1 Samuel 25

ሳሙዔኤሌኮ ሃይቦ

1 ሳሙዔኤሌ ሃይቄም ዒስራዔኤሌ ዓሳ ቢያ ፔቴና ሙኪ ዒዛ ዬኤኪ፥ ራኣማይዳ ዓኣ ዒዚ ናንጋ ማኣሮኮ ዲሮ ጋራ ዒዛ ዔያታ ዱኡኬኔ።

ዳውቴና ዓቢጋይሎ ጎዖዞና

ዬካፓ ዳውቴ ፓኣራኣኔይዳ ዓኣ ዓሲ ናንጉዋ ዳውሎ ዴንዴኔ፤ 2,3 ዒኢካ ማኣሮ ዓሳ ዒዛኮ ካኣሌቤ ቶኦኪ ማዔያ፥ ናኣባኣሌ ጌይንታ ፔቴ ዓሲ ዓኣኔ፤ ዒዚ ማኣዖኔ ዓጮይዳ ሾይንቴያ፥ ቄርሜሎሴ ካታሞኮ ኮይላ ጎሺ ዒዛኮ ዓኣያኬ፤ ዒዚ ሚርጌና ዖርጎቺ ዓሲታሢሮ ሃይሦ ሺያ ማራይና ፔቴ ሺያ ዋኣሪያ ዒዛኮ ዓኣኔ፤ ማቻ ዒዛኮ፥ ዓቢጋይላ ሚርጌ ሚዛጳያ ሃሣ ዒናና ዓኣ ላኣሊኬ፤ ዒዚ ጋዓንቴ ዒኔ ዔርቱዋ ፑርታ ዓሲኬ፤

ዒዚ ዒማና ቄርሜሎሴይዳ ፔኤኮ ማራቶ ዑፃፓ ጋፓኖ ታይዚሳኔ። 4 ዳውቴ ዓሲ ናንጉዋ ዳውሎ ቦኦሎይዳ ዓኣዖ ዬያ ዋይዜኔ፤ 5 ዬያሮ ዒዚ ኪኢታ ዓሲ ታጶ ዶኦሪ፥ ናኣባኣሌ ኮይላ ቄርሜሎሴ ዴንዲ ዒዚ ዒዛ ሳራሤ ሳራሢፆ ኬኤዛንዳጉዲ ዓይሤኔ፤ 6 ዔያታ ናኣባኣሌም ኬኤዛንዳጉዲ ሂዚ ጌይ ዓይሢ ዒ ዳኬኔ፦ «ኔናንታ ኔ ማኣሮ ዓሶንታ፤ ሃሣ ኔኤኮ ዓኣ ባኮንታም ቢያ ኮሹሞ ማዖንጎ ጌዒ ዒዛ ሳራሡዋቴ። 7 ሃሢ ኔኤኒ ማራቶኮ ጋፓኖ ታይዚሳሢ ዒ ዋይዜኔ፤ ኔኤኮ ቆልሞ ሄንቃ ናኣታ ኑኡና ዎላ ናንጋኣና ፔቴታዖ ኑ ዔያቶ ዔኤቢ ዎኦቲባኣሢ ኔ ዔራንዳጉዲ ዒ ኮዓኔ፤ ዔያታ ቄርሜሎሴይዳ ዓኣ ዎዶና ዒንሢኮ ቆልሞይዳፓ ፔቴታዖ ዉኡቂንቲባኣሴ፤ 8 ዔያቶ ኔ ዖኦጬቴ ዒማ ጎይፆ ዔያታ ኔኤም ኬኤዛንዳኔ፤ ሃይሾ ሃሢ ኑ ሃኖ ዎዛሮ ጊኢጊሺንቴ ሙኡዚ ኬሊዳ ኑ ሙኬኔ፤ ኑና ኔ ቦንቺ ዔካንዳጉዲ ዳውቴ ኔና ሺኢቄሢሮ ኑና ኔኤኮ ዓይሎንሢና ኔ ላጋሢ ዳውቴናሮ ጌይ ኔኤም ዳንዳዒንቴ ጎይፆ ኑም ኮይሳ ባኣዚ ዒንጌቴራ።»

9 ዳውቴ ዳኬ ዓሶንሢ ዬያ ኪኢቶ ዳውቴ ሱንፆና ናኣባኣሌም ኬኤዛዖ፥ ዒ ጋዓ ባኮ ዋይዛኒ ካፔኔ፤ 10 ጋዓንቴ ናኣባኣሌ፦ «ሂንዳ ዎዚ ዎዚ! ዳውታሢ ዖናዳይ? ዒሴዬ ናኣዚ ዖናይዳ? ታ ዒዛ ዛላ ዋይዚያ ቤቂባኣሴ! ሃሢ ሃይ ዓጫ ፔ ጎዳንሢዳፓ ቤቲ ቤቲ ሙኬ ካራሚና ኩሜያኬ! 11 ታኣኮ ካሦንታ ዋኣፆንታ፤ ዬያጉዲ ሃሣ ታኣኮ ማራቶ ጋፓኖ ታይዛ ዓሶም ታ ሹኬ ቆልሞ ዓሽኮ ዓንካፓ ሙኬቴያ ታ ዔሩዋ ዓሲም ዓይጌ ታና ዒንጊሳይ?» ጌዔኔ።

12 ዬካፓ ኪኢቶ ዓሶንሢ ማዒ ሙኪ ናኣባኣሌ ጌዔ ባኮ ዳውቴም ኬኤዜኔ፤ 13 ዬያሮ ዳውቴ፦ «ጬንቾ ዓፓሮ ዒንሢኮ ቱኩዋቴ!» ጌዒ ዒዛኮ ዓሶ ዓይሣዛ፥ ዔያታ ዓይሢንቴ ጎይፆ ማዼኔ፤ ዳውቴያ ፔኤኮ ጬንቾ ዓፓሮ ቱኡቴኔ፤ ዬካፓ ዔያቶኮ ዓኣ ባኮ ካፓንዳ ላምዖ ፄኤታ ዓሲ ሃሺ ዖይዶ ፄኤታ ዓሲ ዔካዖ ዓኣዻኒ ዔቄኔ። 14 ዒማና ናኣባኣሌኮ ማዾ ማዻ ዓሶይዳፓ ፔቴይ ዒዛኮ ማቾ፥ ዓቢጋይሎ ኮይላ፦ «ሃያ ሃይሶ ኔ ዋይዚያ? ዳውቴ ዒዚ ዓኣ፥ ዓሲ ናንጉዋ ዳውሎይዳፓ ኪኢታ ዓሲ ሳራሥሢና ዎላ ኑ ጎዳሢም ዳኬኔ፤ ጋዓንቴ ዒዚ ዔያቶ ጫሽኪ ቶኦኪ ባይዜኔ፤ 15 ዬና ዓሳ ኑም ኮሺ ማዾ ማዼ ዓሲታንቴኬ፤ ኑጊዳ ፔቴታዖ ሜቶ ዔያታ ማዢባኣሴ፤ ዔያቶና ዎላ ኑ ሞኦፃ ናንጌ ዎዶና ኑኡኮ ቆልሞይዳፓ ፔቴታዖ ዉሲ ዉኡቂባኣሴ፤ 16 ቆልሞ ኑ ዎላ ሄንቂ ናንጌ ዎዶይዳ ሮኦሮንታ ዋንቶንታ ዔያታ ኑኡኮ ዋርዲያ ማዒ ቃዜኔ። 17 ሃሢ ሃዳራ ዬያ ባኮ ማሊጋፓ ኔ ማዻኒ ኮይሳ ባኮ ጊኢጊሼ፤ ያዺ ማዒባኣያታቴ ኑ ጎዳሢና ዒዛኮ ማኣሮና ኩርሳኒ ማሎናኔ፤ ኔ ዔራሢጉዲ ኑ ጎዳሢ ዓሲ ጋዓ ባኣዚ ዋይዙዋያኬ!» ጌዔኔ።

18 ዬያሮ ዓቢጋይላ ዑኬና ላምዖ ፄኤታ ካሣ፥ ዎይኔ ዑሺ ላምዖ ሱርባና ኩንሢ፥ ዶንጎ ማራይ ዓሽኪ ሚቺ፥ ታጶ ላንካይ ኪሎ ማዓንዳ ሻኣቆና ቲሾ፥ ፄኤታ ሶዬ ዎይኔና ላምዖ ፄኤታ ቤሌሴ ሚፆ ዓኣፖ ዺንቆናያና፤ ዬያ ቢያ ሃሬና ጫኣኔኔ። 19 ዬካፓ ዓይሎ፦ «ቤርታ ቢሩዋቴ፤ ታ ጊንፆ ሙኬኔ» ጌይ ዳኬኔ፤ ዒዛ ፔኤኮ ዓኒም ጋዓንቴ ዬያ ኬኤዚባኣሴ።

20 ዒዛ ሃሬ ቶጊ ጌሜሮ ዴማ ዓኣ፥ ሺሪ ሺሪ ዴንዳ ጎይፆና ኬዳንቴ ዳውቴ ፔ ዓሶና ዒዛ ዔሪባኣንቴ ዒዞና ካኣሜኔ፤ 21 ዳውቴ ዒዞና ካኣማንዳሢኮ ቤርታ ፔ ዒኖና፦ «ዬያ ዓሢኮ ቆላ ፔቴታዖ ባይቁዋጉዲ ዓሲ ናንጉዋ ቦኦሎይዳ ጉሪ ታ ካፒ ላቤኔ ጌይሢኬ፤ ታ ዒዛም ኮዦ ማዼሢ ዛሎ ዒ ፑርታ ማዺ ማሂባይ! 22 ሃኖ ሳዓ ካሩዋንቴ ዒዛሮ ማዔ ዓቲንቆ ቢያ ታኣኒ ዎዺ ጋፒሲባኣቴ ፆኦሲ ታና ባይዞም!» ጌይ ማሌኔ።

23 ዒማና ዓቢጋይላ ዳውቴ ዴንቃዖ ዑኬና ሃሮ ዑፃፓ ኬዲ ዳውቴኮ ቶኮ ዴማ ሎኦሚ ቦንቾ ዔኤሊሢ ዔኤሌኔ፤ 24 ዒዛ ሎኦሜ ቤዛ ዓኣዖ፦ «ታ ጎዳሢዮ! ሃዳራ ታኣኒ ኔ ዓይሌላ ጋዓ ባኮ ዋይዜ! ዬይ ዻቢንታ ታ ዑፃ ማዖንጎ፤ 25 ናኣባኣሌ *25፡25 ናኣባኣሌ ጌይፃ፦ ዔብሬ ዓሶ ሙኡጮና «ዔኤያ» ጌይሢኬ። ባኮ ዔኤቢኬ ጌይፖ! ዒዚ ዒዛኮ ሱንፆ ጎይፆ ዔኤያኬ! ታ ጎዳ፥ ኔኤኮ ዓይላ ኑ ማኣሪ ሙካኣና ታኣኒ ባኣሴ፤ 26 ኔ ሞርኮ ኮሚ ኔ ዎዹዋጉዲ ኔና ላኣጊ ቃዜሢ ናንጊና ናንጋ ጎዳኬ፤ ሃሢ ታ ኔኤም ናንጊና ናንጋ ጎዳሢ ሱንፆና ጫኣቃኔ፤ ኔ ሞርኮንታ ኔና ዎዻኒ ኮዓ ዓሲ ቢያ ናኣባኣሌጉዲ ዔያቶ ኮይሳ ሜቶ ዔኮንጎ፤ 27 ታ ጎዳ! ሃዳራ ሃያ ኔ ዓይሌላ፥ ታኣኒ ኔኤም ዒንጋኒ ዔኪ ሙኬ ባኮ ዔኪ ኔ ዓሶም ዒንጌ። 28 ኔኤኒ ናንጊና ናንጋ ጎዳኮ ዖሎ ዖልታሢሮ ዒዚ ኔኤና ኔ ዜርፆናኮ ካኣቱሞ ጋፑዋያ ማሃንዳኔ፤ ዬያሮ ታ ጎዳ፥ ታኣኒ ዻቤ ዻቢንቶ ታም ዓቶንጎ ጌዔ፤ ኔኤኒ ናንጋ ዎዶ ቢያይዳ ዓይጎዋ ፑርታ ባኣዚ ማዻያ ማዒፖ። 29 ዓይጎ ዓሲያ ማዖም ኔና ዖሊ ዎዻኒ ኮዔቴ ፔቴ ዓሲ ፔኤኮ ዒ ሚጪንታ ባኣዚ ካፓሢጉዲ ናንጊና ናንጋ ጎዳ ማዔ ኔኤኮ ፆኦዛሢ ኮሺ ኔና ካፓንዳኔ፤ ኔኤኮ ሞርኮ ጋዓንቴ ፔቴ ዓሲ ሹቺ ዎሪ ዳካሢጉዲ ዒዚ ፔኤሮ ዎሪ ዳካንዳኔ። 30 ናንጊና ናንጋ ጎዳ ኔኤም ሃጊ ማዓንዳ ዎዞ ዒንጌ ጎይፆ ኮሺ ማዔ ባኣዚ ቢያ ኔኤም ማዺ ዒስራዔኤሌይዳኣ ኔና ዒ ካኣታሴ ዎዶና፥ 31 ፔቴታዖ ኔ ማሊ ሜታዻንዳ ባኣዚ ባኣሴ። ዎይቲ ጌዔቴ ታ ጎዳ! ኔኤኒ ካራ ባኣ ጎይሢና ጊንሣ ሃሣ ኮሜ ዔካኒ ጌይ ኔ ዎዼ ዓሲ ባኣሴ፤ ዬያሮ ታ ጎዳሦ! ናንጊና ናንጋ ጎዳ ኔና ዓንጄ ዎዶና ታና ዋሊፖ» ጌዔኔ።

32 ዒማና ዳውቴ ዒዞም፦ «ታኣና ኔ ካኣማንዳጉዲ ኔና ታ ባንሢ ዳኬ ናንጊና ናንጋ ጎዳ ማዔ ዒስራዔኤሌ ፆኦዛሢ ጋላቲንቶንጎ! 33 ሃኖ ታኣኒ ዓሲ ዎዹዋጉዲ፤ ሃሣ ኮሜያ ታ ዔኩዋጉዲ ኔ ማሌ ኮዦ ማሊፆሮ ኔኤኒ ዓንጂንቴያ ማዔ። 34 ታ ኔና ዎዹዋጉዲ ናንጊና ናንጋ ጎዳ ታና ቃዜኔ፤ ኔ ዎንዴ ዑኬና ሙኪባኣያታቴ ናኣባኣሌኮ ዓቲንቆ ፔቴታዖ ዓይሱዋዖ ሳዓ ካራንዳሢኮ ቤርታ ቢያሢ ታኣኒ ዎዻኒ ናንጊና ናንጋ ጎዳ ማዔ ዒስራዔኤሌ ፆኦዛሢ ሱንፆና ጫኣቄንቴኬ» ጌዔኔ። 35 ዒማና ዳውቴ ዓቢጋይላ ዒዛም ዔኪ ሙኬ ባኮ ዔካዖ፦ «ኔ ማኣሪ ኮሺ ዓኣዼ፤ ኔ ታና ሺኢቄሢ ታ ዋይዜኔ፤ ኔ ጌዔ ባኮ ቢያ ታ ማዻንዳኔ» ጌዔኔ።

36 ዬካፓ ዓቢጋይላ ካኣቲ ማርካ ጊኢጊሾና ሙኡዚጉዲ ሙዖ ጊኢጊሺ ሙይፆይዳ ዓኣ፥ ናኣባኣሌ ኮይላ ማዒ ዴንዴኔ፤ ዒዚ ዒማና ዑሽኪ ማሢንቲ ኮሺ ዎዛዺ ዓኣሢሮ ሳዓ ካራንዳያ ሄላንዳኣና ፔቴታዖ ዒዛም ዒዛ ዬያ ባኮ ኬኤዚባኣሴ፤ 37 ዚሮ ጉቴ ማሢፃ ዒዛኮ ዓኣፓፓ ዓኣዻዛ ቢያ ባኮ ዒዛም ዒዛ ኬኤዜኔ፤ ዬያሮ ዒዚ ዒኔ ዱጲ ዲቃቴሢሮ ሃይቄ ሌሲጉዲ ማዔኔ። 38 ናንጊና ናንጋ ጎዳ ዒዛይዳ ፑርታ ሃርጌ ዓጌሢሮ ታጶ ኬሊኮ ጎንፃፓ ዒዚ ሃይቄኔ።

39 ዳውቴ ናኣባኣሌ ሃይቄሢ ዋይዛዖ፦ «ታና ዒ ጫሽኬሢሮ ናንጊና ናንጋ ጎዳ ናኣባኣሌ ዎዺ ኮሜ ዔኪ፥ ሃሣ ታናኣ ዻቢንቲዳፓ ካፔሢሮ ናንጊና ናንጋ ጎዳሢ ጋላቲንቶም፤ ናኣባኣሌኮ ፑርቶ ማዾሮ ዒዚ ዒዛ ዎዼኔ» ጌዔኔ።

ዬካፓ ዳውቴ ዓቢጋይሎም ኪኢታ ዓሲ ዳኪ ዔካኒ ዒዞ ኮዔሢ ኬኤዜኔ። 40 ዳውቴኮ ዓይላ ዒዛ ዓኣ፥ ቄርሜሎሴ ዴንዳዖ፦ «ዳውቴ ኔና ዔካኒ ኮዓሢሮ ኔና ዔኪ ዴንዳኒ ኑ ሙኬኔ» ጌዔኔ።

41 ዓቢጋይላ ዒማና ሳዖ ባንሢ ሂርኪ ጌይ ቦንቾ ዔኤሊሢ ዔያቶ ዔኤላዖ፦ «ታ ዒዛም ማዻ ዓይሌኬ፤ ዒዛኮ ማዾ ማዻ ዓሶኮዋ ቶኮ ማስካኒ ታ ዔኤዓኔ» ጌዔኔ። 42 ዬካፓ ዒዛ ዑኬና ዔቂ ፔኤኮ ሃሮ ቶጊ ዒዞኮ ዓይሌ ማዒ ማዻ ዶንጎ ላኣሊያ ፔኤና ዎላ ዔኪ ዳውቴኮ ዓይሎና ዎላ ዴንዲ ዳውቴም ሎዔኔ።

43 ዳውቴ ዬያኮ ቤርታ ዓሂኖዓሞ ዔኪ ዓኣኔ፤ ዒዛ ዒይዚራዔኤሌ ካታማ ሾይንቴያኬ። ዬካፓ ሃሣ ላምዓሲ ላኣሊ ማሂ ዓቢጋይሎ ዔኬኔ፤ 44 ሳኣዖኦሌ ዒዛ ናዎ፥ ዳውቴኮ ማቾ፥ ሜልኮኦሎ ጋሊሜ ካታማ ሾይንቴ ላዊሼ ናኣዚ ፓሊፄም ዒንጊናኣኮኬ። ✝25፡44 2ሳሙ. 3፡14-26።