Apocalipse 19

1 ዬካፓ ሚርጌ ዓሲ ዑኡሲ ማላ፥ ዼኤፒ ዑኡሲ ጫሪንጮይዳ፦

«ፆኦሲም ጋላታ!

ዻቂሺሢና ቦንቾና ሃሣ ዎልቄያ ኑ ፆኦዛሢሮ ማዔኔ፤

2 ዒዚ ዎጋ ዎጊፃ ጎኔ፤ ሃሣ ፒዜኬ።

ዞኦዛ ኮኦሚፆና ሳዖ ዒኢሴ

ዞኦዛ ኮኦማ ዼኤፔሎ ፑርታና ዒ ዎጌኔ፤

ዒዞ ፑርታና ዎጊፆና

ዒዛም ማዻ ዓሶኮ ሱጉፆ ማሄኔ፤ ✝19፡2 ላሚ. ዎማ 32፡43፤ 2ካኣቶ. ማ 9፡7።

3 ላሚ ሃሣ

ፆኦሲም ጋላታ! ዒዞይዳፓ ጩባ ናንጊና ጩቢ ጩቢ ኬስካኔ»

ጋዓ ዑኡሲ ታ ዋይዜኔ። ✝19፡3 ዒሲ. 34፡10።

4 ዒማና ላማታሚ ዖይዶ ጋርቾንሢና ዖይዶ ባኮንሢ ካኣቱሞ ዖይታ ዴዒ ዓኣ፥ ፆኦዛሢም ባሊቶና ሳዖ ባንሢ ሂርኪ ጌይ፦

«ዓኣሜን፤ ፆኦሲም ጋላታ!» ጌዒ ጌዒ ዚጌኔ።

ማራዓሢኮ ዔፖ ሙዖ

5 ዬካፓ፦

«ዒዛ ዒጊጪ፥ ዒዛም ማዻ

ዻኮንታ ዼኤፖንታ ቢያ

ኑ ፆኦዛሢ ጋላቱዋቴ!»

ጋዓ ዑኡሲ ካኣቱሞ ዖይታ ዓኣ ቤዛፓ ዋይዚንቴኔ። ✝19፡5 ዓይኑ. 115፡13።

6 ሃሣ ጊንሣ ሚርጌ ዓሲ ዑኡሲ፥ ዼኤፒ ዎታ ዎርዚ ዋኣሢና ዼኤፒ ጉጉንሢ ዑኡሲ ማላ ዑኡሲ፦

«ቢያ ባኣዚ ዳንዳዓ ጎዳ ማዔ ፆኦዛሢ

ካኣታዼሢሮ ጋላቱዋቴ! ✝19፡6 ሂዚ. 1፡24፤ ዓይኑ. 93፡1፤ 97፡1፤ 99፡1።

7 ማራዓሢኮ ዔፓ ሄሌሢሮ

ዒዛኮ ዑኡቴላ ጊኢጊንቴሢሮ

ዎዛ ኑም ማዖንጎ፥ ኑ ዎዛዾም፤

ቦንቺያ ዒዛ ኑ ቦንቾም።

8 ዓኣፒዳ ዱካያ፥ ጌኤሺ ማዔ

ሻኣዣ ዓፒላ ማይንታንዳጉዲ ዒዞም ዒንጊንቴኔ፤

ዬይ ቦኦሬ ሻኣዦ ዓፒላ ፆኦሲም ዱማዼ ዓሶኮ

ፂሉሞ ማዾኬ» ጋዓንቴ ታ ዋይዜኔ።

9 ኪኢታንቻሢ ሃሣ፦ « ‹ማራዓሢኮ ዔፖ ሙዖም ዔኤሊንቴ ዓሳ ባሊቲና ዓኣያኬ› ጌይ ፃኣፔ» ታኣም ጌዔኔ፤ ሄሊሳዖ ሃሣ፦ «ሃይ ፆኦሲኮ ጎኔ ቃኣላኬ» ጌዔኔ። ✝19፡9 ማቲ. 22፡2-3።

10 ታኣኒ ዬያ ኪኢታንቻሢም ዚጋኒ ዒዛ ቶኮ ዴማ ባሊቶና ሂርኪ ጋዓዛ፥ ዒዚ ጋዓንቴ፦ «ሃሼ! ሃያይዲፖ! ታኣኒያ ኔናንታ ዬሱሴ ዛሎ ማርካዻ ዒሾንሢንታ ዎላ ማማዻያኬ፤ ፆኦሲም ዚጌ።

«ዬሱሴ ፔጋሲ ዻዌ ጎኑማ ፆኦሲ ማሊፆ ኬኤዛ ዓሶ ዻንጎና ኬኤዛ ዓያኖኬ» ጌዔኔ።

ቦኦሬ ፓራሢ ቶጊ ዓኣ ዓሢ

11 ዬካፓ ጫሪንጫ ቡሊንቴም፥ ዒኢካ ቦኦሬ ፓሮ ታ ዴንቄኔ፤ ፓራሢ ቶጌሢ፦ «ጉሙርቂንታያ ሃሣ ጎኔ ዓሲ» ጌይንታያኬ፤ ዒዚ ፂሉሞና ዎጋያ ሃሣ ዖልታያኬ። ✝19፡11 ሂዚ. 1፡1፤ ዓይኑ. 96፡13፤ ዒሲ. 11፡4። 12 ዓኣፓ ዒዛኮ ዔኤታ ታሚ ማላኔ፤ ሃሣ ዒዛኮ ቶኦኮይዳ ቦንቾሮ ዓጎ ባካ ሚርጌ ዓጊንቲ ዓኣኔ፤ ዒዛይዳፓ ዓታዛ ሜሌ ዖኦኒያ ዔሩዋያ፥ ፃኣፒንቴ ሱንሢ ዒዛይዳ ዓኣኔ፤ ✝19፡12 ዳኣኔ. 10፡6። 13 ዒዚ ሱጉሢ ሄሊ ፑርቲሴ ማኣዖ ማይንቲ ዓኣኔ፤ ዒዛኮ ሱንፃ «ፆኦሲ ቃኣላ» ጌይንታያኬ። 14 ዒማና ቦኦሬ ፓሮ ቶጌ፥ ቦኦሬ ጌኤሺ ዓፒላ ማይንቴ፥ ጫሪንጫ ዓኣ ዖሎ ዓሳ ዒዛ ጊንፆ ዓኣዻኔ፤ 15 ሜሌ ዴሮ ዖሊ ባሻንዳ ዓጬ፥ ጬንቻ ዓፓሮ ዒዛኮ ዻንጋፓ ኬስኬኔ፤ ዒዚ ሚጪንቱዋዖ ሄርቂ ዔያቶ ዎይሣንዳኔ፤ ሃሣ ዒዚ ቢያ ባኣዚ ዳንዳዓ ፆኦዛሢኮ ዼኤፖ ዻጎና ዎይኖ ሄርቂ ጩኡጶ ቤዛ ዎይኖ ሄርቃንዳኔ፤ ✝19፡15 ዓይኑ. 2፡9፤ ዒሲ. 63፡3፤ ዒዮ. 3፡13፤ ዮሃ. ፆፔዻ 14፡20። 16 ዒዛኮ ማኣዓሢና ጉባዞናይዳ፦ «ካኣቶኮ ካኣቲ፥ ጎዳቶኮ ጎዳ» ጋዓ ሱንሢ ፃኣፒንቲ ዓኣኔ።

17 ዬካፓ ሃሣ ፔቴ ፆኦሲኮ ኪኢታንቻ ዓቦ ዑፃ ዔቂ ዓኣንቴ ታ ዛጌኔ፤ ዒዚ ጫሪንጮይዳ ባራና ካፖም ዼኤፒ ዑኡሲና፦ «ፆኦሲ ጊኢጊሼ፥ ዼኤፖ ሙዖ ሙዓኒ ቡኪንቱዋቴ፤ 18 ዒንሢ ቡኪንታሢ ካኣቶ ዓሽኮ፥ ፖኦሊሶ ዓይሣ ዓሶ ዓሽኮ፥ ዖሎ ዖላ ዶዶ ዓሶ ዓሽኮ፥ ፓራሢ ቶጊ ዖላ ዓሶና ፓራሢና ዓሽኮ፥ ዎይሣ ዓሶና ዴማ ማዒ ዎርቃ ዓሶናኮ ዓሽኮ፥ ዻኮ ዓሶና ዼኤፖ ዓሶና ዓሽኮ፤ ዬያጉዲ ዓሲ ቢያኮ ዓሽኮ ሙዓኒኬ» ጌይ ዒላቴኔ። ✝19፡18 ሂዚ. 39፡17-20።

19 ሃሣ ቦዓሢንታ ሳዖ ካኣቶንታ ፔኤኮ ዖላ ዓሶና ዎላ ቦኦሬ ፓራሢ ቶጌሢና ዒዛኮ ዖላ ዓሶና ዖልታኒ ቡኪንቲ ዓኣንቴ ታ ዛጌኔ፤ 20 ጋዓንቴ ቦዓሢ ዓዺንቴኔ፤ ሃሣ ዒዛና ዎላ ዒዛ ቤርታ ዱማ ዱማ ዓኪ ባኣዚ ማዻ፥ ሉኡዙሞና ፆኦሲ ማሊፆ ኬኤዛሢያ ዓዺንቴኔ፤ ዒዚ ቦዓሢ ማላቶ ዔኪ ዓኣዞንሢና ዬያም ዚጋዞንሢ ዱማ ዱማ ዓኪ ባኣዚ ማዺ ዻዊሢና ዻቢሻኔ፤ ዒማና ዬንሢ ላምዖንሢ ሼምፔና ዓኣ ጎይሣ ዓኣንቴ ዔኤታ ታሞ ባዞይዳ ዓጊንቴኔ። ✝19፡20 ዮሃ. ፆፔዻ 13፡1-18። 21 ዓቴዞንሢ ሃሣ ቦኦሬ ፓራሢ ቶጌ ዓሢኮ ዻንጋፓ ኬስካ፥ ጬንቾ ዓፓራ ዎዼኔ፤ ዒማና ካፓ ቢያ ዓሽኮ ዔያቶኮ ሙይ ሚሽኬኔ።