1 Anzǝm mana Yesu yi malǝna ne alaggana male lum-nong-ɓari amǝnia yì akwarkiru ka, pǝlǝa nying ban mǝno kutio o nǝ̀ nggá kanigir andǝ hamnǝ cau arǝ alá mala amǝ Galili.

2 Yohana Mǝbatisǝma ka nda a ndàkurban sǝ ok cè agir mana Kǝrǝsti kǝ pea ka, pǝlǝa túr alaggana male 3 ɓǝà kya ɗì ama, <<A nda Mǝ’amsǝban mǝnana sǝm kundǝkiyi múrí ka le, ko ɓǝ̀ sǝm tsǝk mǝsǝ sǝm arǝ ɓeɓwa ɗàng?>>

4 Yesu nyesǝia wia ama, <<Wu nyare wu kya ban Yohana wu kya banggi wi cau mala agir mana wu kǝ sǝnia sǝ wu kǝ oea ka. 5 Ante kǝ sǝnban, agbakǝre kǝ gya, à kǝ twali amǝdakali ban a akwánó-bǝsa malea, amǝkir’ara kǝ okban, à kǝ loasǝ alú, sǝ à kǝ hamnǝ Cau Amsǝban a ban amǝ’tǝ̀r.*11:5 Ɓalli gbal aɓa: Isha 35:5,6; 61:1. 6 Tsǝkbu mala Ɓakuli na amur aɓwana mǝnana kum ɓè kǝgìr annda arǝàm raka.*11:6 kum ɓè kǝgìr annda arǝàm raka: Ko <<kum ɓè kǝgìr arǝàm mǝnana nǝ̀ tsǝì nǝ̀ bwakibuì arǝ earnǝ mim ngga raka.>>>>

7 Lang alaggana mala Yohana purna à nǝ̀ nggǝ o ka, Yesu tita ne aɓwana cau amur Yohana ama:

Mǝnana wu puro wu wari aɓa pǝɗanban a njenza aban Yohana ka, mana ɗe wu wari a sǝne? Wu wari a sǝn ndǝrdangŋa mǝnana gung kǝ dǝurǝki ka le? 8 Ɓǝ̀ pa ana raka, mana wu puro wu wari a sǝne? Wu wari a sǝn ɓwa mana oasǝ agir-nggūrǝu mǝɓoarne arǝì ka le? Awo, aɓwana mǝnana à oasǝkiyi agir-nggūrǝu mǝɓoarne arǝia ka à nda aɓalǝ apalta mala amurǝma. 9 Sǝ mana ɗe wu wari a sǝne? Mǝɓangnǝa na le? E, ǝn nggǝ bangga wun, yì ka kútì mǝɓangnǝa. 10 Yì nda ɓwa mǝnana à gilǝ mǝnia yì cau amurí ka ama:

<<Mǝ nǝ túr mǝturonjar

mem a ɓadǝmbo,

mǝnana nǝ̀ yia gilǝkio njar

ace yiu mô ka.>> * 11:10 Ɓalli gbal aɓa: Mal 3:1 .

11 Ən nggǝ na wun mǝsǝcau: Atà ɓwapǝndǝa kat ka à malaká ɓǝl kǝɓwa a ɓanza man mǝnana kum gulo kútì mala Yohana Mǝbatisǝma ka ɗàng; sǝama ɓwa mǝkyauwe kat a Domurǝm mala kùli ka, kútì Yohana nǝ gulo. 12 Lo a nza mala Yohana Mǝbatisǝma yi bwal a dyan ngga, Domurǝm mala Kùli ka kǝ nutanni kǝ̀rkǝ́r a bu aɓwana, sǝ amǝ bumpina ka à kǝ̀ é nǝ rǝcandǝa. 13 Amǝ’ɓangnǝa mala Ɓakuli kat andǝ malǝmce Nggurcau mala Musa ka, à hamna nǝ cau amur Domurǝm mala Ɓakuli yi pur a pwari mala Yohana.*11:13 Ɓalli gbal aɓa: Luk 16:16. 14 Sǝ ɓǝ̀ wun nǝ̀ eare wun nǝ̀ ak cau mǝnia ka, Yohana ka nda Iliya mǝnana à bang ama nǝ̀ yiu ka.*11:14 Ɓalli gbal aɓa: Mal 4:5-6; Mat 17:10-13; Mar 9:11-13. 15 Ɓwa mǝnana kat ndanǝ akiru okban ngga ɓǝ̀ ok cau.

16 Arǝ mana sǝ mǝ nǝ kànì amǝ’nza man? À nda kǝla amuna mana à do aɓa limo sǝ à kǝ akiarǝia tunǝkiban nǝ cau ama:

17 <<Sǝm twangga wun ntetu,

sǝ wu ta’nggwam ɗang;

sǝm tuka wun nggyal ɓua lú,

sǝ wu ɓua ɗàng.>>

18 Yohana yiu, liki kǝgìr ɗàng, sǝ nuki kǝgìr gbal ɗàng. À yi bang ama, <<Ndanǝ kukwar arǝì.>> 19 Muna mala Ɓwa yiu kǝ li sǝ kǝ nu, à yi bang ama, <<Mǝligula na sǝ mǝ’ɓiki nu mur anap na, gyajam mala amǝ’aki aboalo-cemi andǝ acilia amǝ’cauɓikea ka.>> Sǝ sǝlǝe mala Ɓakuli ka à kǝ súrǝì arǝ túró male.

20 Yesu kùtí a naki acau nǝ bumkiɗikea amur alá mana kya pakki agir-ndali kàm kútì acili abân kat ka, acemǝnana à ɓinǝ pwanzali ɓǝà nying acauɓikea malea ka. Na ama:

21 Wun amǝ Korazin, ban nǝ ɓikea wun! Wun amǝ Beseda, ban nǝ ɓikea wun! Ɓǝ̀ ama agir-ndali mǝnana ǝn pea aɓalǝ alá ma’wun ngga à nda ǝn pea arǝ alá mala amǝ Taya andǝ amǝ Sidon ngga, ɓǝ́ à oasǝkina asanginagìr arǝia sǝ à songŋǝna tú amúrià ɗiɗyal mana nǝ̀ lǝmdǝ ama à nyìngŋǝ̀nà acauɓikea malea ka. * 11:21 Ɓalli gbal aɓa: Isha 23:1-18; Ezǝk 26:1--28:26; Jol 3:4-8; Amo 1:9,10; Zak 9:2-4. 22 Sǝ mim ngga ǝn nggǝ na wun ama gìr mǝnana nǝ̀ kum wun a pwari ɓashi ka, nǝ̀ ɓike nǝ̀ kútì gìr mana nǝ̀ kum amǝ Taya andǝ amǝ Sidon ngga.

23 Sǝ we Kapanahum ngga, ama à nǝ̀ loasǝo a kùli le? Awo, a nggearǝ nzali a tūli-lú sǝ à nǝ̀ yinǝ we. Ɓǝ̀ ama agir-ndali mana ǝn pakkia a ɓālǝo ka ǝn pangŋǝnia a Sodom ngga ɓǝ́ yalung ngga ndakam più. * 11:23 Ɓalli gbal aɓa: Isha 14:13-15; Tite 19:24-28. 24 Sǝ ǝn nggǝ no ama, gìr mǝnana nǝ̀ kúmǒ a pwari ɓashi ka, nǝ̀ ɓike nǝ̀ kútì gìr mǝnana nǝ̀ kum nzali Sodom ngga.*11:24 Ɓalli gbal aɓa: Isha 14:13-15; Tite 19:24-28.

25 A pwari mǝno ka Yesu na ama:

Ən nggǝ ɓwangsǝo, we Dâ, mǝtala kùli andǝ nzali, ace mǝnana a sǝmbǝrǝ agir mǝnia ka arǝ amǝ’sǝlǝgir andǝ amǝ sǝlǝcau, sǝ a lǝmdǝia a banfana aban amǝ’ɗwanyi-sǝlǝe. 26 E, Dâ, anggo sǝ ɓoarô ama ɓǝ̀ pa.

27 Tárrám Ɓakuli panam agir kat a ɓabuam. Kǝ ɓwa súrǝàm yì Muni ɗàng, she kǝ yì Ɓakuli Tárrám; sǝ kǝɓwa súrǝ̀ Ɓakuli yì Tárrám ɗàng, she kǝ mim Muni andǝ aɓwana mana ǝn tarkia mǝ nǝ lǝmdǝ Ɓakuli Tárrám abania ka. * 11:27 Ɓalli gbal aɓa: Yoh 1:18; 3:35; 10:15.

28 Wu yiu abanam, wun mǝnana kat wu kǝ tanni sǝ twalo dǝmbǝrya wun ngga, mǝ nǝ pà wun usǝlǝo. 29 Wu pa ɓamur rǝ wun aɓata nzongcau mem, kǝla mana nda-rya kǝ pa ɓamúrì aɓata nggun-rya ka. Acemǝnana mǝ nda ɓukɓuk, nǝ nwangsǝmuru a ɓabum ngga, wu kànì arǝàm, sǝ yilǝmi wun nǝ̀ kum usǝlǝo.*11:29 Ɓalli gbal aɓa: Ir 6:16. 30 Nggun-rya mem ngga nda halku, sǝ twalo mem ngga nda hapǝlam.