1 ኮሺ ሱንሢ ሚርጌ ቆሎይዳፓ

ዓሲና ናሽኪንቲሢያ ቢራና ዎርቄናፓ ባሻኔ።

2 ዖርጎጫሢታቴያ ማንቃሢ

ማዤሢ ናንጊና ናንጋ ጎዳታሢሮ

ላምዓሢ ፔቴኬ።

3 ጪንጫ ዓሲ ሜታ ሙካሢ ዛጋዖ ዓዓኣሺንታኔ፤

ማሊ ጶቂሥሢ ፓጬ ዓሲ ጋዓንቴ ማሉዋዖ ሜቶይዳ ኬዳኔ።

4 ናንጊና ናንጋ ጎዳ ዒጊጪሢንታ ኮሺ ማዒሢንታ

ቆሎና ቦንቾና ናንጊያኣ ዴንቂሳኔ።

5 ፑርቶ ዓሶኮ ጎይፆይዳ ዓንጊሢና ፒሮና ዓኣኔ፤

ፔ ቶኦኮ ካፓሢ ጋዓንቴ ዬያፓ ሃካኔ።

6 ናይ ዎማይዲ ናንጋኒ ኮይሳቴያ ኔ ዔርዜያቴቴ

ፔ ናንጎ ዎዶ ቢያይዳ ዬኖይዳፓ ሺኢካዓኬ።

7 ማንቆ ዓሲ ዖርጎቺ ዓሲም ማዻያኬ፤

ሚኢሼ ታልዓሢ ታልዒሴሢኮ ዓይሌኬ።

8 ጎሜ ዜርቃሢ ሜቶ ጮኦሪ ዔካኔ፤

ዻጋ ዒዛኮ ዓንኮዋ ዒዛ ሄሊሲንዱዋሴ።

9 ፔኤኮ ሙዖ ማንቆ ዓሶና ዎላ ዒዚ ጊሽታሢሮ

ዔኤቢ ዒንጋ ዓሲ ዓንጂንቴያ ማዓኔ።

10 ዔኤቢ ቦሂ ሺራ ዓሲ ኔኤኒ ዳውሴቴ ዑራ ጋፓኔ፤

ዑራንታ ጫሺንታ ባኣያ ማዓኔ።

11 ዒና ጌኤሹሞንታ ኮሺ ጌኤሲንታ ናሽካ ዓሲ

ካኣቶና ናሽኪንታያ ማዓኔ።

12 ናንጊና ናንጋ ጎዳኮ ዓኣፓ ዔራቶና ዓኣ ዓሶ ኮሺ ዛጋኔ፤

ጉሙርቂፃባኣ ዓሳ ቱኬ ቱኡዞ ጋዓንቴ ዒ ጉሪ ማሃኔ።

13 ቤልፃ ዓሲ፦ «ካራ ዞቢ ዓኣኔ፤ ታ ኬስኬቴ ታና ሙዓንዳኔ» ጋዓኔ።

14 ዞኦስካ ኮኦማ ላኣሊኮ ዻንጋ ኮሺ ዔታዻ ዔቴጉዲኬ፤

ናንጊና ናንጋ ጎዳ ዒፄ ዓሳ ዓዺንቲ ዬያ ዔቶይዳ ሎኦማኔ።

15 ናይ ዒኔይዳ ዔኤዩሞ ዓኣኔ፤

ጎሪ ዞሪሢ ዣኣቺ ጋዓንቴ ዬያ ዒኖ ዒዛይዳፓ ሺኢሻኔ።

16 ዖርጎቺ ዓሲም ዔኤቢ ዒንጋሢ

ጊንሣ ሃሣ ቆሎ ዴንቃኒ ጌይ

ማንቆ ዓሶ ሄርቂ ዎይሣ ዓሲ ኩፓታንዳኔ።

17 ዔሮ ዓሳ ኬኤዜ ባኮ ታ ኔና ዔርዞም ዋይዜ፤ ዔያቶይዳፓ ኔ ዔካ ዔራቶ ባንሢ ዒኖ ኔኤኮ ማሄ፤ 18 ቢያ ዎዴ ኔ ማሊ ማሊ ማዾይዳ ፔኤሻያ ማዔቴ ኔና ዎዛሳንዳኔ፤ 19 ዬያ ታ ኔኤም ኬኤዛሢ ጉሙርቂፃ ኔኤኮ ናንጊና ናንጋ ጎዳይዳ ማዓንዳጉዲኬ። 20 ሃኣዛጌ፦ ታ ኔኤም ሃይሢታሚ ዳምቤ ፃኣፔኔ፤ ዬያታ ዔራቶንታ ኮሺ ዞሮንታ ዓኣያኬ፤ 21 ጎኑሞ ዓይጎ ማዔቴያ ኔና ዔያታ ዔርዛንዳኔ፤ «ጎኑሞ ኮይ ዔኪ ሙኬ» ጌይ ኔና ዖኦጮናያታቴ ፒዜ ባኣዚ ማሂ ኔኤኒ ኬኤዛንዳኔ።

22 ፔቴታዖ ዔያቶኮ ዔኤቢባኣሢሮ ማንቆ ዓሶ ቡሪፖ፤ ሄርቂንቲ ዎርቃ ዓሶዋ ዎጎ ዎጋ ዓሶ ቤርታ ላቢሲ ሺሪፖ። 23 ዓይጎሮ ጌዔቴ ናንጊና ናንጋ ጎዳ ዔያቶ ዛሎ ሞኦታንዳሢሮና ዔያቶ ሄርቂ ሜታሳ ዓሶዋ ዒ ሜታሳንዳሢሮኬ።

24 ሮኦጋዻያና ጎሪንታ ዓሲና ዎላ ላጌ ማዒፖ፤ 25 ኔኤኒ ዒዛ ባኮ ዔሬቴ ዬያፓ ቶሊ ኬስካዓኬ።

26 ሜሌ ዓሲኮ ጋሌ ጪጋኒ ዋኣሴ ማዒፖ፤ 27 ጪጋኒ ኔኤኒ ዳንዳዒባኣቴ ኔ ላሃ ሻኣላታዖ ዓቱዋንቴ ዓኣ ቆላ ኔኤኮ ቢያ ዔውታንዳኔ።

28 ሚና ኔኤኮ ቤርታኣ ዓዶንሢ ጌሤ ዛጶ ዚጎ ሺኢሺፖ።

29 ማዾ ፔኤኮ ኮሺ ማዺ ዔሬ ዓሲ ኔ ዛጋ? ዬያጉዴ ዓሲ ጉሪ ዓሲ ጌይንታ ዓሲ ቤርታቱዋንቴ ካኣቶ ቤርታ ማዾ ማዻኒ ዔቃንዳኔ።