ ɗenyicau male arǝ atúró mǝnana ɓoaro ɓǝà pea ka. Pǝlǝa yiu a ban Yesu yi ɗì ama, <<Mǝtalabangŋo, kǝgìr oasǝo arǝ atúró mǝnana mǝ’eambam nyinggam a kikilam ngga re? Ne wi ɓǝ̀ bwalàm.>>

41 Mǝtalabangŋo Yesu ne wi ama, <<Marta, Marta, ɓabumo pi sǝ a kǝ pe rǝo tanni arǝ agir pas. 42 Sǝ kǝgìr mwashat nda à earkiyi ce ka, ndà kǝ mǝɓoarne mǝnia Maryamu twali ka, sǝ kǝɓwa pà nǝ̀ é arǝì ɗàng.>>