Deuteronômio 24

ላኣሊ ዓንጄዖ ላሚ ዔኪሢ ዛላ

1 ሙሴ ኬኤዛዖ፦ «ፔቴ ዓሲ ላኣሊ ዔካዖ ናንጊቤቃ ዒዛ ዒሣ ባኣዚ ዒ ዴንቂ ዓንጂፆ ዔርዛያ ማርካ ማዓ ዋርቃታ ፃኣፒ ዒንጊ፥ ፔ ማኣራፓ ዒዞ ዳኬያ ማዔቴ፥ ✝24፡1 ማቲ. 5፡31፤ 19፡7፤ ማር. 10፡4። 2 ሃሣ ዒዛ ዴንዲ ሜሌ ዓሲም ሌዔቴ፥ 3 ዬይ ላምዓሳ ዓናሢያ ዒዞ ዒፃያ ማዒ ዓንጂንቲፆ ዔርዛ፥ ማርካ ማዓ፥ ዋርቃታ ፃኣፒ ዒንጊ ፔ ማኣራፓ ኬሲ ዳኬቴ፤ ሃሣ ዬይ ዓናሢ ሃይቄያ ማዔቴ፥ 4 ዬንሢ ላምዖ ካሮንሢና ማዔቴያ ዬይ ቤርታኣ ዓናሢ ዒዞ ላሚ ዔካንዳያ ኮይሱዋሴ፤ ዒዞ ዒኢቴያ ማሂ ዒ ዛጎንጎ፤ ዒዞ ዒ ላሚ ዔኬቴ ዬያጉዴ ማዾ ናንጊና ናንጋ ጎዳ ዒፃያኬ፤ ናንጊና ናንጋ ጎዳ ማዔ ዒንሢኮ ፆኦዛሢ ዒንሢም ዒንጋ ዓጮይዳ ዒንሢ ናንጋ ዎዶና ዬያጉዴ ፑርታ ጎሜ ማዻንዳያ ኮይሱዋሴ» ጌዔኔ።

ዱማ ዱማ ዎጌ

5 «ዑኬ ላኣሊ ዔኬ ዓሲ ዖልዚ ዖላንዳጉዲ ዎልቄና ዳካንዳያ ኮይሱዋሴ፤ ሃሣ ሜሌ ማዾዋ ዎልቄና ማዻንዳያ ኮይሱዋሴ፤ ዒዚ ፔቴ ሌዔ ዓይጎ ባኣዚያ ዎልቃዺ ዓይሢንቱዋዖ ሜታ ባኣያ ማዒ ፔ ማኣራ ማቾ ዎዛሶንጎ» ጌዔኔ።

6 «ፔቴ ዓሲም ፔቴ ባኣዚ ዒንሢ ታልዓ ዎዶና ዎንፆታቴያ ማዶ ዓይሢ ባኣዚ ማሂ ዔኪ ዓርቂፖቴ፤ ዬያ ዒንሢ ማዼቴ ዬያ ዓሢኮ ማኣሮ ዓሳ ሙዖንዶ ባኣዚ ጊኢጊሾ ባሺንቲ ሃይቃንዳጉዲ ማዺሢጉዲ ዬይ ፓይዲንታኔ» ጌዔኔ።

7 «ፔ ፃጲ ማዔ፥ ዒስራዔኤሌ ዓሲ ዓርቂ ዔኪ ፔኤኮ ካራሚ ማሂ ማዺሻ ዓሲ፤ ሃሣ ሜሌም ሻንቻ ዓሲ ሃይቃንዳጉዲ ዎጊንቶንጎ፤ ዬያይዲ ዬያጉዴ ፑርቶ ማዾ ዒንሢ ባኣካፓ ዒንሢ ባይዛንዳኔ» ጌዔኔ። ✝24፡7 ኬሲ. ማፃ 21፡16።

8 «ዑሢዳ ኬስካ ዶርዓሢ ዒንሢ ዓርቄ ዎዶና ታ ዒንሢም ኬኤዛ ዳምቦ ጎይፆና ሌዊ ዓሶ ማዔ ቄኤሳ ዒንሢም ኬኤዛ ዳምቦ ዛጊ ማዺ ኩንሡዋቴ። ✝24፡8 ሌዊ. ዓኬ 13፡1—14፡54። 9 ጊብፄ ዓጫፓ ዒንሢ ኬስኪ ጎይፆይዳ ዓኣንቴ ናንጊና ናንጋ ጎዳ ማዔ ዒንሢኮ ፆኦዛሢ ማይራሞይዳ ማዼ ባኮ ማሊ ጶቂሡዋቴ» ጌዔኔ። ✝24፡9 ፓይ. ማፃ 12፡10።

10 «ዒንሢ ፔቴ ዓሲም ዔኤቢ ታልዓ ዎዶና ዓይሢ ማዓ ባኣዚ ዔካኒ ዒንሢሮ ዓሢኮ ጋሮ ጌሊፖቴ። 11 ዒንሢ ዙላ ዔቄም ዓሢ ፔኤሮ ዓይፆ ማዓ ባኮ ዔኪ ዒንጎንጎ። 12 ዓሢ ማንቆ ማዔቴ ዓሢ ማኣዓ ዓፒሎ ዒንሢ ማኣራ ዔኪ ዎይሢፖቴ፤ 13 ዒዚ ማኣዒ ዎርቃንዳጉዲ ዓባ ጌሉዋንቴ ዒዛም ማማሁዋቴ፤ ዒዚ ዒንሢም ‹ፆኦሲ ዒንጎም› ጋዓንዳኔ፤ ናንጊና ናንጋ ጎዳ ማዔ ዒንሢኮ ፆኦሲያ ዒንሢኮ ዬያ ማዾና ዎዛዻንዳኔ» ጌዔኔ። ✝24፡13 ኬሲ. ማፃ 22፡26-27።

14 «ዒንሢ ፃጶ ዒስራዔኤሌ ዓሲ ማዔቴያ ዒንሢ ዓጮ ካታሞኮ ፔቴዞይዳ ናንጋ ሜሌ ዓጪ ዓሲ ማዔ ማንቆ፥ ሃሣ ሜታዻ ዓሲ ዒንሢ ሚኢሼ ጪጌም ማዾ ማዻኒ ጌሌ ዎዶና ኮይሳሢ ጪጉዋዖ ጌሺ ጌሺ ማዺሺፖቴ። 15 ዒዚ ማንቆ ማዔሢሮ ኬላ ኬላ ዒ ማዼሢ ዛሎ ዒንሢ ዒንጋ ሚኢሾ ዔካኒ ዒማ ካፒ ዓኣሢሮ ሚኢሾ ዓባ ጌሉዋንቴ ዒንጉዋቴ፤ ዒንሢ ጪጊባኣቴ ናንጊና ናንጋ ጎዳ ባንሢ ዒዚ ዒላቴም ጎሜ ዒንሢኮ ማዓንዳኔ» ጌዔኔ። ✝24፡15 ሌዊ. ዓኬ 19፡13።

16 «ናይ ማዼ ዻቢንቲና ሾዓ ዓሳ ሃይቃንዳጉዲ ዎጊንታንዳያ ኮይሱዋሴ፤ ሃሣ ሾዔ ዓሳ ማዼ ዻቢንቲና ናኣታ ሃይቃንዳጉዲ ዎጊንታንዳያ ኮይሱዋሴ፤ ፔቴ ፔቴ ዓሳ ፔ ማዼ ዻቢንቶና ሌሊ ሃይቃንዳጉዲ ዎጊንታንዳያ ኮይሳኔ» ጌዔኔ። ✝24፡16 2ካኣቶ. ማ 14፡6፤ 2ፆኦሲ. ዓሃኬ 25፡4፤ ሂዚ. 18፡20።

17 «ሜሌ ዓጪፓ ሙኬያ፥ ሃሣ ዜኤሪ ናይም ፒዜ ዎጌ ዎጊፆ ሃሺፖቴ፤ ዜኤሪንዳ ታልዔ ባኣዚ ዛላሮ ዓፒላ ዓይሢ ባኣዚ ማሂ ዔኪፖቴ። 18 ዒንሢ ጊብፄ ዓጮይዳ ዓይሌ ማዒ ናንጌሢንታ ናንጊና ናንጋ ጎዳ ማዔ ዒንሢኮ ፆኦዛሢ ዬያይዳፓ ዓውሲ ዒንሢ ኬሴሢ ጶቂሡዋቴ፤ ታኣኒያ ሃያ ዓይሢፆ ዒንሢ ዓይሣሢ ዬያ ዛሎናኬ» ጌዔኔ። ✝24፡18 ኬሲ. ማፃ 23፡9፤ ሌዊ. ዓኬ 19፡33-34፤ ላሚ. ዎማ 27፡19።

19 «ሃኣኮ ዒንሢ ጮኦራ ዎዶና ዒንሢ ጎዦ ጋራ ዋሌ ናኣራ ዓኣቴ ጊንሣ ማዒ ሙኪ ዔኪፖቴ፤ ዬይ ሜሌ ዓጫፓ ሙኬ ዓሶንታ ዜኤሮ ናኣቶንታ ዜኤሮ ዒንዶንሢንታም ዓቶንጎ፤ ዬያ ዒንሢ ማዼቴ ዒንሢ ማዻ ማዾና ቢያ ናንጊና ናንጋ ጎዳ ዒንሢ ዓንጃንዳኔ። 20 ዛይቶ ጩኡጲ ኮሾ ሪሚቶ ዓኣፖ ዒንሢ ማንፄስካፓ ሚፆ ካኣፓ ካኣፓ ዓቴ ቃኣሉሞ ጊንሣ ሙኪ ማንፂ ዔኪፖቴ፤ ዬይ ሜሌ ዓጫፓ ሙኬ ዓሶንታ ዜኤሮ ናኣቶንታ ዜኤሮ ዒንዶንሢንታም ዓቶንጎ። 21 ዎይኖኮዋ ዓኣፖ ሱፃፓ ቲቂ ቲቂ ዒንሢ ዔካንቴ ዓቴሢ ጊንሣ ሙኪ ቲቂ ዔኪፖቴ፤ ዬያ ሜሌ ዓጫፓ ሙኬ ዓሶንታ ዜኤሮ ናኣቶንታ ዜኤሮ ዒንዶንሢንታም ሃሹዋቴ። ✝24፡21 ሌዊ. ዓኬ 19፡9-10፤ 23፡22። 22 ዒንሢ ጊብፄ ዓጮይዳ ዓይሌ ማዒ ናንጌሢ ዋሊፖቴ፤ ታኣኒያ ሃያ ዓይሢፆ ዒንሢ ዓይሣሢ ዬያሮኬ» ጌዔኔ።