1 ሳሙዔኤሌ ማፃኣፖ 2

ሃና ሺኢቄ ሺኢጲፆ

1 ሃና ሺኢቃዖ ሂዚ ጌዔኔ፦

«ናንጊና ናንጋ ጎዳ ማዼ ባኮና ዒና ታኣኮ ኮሺ ዎዛዻኔ፤

ናንጊና ናንጋ ጎዳ ታና ዼግ ዼጊዲ ቦንቺሴኔ፤

ኔ ታና ማኣዴሢሮ ዎዛዺ

ታ ሞርኮ ታ ሚኢጫኔ።»

2 «ናንጊና ናንጋ ጎዳጉዴያ ዱማዼይ ዖኦኒያ ባኣሴ፤

ኔጉዲ ማዓይ ዖኦኒያ ባኣሴ፤

ኑ ፆኦዛሢጉዴያ ዋርዲያ ሹቺ ማዓይኣ ባኣሴ፤

3 ሄርሺንቲ ሆኦሊንቲፖቴ፤

ዖቶርሞ ጌኤዞ ዒንሢኮ ሃሹዋቴ፤

ናንጊና ናንጋ ጎዳ ማዔ ፆኦሲ ቢያ ባኣዚ ዔራያኬ፤

ዓሲ ማዻ ባኮ ቢያ ዛጊ ዒ ዎጋኔ።

4 ዶዶ ዓሶኮ ዖሎ ሂኢዣ ሜቄኔ፤

ላቤ ዓሳ ጋዓንቴ ዎልቄ ዴንቂ ዶዴኔ፤

5 ሚዦ ዓሳ ናይዺንቲ ሙኡዚሮ ዎርቃያ ማዔኔ፤

ናይዼ ዓሳ ጋዓንቴ ሚሽኬኔ፤

ዞኦኬላ ላንካይ ሾዔኔ፤

ሚርጌ ናኣቶ ዒንዳ ጋዓንቴ ፔኤሮ ሌሊ ዓቴኔ።

6 ናንጊና ናንጋ ጎዳ ዎዻኔ፥ ዻቂሻኔ፤

ጋፒንፃ ጴዹዋ ዒጊቻ ዔቶ ኬይሳኔ፥ ዬካፓ ዒ ኬሳኔ፤

7 ናንጊና ናንጋ ጎዳ ማንቂሳኔ፥ ዖርጎቺያ ዖርጎቻኔ፤

ቦርሲሳኔ፤ ጊንሣ ዼግ ዼጊያ ጌይሳኔ።

8 ዒዚ ማንቆ ዓሶ ሲላላፓ፥ ላኣፖንሢያ ዲቢንፃፓ ዔቂሳኔ፤

ዔርቴ ዼኤፖ ዓሶ ቤዞ ባንሢ ዼጊዲ ኬሳኔ፤

ቦንቺንታ ዓሳ ዴዓ ዖይቶዋ ዒንጋኔ፤

ሳዖኮ ቦኦኮላሢ ዾቄሢ ናንጊና ናንጋ ጎዳኬ፤

ዬያይዳ ሳዖ ቢያ ማዤሢያ ዒዛኬ።»

9 «ዓሲ ባሺሢ ዴንቃሢ ፔ ዎልቄናቱዋኣሢሮ

ናንጊና ናንጋ ጎዳ ዒዛም ጉሙርቂንታዞንሢኮ ሄርቃ ቶኮ ካፓኔ፤

ፑርቶ ዓሳ ጋዓንቴ ዹሚዳ ኬኤሪንታኔ።

10 ናንጊና ናንጋ ጎዳ ዒፂ ማካ ዓሲ ቤሲ ባይቃኔ፤

ጫሪንጫ ዴዒ ዔያቶይዳ ዒ ጉጉንሣንዳኔ።

ናንጊና ናንጋ ጎዳ ሳዖይዳ ቢያ ዎጋንዳኔ፤

ካኣቶም ዎልቄ ዒዚ ዒንጋንዳኔ፤

ዒ ዶኦሬሢ ዼግ ዼጊዲ ቦንቺሳንዳኔ።» ✝2፡10 ሉቃ. 1፡46-55።