ማቲዎሴ ፃኣፔ ኮዦ ሃይሶ 3

ማስካ ዮሃኒሴ ዬሱሴ ዛሎ ዼጊዲ ኬኤዜሢ

1 ዬኖ ዎዶና ማስካ ዮሃኒሴ ዪሁዳ ዓጫ ዓሲ ናንጉዋ ዳውሎይዳ ዓሶም ኮዦ ሃይሶ ኬኤዚ ኬኤዚ ሙኬኔ። 2 ዒዚ ኬኤዜሢ፦ «ፆኦሲ ካኣቱማ ዑኬኔ፤ ጎሞ ቡኡፁዋቴ» ሂዚ ጌዒኬ። ✝3፡2 ማቲ. 4፡17፤ ማር. 1፡15።

3 « ‹ጎዳኮ ጎይፆ ጊኢጊሹዋቴ፥

ሉኡጎ ጎይፆዋ ፒዚሱዋቴ› ጌዒ ጌዒ

ዓሲ ናንጉዋ ዳውሎይዳ ዒላታ ዓሲ ዑኡሲ» ጌዒ

ፆኦሲ ማሊፆ ኬኤዛ ዒሲያሴ ኬኤዜሢ ዬያ ዮሃኒሴ ዛሎኬ። ✝3፡3 ዒሲ. 40፡3።

4 ዮሃኒሴኮ ማኣዓሢ ጋኣሎ ጋፓኔፓ ኮሾናያኬ፤ ኬርኖይዳ ዒ ቃልሾ ቱካኔ፥ ሙዓ ሃሣ ዒዛኮ ዓቢሢና ዑቶ ዔኤሲናኬ፤ ✝3፡4 2ካኣቶ. ማ 1፡8፤ ዛካ. 13፡4፤ ሌዊ. ዓኬ 11፡22። 5 ዬኖ ዎዶና ዪሁዳ ዓጮ ዬሩሳላሜ ካታማፓ፥ ዮርዳኖሴ ዎሮ ኮይላ ዓኣ ዓጫፓ ዓሳ ቢያ ዮሃኒሴ ኮይላ ሙኪ፥ 6 ጎሞ ፔኤኮ ቡኡፂ ቡኡፂ ዒዛ ኮይላ ዮርዳኖሴ ዎራ ዋኣፆ ማስታኔ።