ዮሃኒሴም ፆኦሲ ዻዌ ባኮ 7

144000 ዒስራዔኤሌ ዓሶ

1 ዬካፓ ዖይዶ ኪኢታንቻ ዓጮኮ ዖይዶ ዛሎና ዔቂ ዓኣንቴ ታ ዴንቄኔ፤ ዔያታ ሳዖይዳ ማዖም ባዞይዳ ሃሣ ሚፆይዳ ዓይጎ ዢባሬያ ዢባርሹዋጉዲ ዓጮኮ ዖይዶ ዛላፓ ሙካ ዢባሮ ቢያ ላኣጊ ዓርቄኔ። ✝7፡1 ዔር. 49፡36፤ ዳኣኔ. 7፡2፤ ዛካ. 6፡5። 2 ሃሣ ጊንሣ ናንጊና ናንጋ ፆኦዛሢኮ ዔርዛ ማላቶ ኩጫ ዔኬ፥ ሜሌ ፆኦሲ ኪኢታንቻ ዓባ ኬስካ ዛላፓ ሙካንቴ ታ ዴንቄኔ፤ ዒዚያ ሳዖና ባዞና ባይዛንዳጉዲ ቢታንታ ዒንጊንቴ ዖይዶ ኪኢታንቾንሢም ዼኤፒ ዑኡሲና፦ 3 «ኑ ፆኦዛሢም ማዻ ዓሶኮ ባሊቶይዳ ዱማሲ ዔርዛ ማላቶ ኑ ዓይሣንዳያ ሄላንዳኣና ሳዖ ማዔቴያ ባዞ፤ ሃሣ ሚፆዋ ዔኤቢ ዎኦቲፖቴ» ጌዔኔ። ✝7፡3 ሂዚ. 9፡4፤ 6። 4 ዔርዛ ማላቶ ዓይሢንቴ ዓሶኮ ፓይዶ ታ ዋይዜኔ፤ ዬያታ ዒስራዔኤሌ ፃጶ ቢያይዳፓ ማዔያ ፄኤታና ዖይዲታሚ ዖይዶ ሺያ ዓሲኬ። 5-8 ዪሁዳ ፃጳፓ፥ ሮኦቤኤሌ ፃጳፓ፥ ጋኣዴ ፃጳፓ፥ ዓሴኤሬ ፃጳፓ፥ ኒፕታኣሌኤሜ ፃጳፓ፥ ሚናኣሴ ፃጳፓ፥ ሲሞኦኔ ፃጳፓ፥ ሌዊ ፃጳፓ፥ ዪሳኮኦሬ ፃጳፓ፥ ዛብሎኦኔ ፃጳፓ፥ ዮሴፔና ቢኢኒያሜና ፃጳፓ፤ ዬያ ፔቴ ፔቴሢ ፃጳፓ ታጶ ላምዖ ሺያ፥ ሺያ ዓሲም ማላታ ዓይሢንቴኔ።