1 Yahweh banggi Musa cau amur Nkono Saina ama, 2 <<Nacau nǝ amǝ Isǝrayila sǝ wu banggia wia ama, lang wu yina aɓa nzali mǝnana ǝn pà wun ngga, wu nying nzalî ɓǝ̀ kum usǝlǝo mala Sabbat abanam Yahweh. 3 Wun nǝ̀ ɓealɓeale arǝ aɓaban ma’wun aɓa pǝlǝa tongno-nong-mwashat, sǝ wun nǝ̀ kpaliki anggun anap ma’wun sǝ wun nǝ̀ pwan ɓǝlea aɓa pǝlǝa tongno-nong-mwashat, 4 sǝama tongno-nong-ɓaria pǝlǝa ka, nǝ̀ duk Sabbat mala usǝlǝo kat-kat ace nzalî abanam Yahweh.* Aɓalǝi ka pà wu nǝ̀ ɓealɓeale a ɓaban ko wun nǝ̀ kpaliki anggun anap ma’wun ɗàng. 5 Pà wu nǝ̀ pwàn gìr mǝnana gul a nkwalo anzǝm ram girɓaban ma’wun ngga ɗàng, sǝ pà wu nǝ̀ tùki aɓǝla nggun-anap mǝnana wu kpaliki abui raka ɗàng. Pǝlǝê ka nǝ̀ duk mala usǝlǝo kat-kat ace nzalî. 6 Pǝlǝa mala Sabbat mala nzali ka nǝ̀ pusǝ girlina ace wun, ace aguro ma’wun andǝ amǝ’túró-boalo ma’wun aburana andǝ amamǝna, andǝ abǝri mǝnana à do aɓalǝ wun ngga, 7 sǝ ace anyam-lǝsǝa ma’wun andǝ anyam-ɓabondo mǝnana a nzali ma’wun ngga: gìr mǝnana kat nzali nǝ̀ pusǝ ka girlina na.

8 <<Wun nǝ̀ ɓal alimo Sabbat mala apǝlǝa, apǝlǝa tongno-nong-ɓari kusǝ tongno-nong-ɓari, ace mǝnana anonggio mala alimo Sabbat mala apǝlǝa ka, à nǝ̀ pà wun apǝlǝa lumi-ine bwamdǝ tongno-nong-ine (49). 9 Sǝ a lumia pwari mala tongno-nong-ɓaria zongŋo,* mǝnana nda Pwari mala Shawuɗiban ngga, wun nǝ̀ twang njawe ɓǝ̀ ɓua ɓua-mǝcandǝe. Dumǝna púp amǝnia yì Pwari ka wun nǝ̀ twang njawe aɓa nzali ma’wun kat. 10 Wun nǝ̀ tàr mǝnia yì lumi-tongnoia pǝlǝa ka, sǝ wun nǝ̀ hamnǝ kumɓamuru aɓa nzali kat ace aɓwana andǝ agir mǝnana kat à ndanǝdo aɓalǝi ka. Nǝ̀ duk pǝlǝa mala pàkkiɗire-banɓoarnado ace wun. Aɓa pǝlǝa mǝnia ka, koya nzali mǝnana kat à me ka, à nǝ̀ nyesǝi ɓǝ̀ nyare a bù mǝtale mana atadǝmbe ka ko a bù amǝke, sǝ koyan mǝnana kat à me kǝla guro ka nǝ̀ nyare aban amǝɓala male. 11 Mǝno yì lumi-tongnoia pǝlǝa ka, nǝ̀ duk pǝlǝa mala pàkkiɗire-banɓoarnado ace wun. Aɓalǝi ka pà wu nǝ̀ ɓealɓeale ɗang, pà wu nǝ̀ pwàn kǝ mǝssa mǝnana gul a nkwalo ka ɗàng, sǝ pà wu nǝ̀ tùki aɓǝla nggun-anap mǝnana wu kpaliki abui raka ɗàng. 12 Mǝno yì pǝlǝa ka, mala pàkkiɗire-banɓoarnado na. Nǝ̀ duk pǝlǝa mǝfele aban wun. Kǝ gìr mǝnana ɓǝl atàrǝì a ɓaban ngga nda wun nǝ̀ lì ka.

13 <<A mǝnia yì pǝlǝa mala pàkkiɗire-banɓoarnado ka, koya nzali mǝnana kat à me ka, à nǝ̀ nyesǝi ɓǝ̀ nyare a bù mǝtale mana atadǝmbe ka ko a bù amǝke, sǝ koyan mǝnana kat à me kǝla guro ka, nǝ̀ nyar aban amǝɓala male. 14 Sǝ ɓǝ̀ a makkì ɓio mǝ’murkala kǝgir, ko a kúr kǝgir a bù ɓio mǝ’murkala ka, cè a tǝpǝri ɗàng. 15 Ɓǝ̀ a kúr nzali a bù ɓio mǝ’murkala ka, kúrè ka nǝ̀ kārǝa arǝ lakkì mala apǝlǝa mana à kutikio anzǝm pàkkiɗire-banɓoarnado mǝ’nzǝ́moè ka. Sǝ yì ka nǝ̀ makko wi amur làkkì mala apǝlǝa mǝnana à ueo sǝ ɓè pàkkiɗire-banɓoarnado yiu ka. 16 Ɓǝ̀ apǝlǝe na pas ka, awu nǝ eamsǝ kúrè, sǝ ɓǝ̀ à nda kpokyak ka, awu nǝ sulǝ kúrè, acemǝnana làkkì mala apǝlǝa mala pwan girɓaban na kǝ makkò ka. 17 Pà wu nǝ̀ tǝpǝri rǝarǝ wun ɗàng; wun nǝ̀ ɓanggi Ɓakuli ma’wun, acemǝnana Mǝ nda Yahweh Ɓakuli ma’wun.

18 <<Ɓǝ̀ wu earce do jam aɓa nzali ka, dumǝna púp wun nǝ̀ bwal anê mem, sǝ wun nǝ̀ kpata acau mem, sǝ wun nǝ̀ peǎ. 19 Nzali ka nǝ̀ pà ɓǝle, sǝ wun nǝ̀ lì, wun nǝ̀ ɗǝmbo, sǝ wun nǝ̀ duk jam. 20 Sǝ ɓǝ̀ wu na ama, <Mana sǝm nǝ̀ lǐ aɓa tongno-nong-ɓaria pǝlǝa, yi mǝnana sǝm ɓealɓeale ko sǝm pwan girɓaban raka?> 21 Mǝ nǝ tsǝkî nzali buam aɓa tongno-nong-mwashatia pǝlǝa, wun nǝ̀ pwan girlina mǝnana nǝ̀ linǝ wun, aɓalǝ apǝlǝa tàrú ka. 22 Sǝ lang wu ɓealɓeale a tongno-nong-tàruià pǝlǝa ka, wun nǝ̀ pwan girlina, mǝnana nǝ̀ yia kum mǝ’e mana wu pwan a tongno-nong-mwashatia pǝlǝa ka, sǝ wun nǝ̀ kum kpǝm mǝnana wun nǝ̀ lǐ nǝ̀ kánǝ wun a tongno-nong-inea pǝlǝa, a bàkú mala pwan gìrɓaban male ka.

23 <<Pà wu nǝ̀ mak nzali ɓǝ̀ duk mala ɓwa tàtǝ́k ɗàng, acemǝnana nzali ka mema. Wun ngga, wu nda ka abǝri, sǝ wu yiu a dola atàm.* 24 Sǝ aɓa nzali mǝnana kat nda a bù wun ngga, dumǝna púp wu sǝlǝ ama ɓǝ̀ ɓwa makkò ɓè bare nzali ka ndanǝ njar nǝ̀ nyare nǝ̀ kúrí ɗǝm a buo, ɓǝ̀ earce ka.

25 <<Ɓǝ̀ tǝ̀r tsǝk ɓio ɓwa Isǝrayila sǝ mak bare nzali male ka, ɓwa mǝnana ɓǝla li-gìr-lú male na ka ɓǝ̀ akmúr gìr mǝnana mǝ’eambi mangŋǝ́nì ka. 26 Sǝ ɓǝ̀ ɓwe panǝ kǝɓwa mǝnana nǝ̀ akmúr nzalinì raka, sǝ nǝnzǝ́mò ka yi kumbu sǝ kum gìr mǝnana kārǝa nǝ̀ kúrí nǝi ka, ɓǝ̀ nyare ɓǝ̀ akmúrí. 27 Ɓǝ̀ ɓal apǝlǝa, twal a pwari mana mangŋǝna nzalî nǝi ka, sǝ ɓǝ̀ mbwe cili boalo ace apǝlǝa mǝnana ueo aban ká ɓè pàkkiɗire-banɓoarnado ka, aban ɓwa mana kúrí ka, sǝ ɓǝ̀ nyesǝ girkuma male. 28 Sǝ ɓǝ̀ pànǝ boalo mana kārǝa nǝ̀ akmúr nzalî raka, ɓǝ̀ nyi a bu ɓwa mǝnana kúrí ka she ɓǝ̀ pǝlǝa mala pàkkiɗire-banɓoarnado karna ka. Aɓa pǝlǝa mala pàkkiɗire-banɓoarnado ka, à nǝ̀ nyinggi wi girkuma male ɓǝ̀ nyar a buì.

29 <<Ɓǝ̀ ɓwa mak ɓala-do male, aɓa nggea-là mǝnana à kàrì nǝ sheran ngga, nǝ̀ gandǝ nyare nǝ̀ akmúrí aɓa kǝ pǝlǝa mana mé nǝi ka. Aɓa pǝlǝa kat ka, ndanǝ njar mala nyare nǝ̀ akmúr girkuma male. 30 Ɓǝ̀ à gandǝ akmúr ɓalae aɓa lumsǝo mala pǝlǝa mwashat raka, ɓalae aɓa nggea-là mana à kàrì nǝ sheran ngga, nǝ̀ duk mala ɓwa mǝnana kúrí ka andǝ amuni andǝ amǝkè tàtǝ́k; à pà nǝ̀ akmúrí aɓa pǝlǝa mala pàkkiɗire-banɓoarnado ɗang. 31 Sǝ aɓala mǝnana à nda arǝ amuna-là mǝnana à kàriá nǝ sheran raka, à nǝ̀ twalia à nda mwashat andǝ aɓaban mala nzalinì. À nǝ̀ gandǝ akmúria, sǝ à nǝ̀ gandǝ nyesǝia aɓa pǝlǝa mala pàkkiɗire-banɓoarnado. 32 Sǝama Amǝ’Lawi ka à ndanǝ njar koya pwari à nǝ̀ akmúr aɓala malea aɓalǝ anggea-là mǝnana à tsǝia kàm ngga. 33 Sǝ ɓǝ̀ ya ɓala aɓa mwashat atà anggea-là mǝnia Ɓwa-lawi me sǝ à akmúrí raka, dumǝna púp à nǝ̀ nyesǝi aɓa pǝlǝa mala pàkkiɗire-banɓoarnado, acemǝnana aɓala mǝnana amala Amǝ’Lawi na aɓalǝ anggea-là ka, agirkuma malea na aɓalǝ amǝ Isǝrayila. 34 Amur mani ka, anzali yál-agir mala anggea-là malea ka, dumǝna púp à pà nǝ̀ mea ɗàng acemǝnana girkuma malea na tàtǝ́k.

35 <<Ɓǝ̀ ɓekǝ ɓwa atà amǝ’eam wun duk mǝtǝ̀r sǝ gandǝ pàkki ɓamúrì gbasha raka, dumǝna púp wun nǝ̀ pe wi gbasha kǝla mǝnana wun nǝ̀ pàkkî bǝri, sǝ ɓwa kúnɗàngna mana yiu a dola aɓalǝ wun ngga. 36 Wu kǝa ligir arǝì ɗàng, sǝ wu kǝa ak kǝ mùr amúr tangna mǝnana wu pe wi ka ɗàng. A kún mani ka wu ɓanggi Ɓakuli ma’wun, ace mǝnana mǝ’eam wun ngga ɓǝ̀ do a nkanggari wun. 37 Kǝa pe wi tangna boalo nǝ alta mùr amurí ɗàng, sǝ kǝa pe wi girlina ace kum ligir arǝì ɗàng. 38 Mǝ nda Yahweh, Ɓakuli ma’wun, mǝnana pusǝ wun aɓa nzali Masar, ace pà wun nzali Kan’ana, sǝ mǝ duk Ɓakuli ma’wun ngga.

39 <<Ɓǝ̀ mǝ’eambo duk mǝ’tǝ̀r a nkanggario, sǝ makko ɓamúrì ka, kǝa tsǝì ɓǝ̀ pàkkô túró kǝla guro ɗàng. 40 Sǝama ɓǝ̀ do kǝla mǝ’túró-boalo atò, sǝ kǝla bǝri mana yiu ace dola ka. Nǝ̀ pàktúró atò ba pǝlǝa mala Pàkkiɗire-banɓoarnado. 41 Sǝ yì andǝ amuni ka, à nǝ̀ purî ɓala mò, à nǝ̀ nyar aban aɓwana male, a tàu male, sǝ a nzali mala akê. 42 Yia ka aguro mema, mǝnana ǝn pusǝia à purî ɓá nzali Masar ka; à pà nǝ̀ mea ɓǝà o a guro ɗàng. 43 Pà wu nǝ̀ yálmuria nǝ ɗwanyi sǝn mǝsǝswatǝr ɗàng, wu ɓanggi Ɓakuli ma’wun. 44 Aguro mò aburana andǝ amamǝna mǝnana awu nǝ pàngŋǝ́nǝia ka, awu nǝ kúria arǝ anzali mǝnana à kàrì wun ngga. 45 Awu nǝ gandǝ kúr gbal atà amǝ’kúnɗàngna mǝnana à yiu a dola atà wun ngga, sǝ amǝɓala malea mǝnana à nda atà wun, mǝnana à ɓǝlia a nzali ma’wun ngga, à nǝ̀ duk agirkuma ma’wun. 46 Wun nǝ̀ gandǝ nyinggi amuna ma’wun kǝla agirkuma malea, mǝnana à nǝ̀ duk aguro a buia tàtǝ́k ka. Sǝama mala amǝ’eam wun, amǝ Isǝrayila ka, kǝɓwa pà nǝ̀ yálmúr ɓì nǝ ɓikido ɗàng.

47 <<Ɓǝ̀ bǝri ko ɓwa-kúnɗàngna mǝnana nda dola aɓalǝ wun, pǝlǝ mǝkume, sǝ mǝ’eam wun mǝnana a nkanggari ka pǝlǝ mǝ’tǝ̀r sǝ mak ɓamúrì aban bǝri ko ɓwa-kúnɗàngna mǝnia mana ndanǝdo aɓalǝ wun ngga, ko aban ɓeɓwa a tàu mala bǝri mǝnia ka, 48 nǝ̀ do ama, anzǝm mana mangŋǝna ɓamúrì ka, ndanǝ njar a bui nǝ̀ akmúr ɓamúrì. Mwashat atà amǝ’eambi nǝ̀ gandǝ akmúrí, 49 ko kine ko muna mala kine ka nǝ̀ gandǝ akmúrí, ko ɓeɓwa atà acili aɓǝla-nggurkwar ko amǝɓala male nǝ̀ gandǝ akmúrí; ko ɓǝ̀ yì ka yi kum gìrbu ka, nǝ̀ gandǝ akmúr ɓamúrì. 50 Yì ka nǝ̀ tàɓala andǝ ɓwa mǝnana kúrí ka amur kúró kum-ɓamúrû male twal a pǝlǝa mǝnana mangŋǝna ɓamúrì nǝi ka aban ká a pǝlǝa mala Pàkkiɗire-banɓoarnado, sǝ kúrè ka nǝ̀ pa kǝla mana làkkì mala apǝlǝe pàk ka. Kúró mala kumɓamuru male ka, à nǝ̀ kārǝí arǝ tangnakusǝu mana à kǝ mbwe mǝ’túró-boalo nǝi ka. 51 Ɓǝ̀ apǝlǝa nakam pas piu mana à ue ka, boalo mana nǝ̀ mbwe ace akmúr ɓamúrì ka nǝ̀ pàk kpǝm. 52 Sǝ ɓǝ̀ apǝlǝe ue kpokyak sǝ pǝlǝa mala Pàkkiɗire-banɓoarnado nǝ̀ yiu ka, boalo mana nǝ̀ mbwe ace akmúr ɓamúrì ka nǝ̀ pàk bǝti. 53 Yì bǝri ka dumǝna púp nǝ̀ pàngnǝi kǝla mǝtúró mana à twali a túró-boalo sǝ à kǝ mbwe a masǝlǝata koya pǝlǝa ka. Pà nǝ̀ yálmúrí nǝ ɗwanyi sǝn mǝsǝswatǝr ɗàng. 54 Sǝ ɓǝ̀ à akmúrí nǝ mǝno yì anjar raka, yì andǝ amuni ka, à nǝ̀ panzǝia aɓa pǝlǝa mala Pàkkiɗire-banɓoarnado. 55 Mǝ nda mǝnana amǝ Isǝrayila nda ka aguro abanam ngga. À nda ka aguro mem mǝnana ǝn pusǝia à purî ɓá nzali Masar ka: Mǝ nda Yahweh Ɓakuli ma’wun.