1 ዬያጉዴ ሻኣሬ ማዔ፥ ሚርጌ ማርካ ኑኡኮ ዓኣሢሮ ኑኡኒያ ኬዲ ኑም ማዔ ባኮ ቢያ፤ ሃሣ ኑና ቱኪ ዓርቄ ጎሞይዳፓ ዱማዺ ኑኡኮ ቤርታ ዓኣ ጳዦ ጊቢ ዳንዳዒሢና ዶዲ ኑ ጳሽኮም። 2 ኑ ጳሽካንዳሢያ፦ ኑኡኮ ጉሙርቂፆኮ ካራ ማዔሢና ኩንሣያ ማዔ፥ ዬሱሴ ዛጊኬ፤ ሃጊ ዒ ዴንቃንዳ ዎዞሮ ፑርቶ ዓሶ ሱፆ ሚፆይዳ ዓኣ ዻውሲንቶ ሃይቦ ዔኤቢ ማሂ ዛጉዋዖ ሃሣ ዒኢካ ዒ ሃይቄ ሃይቦና ሜታሢና ጉቤ ዳንዳዒ ፆኦሲኮ ካኣቱሞ ዖይቶ ኬስኪ፥ ዒዛኮ ሚዛቆ ዛላ ቦንቾና ዴዔኔ።

3 ዓካሪ ዒንሢ ቶኦዛዹዋያ ሃሣ ሃጊ ማዓንዳ ዎዛባኣ ዓሲጉዲያ ማዒፖቴ፤ ጋዓንቴ ዬያ ቢያ ጎሞ ዓሳ ዒዛ ዒፂ ማዼ ባኮ ጊቢ ዳንዳዔ፥ ዬሱሴ ዛጉዋቴ። 4 ዒንሢ ጎሜ ዒፂ፥ ሃይቢ ሄላንዳኣና ማሹምቦ ዓርቂባኣሴ። 5 ፆኦሲ ዒንሢ ፔኤኮ ናኣቶ ማሂ፦

«ታ ናዓሢዮ! ጎዳ ጎራ ጎሮ ቦሂፖ፤

ዒ ኔና ሜቶና ጎራ ዎዶና ሃጋኣ ዎዛ ባኣያ ማዒፖ፤

6 ዓይጎሮ ጌዔቴ፦ ጎዳ ፔ ናሽካሢ ጎራኔ፤

ፔ ናይ ማሂ ዛጋሢያ ዒ ፁንቃኔ»

ጌዒ ዞሬ ዞሮ ዒንሢ ዋሌኔ። ✝12፡6 ዒዮ. 5፡17፤ ኮኦኪ. 3፡11-12። 7 ፆኦሲ ዒንሢ ፔኤኮ ናይ ማሂ ዛጋሢሮ ዒዚ ሜቶና ዒንሢ ጎራ ዎዶና ጊቢ ዳንዳዑዋቴ፤ ዓዴ ጎሪ ጳርቁዋ ናይ ዓኣ? 8 ናኣቶ ማዔዞንሢ ዔካ ሜታሢ ዒንሢ ዔኩዋያ ማዔቴ ዓሌ ናይ ዒንሢ ማዓንዳኣፓዓቴም ሾዖና ናይቱዋሴ። 9 ዬይ ዓታዛ ኑና ቢያሢ ጎሪ ፁንቃ፥ ኑና ሾዔ ዓዶንሢ ዓኣኔ፤ ያዺ ማዔቴያ ኑ ዔያቶ ቦንቻኔ። ዓካሪ ሼምፖና ናንጋኒ ኑኡኮ ዓያኖ ዓዳሢም ባሼ ዓይሢንታንዳያ ኑም ኮይሱዋዓዳ? 10 ኑ ዓዶንሢ ዔያቶም ኮሺ ማዒ ጴዼ ጎይፆ ዻካ ዎዴም ኑና ጎሪ ፁንቃኔ፤ ፆኦሲ ጋዓንቴ ዒዛና ዎላ ኑ ጌኤሺ ማዓንዳጉዲ፥ ኑና ማኣዳ ባኣዚሮ ሜቶና ኑና ፁንቃኔ። 11 ጎሪ ፁንቆ ፁንቃ ቢያ ዒማና ዖዪሳያኬ፥ ዎዛሳያቱዋሴ፤ ጊንፃፓ ጋዓንቴ ጊቢ ዳንዳዒ ዔሬ ዓሶም ኮሹሞ ኩሜ፥ ፂሉሞ ናንጊ ጴዺሻኔ።

12 ዬያሮ ዒንሢ ዓያኖ ዛሎና ላቤ ላቢፃፓ ዶዱዋቴ። ✝12፡12 ዒሲ. 35፡3። 13 ዎቦ ማዔሢ ዻቂ ፒዛንዳጉዲ ማዓንዳኣፓዓቴም ፔቶ ዣኣሉዋጉዲ ዒኖ ዒንሢኮ ፒዜ ጎይሢ ዔኪ ዓኣዹዋቴ። ✝12፡13 ኮኦኪ. 4፡26።

14 ዓሲ ቢያና ኮሺ ናንጋኒ ማሉዋቴ፤ ፆኦሲም ዱማዼያ ማዓኒያ ዶዱዋቴ፤ ዓይጎሮ ጌዔቴ ፆኦሲም ዱማዺባኣዖ ዖኦኒያ ዒዛ ዛጋኒ ዳንዳዑዋኣሢሮኬ። 15 ዒንሢዳፓ ዖጊዳኣ ፆኦሲ ኮሹሞና ዒንጋ ዒንጊፃ ፓጪ ጴዹዋጉዲ ዒንሢና ዔሩዋቴ፤ ዬያጉዲ ሃሣ ዓይጎ ዓሲያ ዒንሢ ባኣካ ጫንቃ ሚሢጉዲ ማዒ ኬስኪ ዒንሢ ሜታሱዋጉዲና ሚርጌሢ ፑርቲሱዋጉዲ ዒንሢና ዔሩዋቴ። ✝12፡15 ላሚ. ዎማ 29፡19። 16 ዒንሢ ባኣካ ፔቴና ሙዖ ሙኡዚሮ ጌዒ ቶይዱሞ ሻንቼ፥ ዔኤሳዎጉዲ ዻቢንታያ ሃሣ ጊንሣ ፆኦሲ ቦንቺሱዋያ ማዔ ዓሲ ጴዹዋጉዲ ዒንሢና ዔሩዋቴ። ✝12፡16 ማዢ. ማፃ 25፡29-34። 17 ጊንፃፓ ዔኤሳዎ ዓንጆ ዔካኒ ኮዔ ዎዶና ዓንጆ ዒዚ ላኣጊንቴሢ ዒንሢ ዔራኔ፤ ዎዚ ዒ ዬኤኪ ዬኤኪ ዬኖ ዓንጆ ዶዲ ኮዔቴያ ዴንቃኒ ዒ ዳንዳዒባኣሴ፤ ዓይጎሮ ጌዔቴ ዒ ቤርታ ዻቤ ዻቢንቶ ቡኡፆንዶ ካራ ዒዛም ጴዺባኣሢሮኬ። ✝12፡17 ማዢ. ማፃ 27፡30-40።

18 ዒንሢ ኩቻ ዓርቂንታኒ ዳንዳዑዋያ ሃሣ ጊንሣ ታማ ዔኤታ ሲና ዹኮ ሄሊባኣሴ፤ ጌይፃ፦ ቃኣያሢ ቤዞ፥ ዹሞ ቤዞ፥ ዓልጋሢ ዔቄ ቤዞ፥ 19 ዛዮ ዑኡዛ ጊንሣ ሃሣ ጌይንታ ባካ ዋይዚንታ ዑኡዛ ዓኣ ቤዞ ባንሢ ዒንሢ ሄሊባኣሴ፤ ዬያ ባኮ ዋይዜ ዓሳ፦ «ሃይፓ ሴካ ሜሌ ባኣዚ ኑም ኬኤዚንቶፓ» ጌይ ሺኢቄኔ። ✝12፡19 ኬሲ. ማፃ 19፡16-22፤ 20፡18-21፤ ላሚ. ዎማ 4፡11-12፤ 5፡22-27።

20 ዓይጎሮ ጌዔቴ፦

«ዹኮ ቆልሞ ሄሌቴታዖ

ሹቺና ዹይንቲ ሃይቆንጎ»

ጋዓ ዓይሢፃ ዔያቶም ዴኤፄሢሮ ዔካኒ ዔያታ ዳንዳዒባኣሢሮኬ። ✝12፡20 ኬሲ. ማፃ 19፡12-13።

21 ዬካ ጴዻ ባካ ሚርጌ ዒጊቻያ ማዔሢሮ ሙሴታዖ

«ታ ዒጊጪ፥ ጎጋይቄኔ» ጌዔኔ። ✝12፡21 ላሚ. ዎማ 9፡19።

22 ዒንሢ ጋዓንቴ ፂዮኔ ዹኮ ባንሢ ሙኬኔ፤ ዬይያ፦ ባይቁዋ ፆኦዛሢ ካታሞ ማዔ፥ ጫሪንጮ ዬሩሳላሜኬ፤ ዒኢካ ዎዛና ቡኪንቴ፥ ፓይዲንቱዋ ዺቦ ኪኢታንቾ ባንሢ ዒንሢ ሙኬኔ። 23 ሃሣ ሱንፃ ዔያቶኮ ጫሪንጮይዳ ፃኣፒንቴ፥ ኪሪስቶሴ ጉሙርቃ ሺኢጲፆ ማኣሮ ዓሶኮ ቶይዶ ማዔ፥ ኪሪስቶሴ ጉሙርቃ ዓሶ ቡኪንቶ ባንሢ ጊንሣ ሃሣ ቢያሢም ዎጋያ ማዔ፥ ፆኦዛሢና ፆኦሲ ዔያቶ ማዖም ጌዔ ጎይፆ ማዔ፥ ኮዦ ዓሶ ዓያኖና ባንሢ ዒንሢ ሙኬኔ፤ 24 ሃሣ ፆኦሲና ዓሲናኮ ባኣካ ዓኣ ዓኮ ጫኣቁሞ ጊኢጊሼ፥ ዬሱሴ ባንሢ፤ ዬያጉዲ ሃሣ ዓኣቤኤሌ ሱጉፃፓ ባሼ ኬኤዛ፥ ጎሜ ጌኤሻኒ ፑጪንቴ ዒዛኮ ሱጉፆ ባንሢ ዒንሢ ሙኬኔ። ✝12፡24 ማዢ. ማፃ 4፡10።

25 ዬያ ኬኤዛ ባኮ ዒንሢ ዒፁዋጉዲ ዒንሢና ዔሩዋቴ፤ ዓይጎሮ ጌዔቴ ዬያታ ሳዓፓ ዔያቶም ኬኤዛ ዎዶና ዒፂ ዔያታ ቶሊ ዓቲባኣያ ማዔቴ፥ ጫሪንጫፓ ኑም ኬኤዛሢዳፓ ኑ ሃኬቴ ዎይቲ ኑ ቶላንዳይ! ✝12፡25 ኬሲ. ማፃ 20፡22። 26 ዒማና ዒዛኮ ዑኡዛ ሳዖ ዓጊሤኔ፤ ሃሢ ጋዓንቴ፦ «ሳዖ ሌሊቱዋንቴ ፔቴና ላሚ ጫሪንጮንታ ዎላ ታ ዓጊሣንዳኔ» ጌዒ ጫኣቄኔ። ✝12፡26 ሃኣጌ 2፡6። 27 ዬይ «ፔቴና ላሚ» ጌይንቴ ባካ ዔርዛሢ ዓጊፁዋ ባካ ዶዲ ናንጋንዳጉዲ ሃሣ ዓጊፃያ ማዔ፥ ማዢንቴ ባካ ባይቃንዳያ ማዔሢኬ።

28 ዓካሪ ኑኡኒ ዓጊፁዋ ቤዞ፥ ፆኦሲ ዎይሣሢዳ ጌላንዳሢሮ ዒዛ ኑ ጋላቶም፤ ሃሣ ዒ ዎዛዻ ጎይሢ ዒዛ ቦንቺሢና ዒጊጪሢና ዒዛ ኑ ካኣሽኮም። 29 ዓይጎሮ ጌዔቴ ኑ ፆኦዛሢ ሚቺ ባይዛ ታሚ ማዔሢሮኬ። ✝12፡29 ላሚ. ዎማ 4፡24።