Mateus 21

Yesu kutio a Urǝshalima

1 Lang Yesu andǝ alaggana male gbàshìnà Urǝshalima ka à yì kara a muna-là mǝnana à tunǝi ama Betafaji, mana amur Nkono mala anggun Olif ka. Yesu túr alaggana male ɓari. 2 Banggia wia ama, <<Wu kyane a muna-là mana a ɓadǝm wun ngga. Wun nǝ̀ kútí ani ka, wun nǝ̀ nggá kum mǝdambǝriso à kùrni nǝ muni atè. Wu panzǝi wu yinǝàm nǝi. 3 Ɓǝ̀ kǝɓwa na wun kǝ cau ka, wu ne wi ama, Mǝtalabangŋo kǝ earcea. Nǝ̀ ɗekia wunia tù.>>

4 Mǝnia ka pa anggo ace mǝnana ɓǝà lùmsǝ ɓangnǝa mala Zakariya mǝnana ama:

5 <<Wu ne amǝ Urǝshalima ama,

Wu sǝni, murǝm ma’wun

ndya kǝ yiu a ban wun ngga!

Yì ka, mǝ’nwangsǝ-muru na,

kǝ yiu a nzǝm ndambǝritso.

A nzǝm muna-ndambǝritso

sǝ kǝ gya.>>*21:5 Ɓalli gbal aɓa: Mat 23:11; Mar 9:35; Luk 22:26.

6 Pǝlǝa alaggana man wario à kya pak gìr mǝnana Yesu túriá ace ka. 7 À kya yiu nǝ ndambǝritso andǝ muni. À makkia anggubyau malea a nzǝmia, pǝlǝa Yesu eauwe do. 8 Ɓwabunda kǝ̀rkǝ́r sárǝ́ki anggubyau malea a tanjargula, acilia man ngga à kasǝki abu-nggun à nongsǝkia a tanjargula. 9 Aɓwabundǝa mǝnana a ɓadǝmbi andǝ amana a nzǝmi ka à loasǝ già ama,

<<Wu ɓwangsǝ Mǝkà Dauda!

Tsǝkbu mala Ɓakuli

nda muri,

yì ɓwa mǝnana kǝ yiu

aɓa lullǝ Mǝtalabangŋo ka!

Ɓǝà ɓwangsǝki Ɓakuli

akanó a kùli!>>*21:9 Ɓalli gbal aɓa: Ang 118:25,26.

10 Lang Yesu kutina a Urǝshalima ka, nggea-là kat lo came amur kusǝì. Ɓwapǝndǝa ɗiban ama, <<Yana ɓwe nda man le?>>

11 Aɓwabundǝa ear ama, <<Mǝnia ka Yesu na, Mǝɓangnǝa mala Ɓakuli mǝnana pur a Nazarat, a bu-nzali Galili ka.>>