1 Yesu ne alaggana male ama:

Agir mǝnana à nǝ̀ tsǝk aɓwana à nǝ̀ kpa aɓa cauɓikea ka dumǝna púp à nǝ̀ yiu. Sǝa ma caukwanban nǝ́ ɓwa mǝnana amǝnia yì agir à pur nǝ bani ka. 2 Ɓǝ̀ ɓwa nǝ̀ tsǝk mwashat atà amǝnia yì amuna ɓǝ̀ pak cauɓikea ka, kǝpǝna ɓǝa ɗurri ɓwe taligo a meali sǝ ɓǝa ramte aɓa nggeamùr. 3 Ace mani ka wu tsǝkir wun.

Ɓǝ̀ mǝ’eambo pakko cauɓikea ka, gimbi, sǝ ɓǝ̀ vwaki buì arǝ cauɓikea male pwanzali ka, twali wi banì.*17:3 Ɓalli gbal aɓa: Mat 18:15. 4 Ko ɓǝ̀ pakko cauɓikea kusǝ tongno-nong-ɓari aɓa pwari mǝ’mwashati, sǝ nyar kusǝ tongno-nong-ɓari a bano yi pwanmbo nzali ka, twali wi banì.

5 Pǝlǝa Amǝ’mishan ne Mǝtalabangŋo ama, <<Tsǝk paɓamuru ma’sǝm ɓǝ̀ gulo.>>

6 Mǝtalabangŋo pea wia eare ama:

Ko ɓǝ̀ gūliarǝu ma’wun kyauwe kǝla mǝsǝ musta ka, wun nǝ̀ gandǝ banggi nggea nggun mǝnia ka ama, <<U, kya kpa aɓa nggeamùr!>> Sǝ yì ka, nǝ̀ kpata cau ma’wun.

7 Ɓǝà twali ama ɓeɓwa nda kam aɓalǝ wun mana ndanǝ muna-ɓala mǝnana wari a rya a ɓaban ko a yál anzur ka. Ɓǝ̀ mǝnia yì muna-ɓala ka ndo kǝ nyàrî ɓabondo nǝ nyare ka, mǝtala-ɓala male nǝ̀ ne wi ama, <<Farǝo, yiu do lìli le?>> 8 Pa nǝ̀ ne wi ama, <<Pakkam girlina peatu, wu yi tsǝkami a ɓadǝmbam, ɓǝ̀ ǝn linali sǝ ǝn nunà mùr ka, sǝ awu nǝ lìli, awu nǝ nu mùr re?>> 9 Nǝ̀ pàkkî muna-ɓala man yàwá, acemǝnana kpata cau mana ne wi ɓǝ̀ pè ka le? 10 Anggo gbal sǝ nǝ̀ pang nǝ wun: ɓǝ̀ wu pangŋǝna agir mǝnana kat à bangga wun ama ɓǝ̀ wu pea ka, wun nǝ̀ na ama, <<Sǝm nda ka mǝtúró-ɓala mǝnana sǝm pà a kun kǝgìr raka. Kǝ túró ma’sǝm nda sǝm pak ka.>>

11 Yesu nǝ̀ o a Urǝshalima ka, kar nǝ nzong-nzali mala amǝ Samariya andǝ amǝ Galili. 12 Nda ban kutio aɓa ɓè muna-là ka, aɓea burana lum amǝdakali na, à yì kasǝ a kúni. À cam zak, 13 sǝ à loasǝ già à tunǝban ama, <<Ɓwamǝgule! Yesu! Sǝn mǝsǝswatǝr ma’sǝm!>>

14 Yesu pǝlǝ mǝsǝì sǝnia sǝ nea wia ama, <<Wu kyane, wu kya lǝmdǝ rǝ wun aban apǝris.>>*17:14 Ɓalli gbal aɓa: Pǝris 14:1-32.

À nda ban o ka, kara dakali mali rǝia.

15 Lang ɓwa mwashat aɓalǝia sǝni rǝì malǝna ka, kara soaɓunu nyare aban yiu, loasǝ gi, kǝ ɓwangsǝki Ɓakuli. 16 Yi kpa a ɓadǝm Yesu aban pakki wi yàwá. Sǝ yì ka, ɓwa Samariya na.

17 Yesu ɗiban ama, <<Aɓwana lum mbo sǝ à twalia wia ban dakali? Aman tongno-nong-ine ka à nda malea ake? 18 Kǝ ɓwa pà kàm ateà nǝ̀ nyare nǝ̀ ɓwangsǝ Ɓakuli ka ɗang, she kǝ ɓwa-kúnɗàngna mǝnia ka?>> 19 Pǝlǝa ne wi ama, <<Lo o, gūliarǝu mo a rǝam amsǝno.>>

20 Amǝ Farisi ɗì Yesu ama, <<A ya pwari sǝ Domurǝm mala Ɓakuli nǝ̀ yiu?>> Yesu earia wia ama, <<Yiu mala Domurǝm mala Ɓakuli ka gìr na mǝnana à nǝ̀ sǝni nǝ mǝsǝu ka ɗàng. 21 Kǝɓwa pà nǝ̀ na ama, <Ndya ka, wu sǝni!> Ko ana raka, <Ndako ka> ɗàng. Acemǝnana Domurǝm mala Ɓakuli ka nda àkǝ̀ ɓalǝ wun.>>

22 Pǝlǝa ne alaggana male ama:

Pwari na kǝ yiu ka yi mǝnana rǝ wun nǝ̀ ɓǝla arǝ sǝn pwari mwashat aɓalǝ apwari mala Muna Mala Ɓwa ka, sǝ pà wun nǝ̀ sǝni ɗàng. 23 Ɓwapǝndǝa nǝ̀ na wun ama, <<Ndako ka!>> Ko ana raka, <<Ndya ka!>> Wu kǝa ɓangŋa ateà ɗang. 24 Kǝla mǝnana ɓǝ̀ mbulo li’nzama pǝlilip ka, nǝ̀ tá amur ɓanza a buì man nǝ̀ nggá bwal ɓe buì ka, anggo sǝ Muna Mala Ɓwa nǝ̀ pa a pwari nyare male. 25 Sǝa ma peatu ka, Muna mala Ɓwa nǝ̀ nu tanni kǝ̀rkǝ́r arǝ agir pas, sǝ aɓwana mǝnana a nza man ngga à nǝ̀ ɓinǝ mǝsǝì.

26 Kǝla mǝnana kumban a nza mala Nuhu ka, anggo sǝ nǝ̀ pa aɓalǝ anonggio mǝnana Muna Mala Ɓwa nǝ̀ nyare nǝ̀ yiu nǝi ka.*17:26 Ɓalli gbal aɓa: Tite 6:5-8. 27 Ɓwapǝndǝa kǝ lìli, kǝ nu, à kǝ al rǝarǝia, à kǝ isǝ amunia bà pwari mǝnana Nuhu kútí nǝi a nggea-waru ka. Pǝlǝa mùr-gùla yiu yi twaltea kat.*17:27 Ɓalli gbal aɓa: Tite 7:5-24.

28 * 17:28 Ɓalli gbal aɓa: Tite 18:20--19:25 . Kǝ nda anggo a nza mala Lotu. Ɓwapǝndǝa kǝ li, à kǝ nu, à kǝ kúrkúró, à kǝ makkiagir, à kǝ rikrya, à kǝ ɓakki aɓah. 29 A pwari mǝnana Lotu purî ɓá Sodom ngga, bǝsa andǝ amǝsǝtali bǝsa nya nǝ kuli amur amǝ Sodom twaltea kat.

30 Anggo sǝ nǝ̀ kumban a pwari mǝnana Muna Mala Ɓwa nǝ̀ yia pusǝna rǝì nǝi ka. 31 A mǝno yì pwari ka, ɓwa mǝnana nda amur kurǝm male sǝ agirkuma male ka à nda aɓa kurǝm ngga, ɓǝ̀ kǝa na ama nǝ̀ sulǝ púp nǝ̀ nggá pwania ɗang. Anggo sǝ ɓwa mǝnana nda a ɓabondo ka, ɓǝ̀ kǝa nyare a ɓala ace twal kǝgìr ɗang.*17:31 Ɓalli gbal aɓa: Mat 24:17-18; Mar 13:15,16. 32 Wu ɗenyi nǝ mālá Lotu!*17:32 Ɓalli gbal aɓa: Tite 19:26.

33 Ɓwa mǝnana kǝ earce nǝ̀ amsǝ yilǝmi ka nǝ̀ turte. Sǝ ɓwa mǝnana kǝ turta yilǝmi ka nǝ̀ tsǝkcè.*17:33 Ɓalli gbal aɓa: Mat 10:39; 16:25; Mar 8:35; Yoh 12:25. 34 Ən nggǝ na wun, a mǝno yì du ka, aɓwana ɓari nǝ̀ pa aban nongŋo a kala mǝ’mwashati, à nǝ̀ twal man mwashat ka, à nǝ̀ nying ɓe. 35 À nǝ̀ kum amamǝna ɓari aban go aban mǝ’mwashati, à nǝ̀ twal mwashat à nǝ̀ nying man mwashat ka. 36 [À nǝ̀ kum aburana ɓari a ɓaban, à nǝ̀ twal man mwashat ka, à nǝ̀ nying ɓe.]

37 Pǝlǝa alaggana male ɗì ama, <<Aya ban le, Mǝtalabangŋo?>>

Yesu earia wia ama, <<Ban mǝnana lugir pak kam ngga, abanì sǝ adǝkǝlaki nǝ̀ rambǝa.>>