1 ፔና ናሽካ ዓሲ ፔ ማሊፆ ጎይፆማ ሌሊ ዓኣዻኔ፤

ሜሌ ዓሲዳፓ ዒዛም ኬኤዚንታ ፒዜ ማሊሢታቴታዖ ዒፂ ማማካኔ።

2 ዔኤያ ዓሲ ፔ ኬኤዛ ባኮማ ሌሊ ፔጋሳኒ ኮዓፓዓቴም

ዔራቶ ሜሌ ዓሲዳፓ ዔኪሢ ዒዛ ዎዛሱዋሴ።

3 ጎሜና ቦርሲንቲና ዎሊፓ ዱማዹዋ ባኣዚኬ፤

ኔኤኒ ቦንቺንቲ ባኣቴ ቦቦርሲንታንዳኔ።

4 ዓሲ ዻንጋፓ ኬስካ ዔራቶ ጌኤሲ

ኮሺ ዔታዼ ዔቴይዳ ዓኣ ዋኣሢጉዲኬ፤

ሃሣ ዓልቃ ዋኣሢጉዲያኣ ዓኣፃያኬ።

5 ዻቤ ዓሲ ማኣዲ ጌስቲሢና

ጌኤሺ ዓሲ ፒዜ ዎጌ ዴንቁዋጉዲ ማዺሢ ኮይሳያቱዋሴ።

6 ዔኤያ ዓሲ ጌኤሲ ዑራ ማዣኔ፤

ዒዚ ጉሪ ጌስቲ ሺራ ባካ ኮኦሎና ጳርቂሳኔ።

7 ዔኤያ ዓሲ ጌስታኣና ፔና ሜቶይዳ ዓጋኔ፤

ዒዛኮ ጌኤዛ ፒሮ ማዒ ዒዛ ዓርቃኔ።

8 ዾንኮ ዓሲኮ ጌኤዛ ዓኣሢ ሙኡዚጉዲ

ዎዛሲ ዎዛሲ ዴንዲ ዓሽኮ ጋሮ ሄላያኬ።

9 ቤልፃ ዓሲ ዔኤቢ ፑርቲሴ ዓሲፓ ዱማዺ ዛጊንቱዋሴ፤

10 ናንጊና ናንጋ ጎዳኮ ሱንፃ ዶዲ ዋርዲያ ቤሲጉዲኬ፤

ዬያሮ ኮሺ ዓሲ ዬያ ባንሢ ዶጪጋፓ ዻቃኔ።

11 ዖርጎጮ ዓሳ ጋዓንቴ ዔያቶኮ ቆላ ካታሞ ዙላ ዓኣ ዼጌ፤

ሃሣ ጊንሣ ዶዲ ኬኤሌ ማዒ ዔያቶ ካፓያ ዔያቶም ማላኔ።

12 ሎኦሞኮ ቤርታ ዓሲኮ ዒኔ ዖዖቶርቃኔ፤

ሼሌዔ ዓሲ ቦቦንቺንታኔ።

ሼሌዑሞ ጋዓንቴ ቦንቾፓ ቢራኔ።

13 ዋይዚ ዔኩዋዖ ማሂ ኬኤዚሢ

ዔኤያ ማሃኔ፤ ሃሣ ቦርሲሳያኬ።

14 ሃርጌ ሃርጋ ዎዴና ዶዲሢ ማማኣዳኔ፤

ላቢ ሺኢታያ ማዔቴ ማኣዳ ባኣዚ ባኣሴ።