1 ፆኦሲ ዼግ ዼጊዴሢ፥ ያይቆኦቤ ፆኦዛሢ ዶኦሬሢ፥ ዒስራዔኤሌይዳ ቃራ ዓይኑሞ ዓይናዻያ ማዔሢ፥ ዒሴዬ ናኣዚ፥ ዳውቴ ጋፒንፃ ጌስቴ ባካ ያዺኬ፦

2 ናንጊና ናንጋ ጎዳኮ ዓያና ታኣና ማዒ ኬኤዛኔ፤

ዒዛኮ ቃኣላ ታ ዻንጋኬ።

3 ዒስራዔኤሌ ፆኦዛሢ ዬያ ኬኤዜኔ፤

ዒስራዔኤሌ ካፓሢ ሂዚ ታኣም ጌዔኔ፤

«ፆኦሲ ዒጊጪ

ፒዜ ዎይሥሢ ዎይሣ ካኣቲ፤

4 ዒዚ ሻኣሬ ባኣያ ሳዓ ካራዛ ፖዓ ፖዒጉዲኬ፤

ሳዖይዳ ማኣቶ ባቃልሳ

ጉቴና ፆርቃ ዓቢጉዲኬ። »

5 ቢያ ባኣዚና ጊኢጌያ ሃሣ ጉሙርሳያ ዒ ማዔሢሮ

ናንጊና ናንጋ ጫኣቁሞ ዒ ታኣና ዎላ ጫኣቄሢሮ

ጎኔና ታኣኮ ማኣራ ፆኦሲም ጉሙርቂንታያቱዋዓዳ?

ታና ዒ ማኣዲ ሃሣ ታ ኮዓ ባኮዋ ቢያ ዒ ኩንሣያቱዋዓዳ?

6 ፑርቶ ዓሳ ጋዓንቴ ኬኤሪንቴ ዓንጊሢጉዲኬ፤

ዓይጎ ዓሲያ ኩቻ ዔያቶ ካኣማኒ ዳንዳዑዋያኬ።

7 ዬያቶ ቡኡራኒ ኬላኬቺ ኮይሳያኬ፤

ያዺ ማዔቴ ዔያታ ጋፒ ሚቺንታንዳኔ።

8 ዳውቴኮ ዖሎና ዔርቴ ፖኦሊሶ ሱንፃ ሃካፓ ሊካ ፓይዲንታ ዓሶኬ፤ ቤርታሳሢ፦ ታህኪሞኔይዳ ሾይንቴ፥ ዮሼብባሼቤቴ ጌይንታስኬያ ማዓዛ ዒዚ ዖሎና ዔርቴ ሃይሦ ፖኦሊሶኮ ሱኡጌኬ፤ ዬይ ዓሢ ፔቴ ዖልዚና ፔኤኮ ዎርፆ ዔኪ ዴንዲ ዔርቴ፥ ሳሊ ፄኤታ ዓሲ ዎዼኔ።

9 ላምዓሳሢ፦ ዓሆሄ ቶኦኪ ማዔያ፥ ዖሎና ዔርቴያ፥ ዶዶ ናኣዚ፥ ዓላዜሬኬ፤ ፔቴ ኬሊ ዒዛና ዳውቴና ዖሎ ዖላኒ ኬስኬ ፒሊስፄኤሜ ዓሶ ቃዚ ሜታሴኔ፤ ዒስራዔኤሌ ዓሳ ዒማና ጊንሢም ዶጬኔ፤ 10 ዬይ ዓሢ ጋዓንቴ ዓኣ ቤዛ ዶዲ ዔቂ ኩጫ ዒዛኮ ዶጪ ጬንቾ ዓፓሮ ዓርቂ ዚቲዮ ጋዓንዳያ ሄላንዳኣና ፒሊስፄኤሜ ዓሶ ዖሌኔ፤ ዬኖ ኬሎ ናንጊና ናንጋ ጎዳ ዼኤፒ ባሺሢ ዔያቶም ዒንጌኔ፤ ዖላ ጋፔስካፓ ዒስራዔኤሌ ዓሳ ዓላዜሬ ዓኣ ቤዞ ሙኪ ሃይቄ፥ ፒሊስፄኤሜ ዓሶፓ ሚርጌ ዖልዚ ዓንጋሞንታ ማኣዖንታ ዔኬኔ።

11 ሃይሣሳሢ ሃሣ፦ ሃራሬይዳ ሾይንቴያ፥ ዖልዚና ዔርቴያ፥ ዓጌ ናኣዚ፥ ሻማኬ፤ ፔቴ ኬሊ ፒሊስፄኤሜ ዓሳ ሪንጎ ጎሺ ዓኣ፥ ሌሂ ጌይንታ ቤዛ ዖሎሮ ሙኪ ዓኣንቴ ዒስራዔኤሌ ዓሳ ፒሊስፄኤሜ ዓሶ ቤርታፓ ጳሽኪ ፑኔኔ፤ 12 ሻማ ጋዓንቴ ዬኖ ጎዦ ጋራ ጫርቂ ዔቄኔ፤ ዒዚ ዒማና ፒሊስፄኤሜ ዓሶ ዖሊ ዎዼኔ፤ ዬኖ ኬሎዋ ናንጊና ናንጋ ጎዳ ዼኤፒ ባሺሢ ባሼኔ።

13 ሃኣኮ ጮኦሮ ዎዶና ፒሊስፄኤሜኮ ዖሎ ዓሳ ራፓይሜይዳ ዱንኪ ዴዒ ዓኣንቴ ሃይሢታሞ ዖሎና ዔርቴ ዓሶፓ ዬንሢ ሃይሦንሢ ዳውቴ ኮራ ዓዱላሜ ሙኬኔ። 14 ዳውቴ ዒማና ዋርዲ ጊኢጊሾና ጎኦቢዳ ዓኣኔ፤ ፒሊስፄኤሜ ዓሶ ፖኦሊሶፓ ፔቴይዳ ፓቆና ፖኦሊሴ ሙኪ ቤኤቴሌሄሜ ዓርቄኔ፤ 15 ዳውቴ ዒማና ዓጮ ጶቂሣዖ፦ «ኬልቂ ዲርቆና ቤኤቴሌሄሜ ካታሞ ጌሎ ካሮ ኮይላ ዓኣ ዔቶ ዋኣፃፓ ታ ዑሽካንዳ ዋኣሢ ዓይጌ ታኣም ዔኪ ሙካንዳይ!» ጌዔኔ። 16 ዬያሮ ዬንሢ ዖሎና ዔርቴ ሃይሦ ፖኦሊሶንሢ ፒሊስፄኤሜ ዓሳ ዱንኪ ዴዔ ቤዞ ጊዴና ጫርቂ ዴንዲ ዋኣፆ ዔቴሎፓ ዱይ ዳውቴም ዔኪ ሙኬኔ፤ ዳውቴ ጋዓንቴ ዑሽካኒ ኮይባኣሴ፤ ዬያይዶንዶሢ ሃሺ ናንጊና ናንጋ ጎዳም ዒንጎ ባኣዚ ማሂ ሳዓ ላኣሌስካፓ፥ 17 «ናንጊና ናንጋ ጎዳሢዮ! ሃያ ዋኣፆ ታ ፔቴታዖ ዑሽካዓኬ! ታኣኒ ዑሽኬቴ ሃይቢሮ ዒጊጩዋዖ ዴንዴ ዬንሢ ዓሶንሢኮ ሱጉፆ ታ ዑሽካያ ማዓኔ!» ጋዓዖ፥ ዋኣፆ ዑዦ ዒፄኔ።

ዖሎና ዔርቴያ ማዔ ሃይሦ ጫርዦ ፖኦሊሶንሢ ማዼ ሄርሺሳ ማዻ ዬያኬ።

18 ፂሩያ ናኣዚ፥ ዒዮዓቤኮ ጌርሲ ዓቢሻዬ ዖሎና ዔርቴ ሃይሦ ፖኦሊሶንሢኮ ሱኡጌኬ፤ ዒዚ ፔኤኮ ዎርፆ ዔኪ ሃይሦ ፄኤታ ዓሲና ዖልቲ ዬያቶ ቢያ ዎዼኔ፤ ዬያሮ ዒዚያ ሃይሦንሢጉዲ ዖልዚና ዔርቴ ዓሲ ማዔኔ። 19 ዒዚ ዬያቶ ሃይሣሢፓ ዑሣ ዓኣዼ ዖሎና ዔርቴ ዓሲ ማዔሢሮ ዔያቶኮ ሱኡጌ ማዔኔ፤ ጋዓንቴ ዒዚ ዖሎና ዔርቴ ሃይሦ ዓሶንሢጉዲ ማዓያቱዋሴ።

20 ሜሌ ሃሣ ዖሎና ዔርቴ ፖኦሊሴ፦ ቃብፂዔሌይዳ ሾይንቴያ፥ ዮዳሄ ናኣዚ፥ ቤናያኬ፤ ዒዚ ላምዖ ዔርቴ ሞዓኣቤ ዓሲ ፖኦሊሴ ዎዼኔ። ጊንሣ ሃሣ ሚርጌ ሄርሺሳ ማዾ ማዼያኬ፤ ፔቴ ኬሊ ሻቺ ዋርቄ ኬሊስኬኖ ፔቴ ዴኔ ባኣካ ጌሊ ዞቢ ዎዼኔ፤ 21 ዬያጉዲ ሃሣ ዒዚ ዎርሢ ዔኪ ዓኣ፥ ፔቴ ዖልዚና ዔርቴ ጊብፄ ዓሲስኬያ ዎዼኔ፤ ዒዚ ዒማና ኮኦሎፓዓቴም ኩጫ ሜሌ ዓንጋሞ ባኣንቴ ጊብፄ ዓጮ ዓሢ ባንሢ ሙኪ ዎርፆ ኩጫፓ ሳሪ ዔኪ ዬያና ጫርጊ ዎዼኔ። 22 ዖሎና ዔርቴ ሃይሦ ዓሶንሢጉዲ ማዔሢ፥ ቤናያ ማዼ ሄርሺሳ ማዻ ያኣዼኬ። 23 ዒዚ ሃይሢታሞ ዓሶ ባኣካ ኮሺ ዔርቴያ ማዔቴያ ዖሎና ዔርቴያ ማዒፆና ሃይሦ ዓሶ ሄሉዋሴ፤ ዳውቴ ፔና ካፓ ዓሶኮ ዒዛ ሱኡጌ ማሂ ዶኦሬኔ።

24-39 ሃይሢታሞ ዓሶ ባኣካፓ ዛሎ ዓሶኮ ሱንፃ ሃካፓ ሊካ ፓይዲንታኔ፦

ዒዮዓቤኮ ጌርሲ ዓሳሄሌ፤

ቤኤቴሌሄሜይዳ ሾይንቴ፥ ዶዶ ናኣዚ ዓልሃናኔ፤

ሃሮዴይዳ ሾይንቴ፥ ሻማንታ ዔልቃንታ፤

ፔሌፄይዳ ሾይንቴ፥ ሄሌፄ፤

ቴቆዓይዳ ሾይንቴ፥ ዒቄሼ ናኣዚ ዒራ፤

ዓናቶቴይዳ ሾይንቴ፥ ዓቢዔዜሬ፤

ሁሻዬይዳ ሾይንቴ፥ ሜቡናዬ፤

ዓሆሌይዳ ሾይንቴ፥ ፃልሞኔ፤

ኔፆፓይዳ ሾይንቴ፥ ማሂራዬ፤

ሃሣ ኔፆፓይዳ ሾይንቴ፥ ባዔ ናኣዚ ሄሌቤ፤

ቢኢኒያሜ ዓጮ ጋራ ዓኣ ጊቢዓይዳ ሾይንቴ፥ ሪባዬ ናኣዚ፥ ዒታዬ፤

ፒርዓቶኔይዳ ሾይንቴ፥ ቤናያ፤

ጋዓሼ ዶኦጮ ኮይላ ሾይንቴ፥ ሂዳዬ፤

ዓርባዓይዳ ሾይንቴ፥ ዓቢዓልቦኔ፤

ባርሁሜይዳ ሾይንቴ፥ ዓዝማዌቴ፤

ሻዓልቦኔይዳ ሾይንቴ፥ ዔልያሂባ፤

ያሼኔ ናኣታ፤

ዮናቲኔ፤

ሃራሬይዳ ሾይንቴ፥ ሻማ፤

ጊንሣ ሃሣ ሃራሬይዳ ሾይንቴ፥ ሻራሬ ናኣዚ፥ ዓሂዓሜ፤

ማዕካይዳ ሾይንቴ፥ ዓሃሴባዬ ናኣዚ፥ ዔሊፔሌፄ፤

ጊሎይዳ ሾይንቴ፥ ዓኪፆፔሌ ናኣዚ፥ ዓልዓሜ፤

ቄርሜሎሴይዳ ሾይንቴ፥ ሄፅሮ፤

ዓሬቤይዳ ሾይንቴ፥ ፓዓራዬ፤

ፆባ ናኣዚ ናኣታኣኔኮ ናኣዚ፥ ዪግዓሌ፤

ጋኣዴይዳ ሾይንቴ፥ ባኒ፤

ዓሞኦኔይዳ ሾይንቴ፥ ፄሌቄ፤

ዒዮዓቤኮ ዖሎ ዓንጋሞ ኬዳ፥ ቤዔሮቴይዳ ሾይንቴ፥ ናህራዬ፤

ያቲሬይዳ ሾይንቴ፥ ዒራንታ ጋሬቤንታ፤

ሂታ ዓሢ ዖሪዮንታኬ።

ዳውቴኮ ዖሎና ዔርቴ ፖሊሶኮ ሚርጉማ ዎሊ ዑፃ ሃይሢታሚ ላንካይኬ።