1 ሚርጌ ዎዴ ጎሪ ዞሮናንቴ ዋይዞ ዒፄ ዓሲ ዔርቲባኣንቴ ሜቃኔ፤ ፓሣንዳ ባኣዚያ ባኣያ ማዓኔ።

2 ኮዦ ዓሳ ሱኡጌ ማዒ ዶኦሪንቴ ዎዶና ዴራ ዎዎዛዻኔ፤ ፑርቶ ዓሳ ሱኡጌ ማዒ ዶኦሪንታኣና ጋዓንቴ ዴራ ማሊ ሜታዻኔ።

3 ዔራቶ ናሽካ ዓሲ ፔ ዓዶ ዎዛሳኔ፤ ዞኦዛ ኮኦማ ላኣሎ ጊንፆ ሃንታሢ ጋዓንቴ ፔኤኮ ቆሎ ላላኣላኔ።

4 ካኣታ ፒዜ ዎጌ ዎቡዋጉዲ ማሃ ዎዶና ዓጮ ፔኤኮ ዶዲሻኔ፤ ዴሮ ቡራ ሱኡጌ ጋዓንቴ ዓጮ ፔኤኮ ባይሲንታ ባንሢ ዔኪ ዓኣዻኔ።

5 ፔኤኮ ላጎ ሳልማሳ ዓሲ ዬያቶኮ ቶኮም ፒሮ ፒራኔ።

6 ፑርታ ዓሲ ዒዛኮ ጎማ ፒሮ ማዒ ዓርቃኔ፤ ኮሺ ዓሲ ጋዓንቴ ፆኦሲ ቦንቾም ዓይናዺ ዓይናዺ ዎዛዻኔ።

7 ኮሺ ዓሲ ማንቆ ዓሶም ፒዜ ዎጌ ዎጊንታንዳጉዲ ማሊ ሜታዻኔ፤ ፑርቶ ዓሳ ጋዓንቴ ዬያጉዴ ባኮ ዔኤቢኬ ጎዑዋሴ።

8 ሜሌ ዓሶ ዛሎ ዔኤቢኬ ጎዑዋ፥ ቦሂ ሺራ ዓሳ ካታሞይዳ ዣሎ ማዣኔ፤ ዔሮ ዓሲ ጋዓንቴ ዱኡላዼ ናንጎ ማሂ ጊንሣ ጊኢጊሻኔ።

9 ዔራ ዓሲ ዔኤያ ዓሲ ዎጌና ዓይሢሲ ዎጎ ማኣሪ ሺኢሼቴ ዔኤያሢ ጎሪንቲ፤ ሃንጎ ሚኢጪ ጌኤዞ ፑርቲሳኔ።

10 ሼምፔ ዎዻ ዓሳ ጌኤዦ ዓሶ ዒፃኔ፤ ኮዦ ዓሶዋ ዎዻኒ ኮዓኔ።

11 ዔኤዮ ዓሢ ፔኤኮ ዻጎ ዒኖ ፔጋሲ ዔርዛኔ፤ ዔራ ዓሲ ጋዓንቴ ፔኤኮ ዻጎ ጊቢ ዳንዳዒሢና ቃዛኔ።

12 ፔቴ ሱኡጌ ሉኡዙሞ ሃይሴ ዔካያ ማዔቴ ዒዛኮ ዶንዞ ማዔ ቢታንታ ዓኣ ዓሳ ቢያ ጌኔ ማዻ ዓሲ ማዓኔ።

13 ማንቃሢና ዒዛ ሄርቂ ዎይሣሢናም ዓኣፖ ፖዖ ዒንጋሢ ፆኦሲ ማዔሢሮ ቢያሢ ፖዖና ሄኮ ዛጋኔ።

14 ፔቴ ካኣቲ ማንቆ ዓሶም ፒዜና ዎጋያ ማዔቴ ሚርጌ ሌዔ ዒዚ ዎይሣኔ።

15 ናይ ጎሪሢና ሻርሺሢና ዔራቶ ዴንቂሳኔ፤ ናይ ዳኪ ሃሾም ዲጫያ ማዔቴ ጋዓንቴ ፔ ዒንዶ ቦርሲሳኔ።

16 ፑርታ ዓሲ ቢታንቶ ዓርቃዛ ዎጌ ሄርቂሢ ሚርጋኔ፤ ኮሺ ዓሲ ጋዓንቴ ፑርቶ ዓሶኮ ሎኦማሢ ዛጉዋዖ ሃይቁዋሴ።

17 ናዖ ኔኤኮ ሻርሼ፤ ሃውሾና ኮሹሞና ኔኤኒ ዴንቂ ዎዛዻንዳኔ።

18 ፆኦሲ ፔጋሲ ዻዋ ባኣዚ ባኣቴ ዴሬ ዳኪ ሃሾናያ ማዓኔ፤ ፆኦሲኮ ዎጎ ቦንቻ ዓሢ ጋዓንቴ ዓንጂንቴያኬ።

19 ፔቴ ዓይሌ ዻንጋ ዞሪሢና ሌሊ ኮሻኒ ዳንዳዒንቱዋሴ፤ ኔ ዒዛም ጋዓ ባካ ዔርቴታቶዋ ዒ ኔኤም ዓይሢንታዓኬ።

20 ማሊ ዔኩዋዖ ሩኡሪና ጌስታ ዓሲዳፓ ባሼ ዔኤያሢኮ ሃጊ ማዓ ዎዛ ዓኣኔ።

21 ፔቴ ካራሚ ናኣቱሞፓ ዓርቃዖ ዖቶርቂ ዲጬቴ ጋፒንፃ ዒዛኮ ኮሽኩዋሴ።

22 ዻጋ ዓሲ ዑራ ማዣኔ፤ ዑኬና ዻጋዻ ዓሲ ሚርጌ ዻቢንቲ ማዾ ማዻኔ።

23 ሄርሺንቲ ሎሎንሣኔ፤ ሼሌዔ ኔኤኒ ማዔቴ ጋዓንቴ ቦንቺንታንዳኔ።

24 ዉሲና ዎላ ፔቴ ማዓ ዓሲ ፔና ዒፄ ዓሲኬ፤ ዒዚ ጫኣቄቴያ ጎኔ ባኣዚ ዒ ኬኤዙዋሴ።

25 ዓሲ ዒጊጫሢ ሜቶይዳ ኬዳኔ፤ ናንጊና ናንጋ ጎዳ ጉሙርቃሢ ጋዓንቴ ኮሺና ናንጋኔ።

26 ሚርጌ ዓሲ ቢታንታ ዓኣ ዓሶፓ ማኣዶ ኮዓኔ፤ ፒዜ ዎጌ ጴዻሢ ጋዓንቴ ናንጊና ናንጋ ጎዳይዳፓ ሌሊኬ።

27 ፑርቶ ዓሶ ኮዦ ዓሳ ዒፃኔ፤ ሃሣ ኮዦ ዓሶዋ ፑርቶ ዓሳ ዒዒፃኔ።