1 Mana ado sǝm nǝ̀ na amur Ibǝrayim, yì kà-aɓwana ma’sǝm aɓa nggūrǝu? Mana gir nì na yi sǝlǝa amur cau mala do mǝ’cauɓoarna aban Ɓakuli? 2 Ɓǝa atúró mǝɓoarne male, mǝnana pea ka nda tsǝa sǝ Ɓakuli é mǝ’cauɓoarna na ka, ɓǝ́ ndanǝ kǝgìr mǝnana nǝ̀ nggori nǝi ka. Sǝ Ibǝrayim ngga pà nǝ̀ gandǝ nggori aban Ɓakuli ɗang. 3 Acemǝnana Malǝmce bangga sǝm ama, <<Ibǝrayim ngga earnǝ Ɓakuli, sǝ Ɓakuli é mǝ’cauɓoarna na ace paɓamuru male.>>*4:3 Ɓalli gbal aɓa: Tite 15:6; Gal 3:6.

4 Ɓǝ̀ ɓwa pak túró sǝ à mbwe ka, ɓoro na à pe wi ka ɗang, tangnakusǝu túró male na kum ngga. 5 Sǝ Ɓakuli ka kǝ twal ɓwa ɓǝ̀ do mǝ’cauɓoarna na, sǝ pa ace atúró male ɗang, nda ace paɓamuru male aban Ɓakuli, mǝnana twalkiyiban cauɓikea mala amǝ’cauɓikea ka. 6 Dauda nacau amur mǝnia gbal. Cau male lǝmdǝ ulang tsǝkbu mǝnana nda amur ɓwa mana Ɓakuli nyesǝi mǝ’cauɓoarna na, kat andǝ amani ama pak kǝ túró ace raka. Na ama:

7 <<Tsǝkbu mala Ɓakuli na

amur aɓwana mǝnana

à twalǝnia wia ban

amgbikiru malea,

sǝ à esǝkinia wia acauɓikea

malea ka.

8 E, tsǝkbu na amur ɓwa

mǝnana acauɓikea male ka

Mǝtalabangŋo pà nǝ̀

cia a bumi raka.>>*4:8 Ɓalli gbal aɓa: Ang 32:1,2.

9 Nggearǝ mǝnia yì tsǝkbu mǝnana Dauda nakiyi ce ka, nda ace amǝ Yahudi nǝmurǝia le ko nda gbal ace aɓwana mǝnana amǝ Yahudi na raka? Sǝm bang ama à gìlǝì aɓa Malǝmce ama, <<Ibǝrayim ngga earnǝ Ɓakuli, pà ɓamúrì a baní, sǝ Ɓakuli é mǝ’cauɓoarna na.>> 10 Sǝ lang sǝ Ɓakuli é? Ɓakuli é mǝ’cauɓoarna na anzǝm mǝnana à kasǝni wi ɓate*4:10 kasǝni wi ɓate: Kasǝ-ɓatau aban amǝ Yahudi ka nda lǝmdǝ ama ɓwa ka mala Ɓakuli na. ka le, ko Ɓakuli é anggo sǝ ɓǝa yi kasǝî wi ɓate? Ɓakuli ak Ibǝrayim sǝ à yì kasǝî wi ɓate nǝnzǝ́mò! 11 Yì kasǝ-ɓatau mǝnana à kasǝi Ibǝrayim ngga nda gìr mǝnana lǝmdǝ ama, nǝ́ paɓamuru male aban Ɓakuli ka, Ɓakuli earǝna angŋǝni, ama yì ka, mǝ’cauɓoarna na a baní, sǝ à yì kasǝî wi ɓate. Ace mani ka, Ibǝrayim nda tár aɓwana mǝnana kat à pà ɓamuria aban Ɓakuli sǝ Ɓakuli kǝ ea amǝ’cauɓoarna na, kat andǝ amani ama à kasǝia wia ɓatea raka.*4:11 Ɓalli gbal aɓa: Tite 17:10,11. 12 Sǝ Ibǝrayim ɗǝm ngga, nda tár aɓwana mǝnana à kasǝia wia ɓatea, yia mǝnana kasǝ-ɓatau nda à kasǝia wia nǝmurǝì ka ɗàng, yia gbal ka à twalkusǝ ulang paɓamuru mala Ibǝrayim, mǝnana ndanǝi sǝ nǝnzǝ́mò à yì kasǝî wi ɓate ka.

13 Mǝnana Ɓakuli pacau aban Ibǝrayim andǝ amǝkè ama nǝ̀ tsǝkia wia bu sǝ ɓanza kat nǝ̀ duk malea ka, pa acemǝnana Ibǝrayim bwal Nggurcau mala Ɓakuli ka ɗàng. Nda acemǝnana yì ka, earnǝ Ɓakuli, gūlì arǝì ama nǝ̀ pak gìr mǝnana bang ngga. Sǝ ace mǝno ka Ɓakuli é mǝ’cauɓoarna na.*4:13 Ɓalli gbal aɓa: Tite 17:4-6; 22:17,18; Gal 3:29. 14 Ɓǝ̀ pàcau mala Ɓakuli ka nda ace aɓwana mǝnana à bwal Nggurcau male mana pe Musa ka, lǝmdǝ ama gūlì arǝ Ɓakuli ace mǝnana ɓǝ̀ nyesǝ sǝm ɓǝ̀ sǝm duk amǝ’cauɓoarna ka nda ɓà. Sǝ ɗǝm ngga nǝ̀ lǝmdǝ ama gūlì arǝì gbal ace kum gìr mǝnana pàcau ace ka nda ɓà.*4:14 Ɓalli gbal aɓa: Gal 3:18. 15 Yàl Nggurcau kǝ nun bumlulla mala Ɓakuli amur aɓwana mǝnana à kǝ ɓariki ama à nǝ̀ bwali ka. Sǝ ɓǝ̀ Nggurcau pà kàm raka, yàl Nggurcau gbal ka, pà kàm ɗang!

16 Ace mani ka, nǝ́ gūlì arǝ Ɓakuli sǝ ɓwa nǝ̀ kum gìr mǝnana Ɓakuli pàcau ace ka. Ɓakuli pe anggo ace mǝnana ɓǝa sǝlǝ kàngkàng ama gìr mǝnana pàcau ace ka nǝ̀ ɓwamur aɓwana nǝi, yia aɓwana mǝnana kat amuna mala Ibǝrayim na ka. Mǝno yì ɓwamuru ka pa ace amǝ Yahudi mǝnana à kpakiyi atà Nggurcau ka nǝmurǝia ɗàng, nda gbal ace aɓwana mǝnana à earnǝ Ɓakuli, à gūlì arǝì kǝla mala Ibǝrayim ngga. Ibǝrayim ngga nda tár sǝm kat.*4:16 Ɓalli gbal aɓa: Gal 3:7. 17 Kǝla mǝnana à gilǝì aɓa Malǝmce ka, Ɓakuli ne wi ama, <<Mim ngga ǝn tsǝ́ngŋǝno a dumǝna tárrú amur aɓwana arǝ anzali pas.>> Mǝnia ka pa anggo, acemǝnana Ibǝrayim earnǝ Ɓakuli mana kǝ loasǝ alú nǝ yilǝmu sǝ kǝ pusǝ agir mǝbǝshe aban mǝnana kǝgìr pà kàm raka.*4:17 Ɓalli gbal aɓa: Tite 17:5.

18 Kat andǝ amani ama kǝgìr pà kàm mana nǝ̀ pe Ibǝrayim tsǝkɓalǝu ama nǝ̀ kum muna raka, lidǝmba nǝ tsǝkɓalǝu. Pa eare ama nǝ̀ duk tárrú amur aɓwana arǝ anzali pas, acemǝnana Ɓakuli bangŋǝni wi ama, <<Anggo sǝ làkkì mala amǝ’keò nǝ̀ pa.>>*4:18 Ɓalli gbal aɓa: Tite 15:5. 19 Ibǝrayim ngga apǝlǝa male málá à nǝ̀ lùmsǝ gbǝman mwashat. Yi sǝni ka ena a nggūrǝì, mǝnana à nǝ̀ twali ama yì ka, lú na. Sǝ ɗǝm ngga yi sǝn māmí Saratu ka ena, sǝ gandǝ ɓǝlî wi muna ɗang. Kat andǝ amǝno ka, paɓamuru mala Ibǝrayim aban Ɓakuli ka, gatti ɗang.*4:19 Ɓalli gbal aɓa: Tite 17:17. 20 Pa eare mala Ibǝrayim nǝ́ gir mǝnana Ɓakuli na ama nǝ̀ pè ka, dǝurǝ ɗang. Aɓa mǝsǝcau ka, paɓamuru male aban Ɓakuli lidǝmba nǝ rǝcandǝa, andǝ gusǝlǝ Ɓakuli. 21 Yì ka, earǝna nǝi nǝ ɓabumi kat ama Ɓakuli ka ndanǝ rǝcandǝa nǝ̀ lùmsǝ gir mǝnana bangŋǝna ama nǝ̀ pè ka. 22 Sǝ ace paɓamuru male yì Ibǝrayim ngga, <<Ɓakuli é mǝ’cauɓoarna na.>> 23 Cau mǝno à bangŋi ama, <<Ɓakuli é mǝ’cauɓoarna na>> ka, pa ace Ibǝrayim nǝmurǝì sǝ à gilǝì ɗàng. 24 Nda gbal ace sǝm sǝ à gilǝì, sǝm mǝnana Ɓakuli nǝ̀ ak sǝm kǝla amǝ’cauɓoarna, acemǝnana sǝm pa ɓamur sǝm a baní, yì ɓwa mana loasǝ Yesu Mǝtala sǝm a ɓembe ka. 25 Ɓakuli pa Yesu ɓǝà wal-luí ace acauɓikea ma’sǝm, sǝ yì loasǝi nǝyilǝmu ace mǝnana ɓǝà pǝlǝ sǝm ɓǝ̀ sǝm duk amǝ’cauɓoarna aban Ɓakuli.*4:25 ɓǝà pǝlǝ sǝm ɓǝ̀ sǝm duk amǝ’cauɓoarna aban Ɓakuli: Ko <<ɓǝà gilǝki dotarǝu ma’sǝm sǝnǝa Ɓakuli.>> *4:25 Ɓalli gbal aɓa: Isha 53:4,5; 2Kor 5:21.