1 ማሳ ዓጮ ዓሢ፥ ያቄ ናኣዚ፥ ዓጉሬ ዒናፓ ኬኤዜ ሃይሳ ሃካፓ ዴማ ኬኤዚንታ ጎይፆኬ፦

«ፆኦሲ ታኣና ዎላቱዋሴ፤

ጎኔና ፆኦሲ ታኣና ዎላቱዋሴ፤

ዬያሮ ታና ማኣዳያ ታ ባይዚ ሃጊ ማዓ ዎዛ ታኣኒ ቲቄኔ።

2 ዓሲ ማዒፃ ታኣኮ ጋፔም ቆልሞ ታኣኒ ማዔኔ፤

ዓሲኮ ዓኣያ ማዓኒ ኮይሳ ማሊ ጶቂሳ ዒኔ ታኣኮ ባኣሴ።

3 ፔቴታዖ ዔራቶ ታኣኒ ዔሪባኣሴ፤

ፆኦሲ ዛላ ታ ዔራ ዓይጎ ባኣዚያ ባኣሴ።

4 ሌካ ጫሪንቺ ኬስኪ ጊንሣ ኬዴሢ ዖናዳይ?

ዢባሬ ኩቺና ዱኡሚ ዓርቄያ፥

ሃሣ ዋኣሢ ፔኤኮ ዓፒላ ዖሼያ፥

ዓጫ ማዔ ካሮና ማሂ ዶዲሼሢ ዖናዳይ?

ዬያ ዓሢኮ ሱንፃ ዖናዳይ?

ናዖ ሱንፃ ዒዛኮ ዖና ጌይንታይ?

ኔኤኒ ዔራቶ ታኣም ኬኤዜ።

5 «ፆኦሲ ኬኤዛ ቃኣላ ቢያ ጎኔኬ፤ ዒዛ ጉሙርቃሢም ቢያ ዒዚ ጊቲማኬ። 6 ዒዚ ጌይባኣ ባኣዚ ‹ዒ ጌዔኔ› ኔ ጌዔቴ ዒ ኔና ጎራኔ፤ ኔ ሉኡዚ ዓሲ ማዔሢያ ኔኤኮ ፔጋዺ ዔርታንዳኔ።»

7 ናንጊና ናንጋ ጎዳሢዮ! ታኣኒ ሃይቃንዳሢኮ ቤርታ ሃካፓ ዴማ ዓኣ ላምዖ ባኮንሢ ኔ ታና ላኣጉዋጉዲ ታ ኔና ሺኢቃኔ፦

8 ማልቴና ሉኡዙሞና ጌኤሲናፓ ታና ካፔ፤ ታኣም ኮይሳሢጉዴያ ሙኡዚ ኔ ዒንጋንዳማፓ ዓታዛ ዖርጎቺ ሃንጎ ማንቆ ታና ማሂፖ።

9 ሚርጌ ቆሎ ታኣኮ ዓኣቴ፦ «ናንጊና ናንጋ ጎዳ ዖናዳይ» ጌይ ታ ኔና ዔሩዋሴ ጋዓንዳኔ፤ ጊንሣ ሃሣ ማንቆ ታኣኒ ማዔቴ ዉኡቃንዳያናንዳኔ፤ ዬያይዲፆና ኔና ታኣኮ ፆኦዛሢኮ ሱንፆ ታኣኒ ጫሽኪሳንዳኔ።

10 ኔ ጋዳንቂንቱዋጉዲና ሜቶይዳ ኔኤኒ ኬዱዋጉዲ ፔቴ ዓሲም ማዾ ማዻሢ ማዺሻሢ ቤርቶይዳ ዾንኪፖ።

11 ፔኤኮ ሾዔ ዓዶንሢ ጫሽካያ፤ ሃሣ ዒንዶንሢያ ጋላቱዋ ዓሲ ዓኣኔ።

12 ዔያታ ጎሜና ዓኣያታዖ ጌኤሺ ማዔያ ዔያቶም ማላ ዓሲ ዓኣኔ።

13 ዑሣ ዓኣዼ ዖቶርቃያና ዓሲ ቶኦቻ ዓሲ ዓኣኔ።

14 ዓጫ ዔያቶኮ ጬንቻ ዓፓሮጉዲ፥ ባንጋላኣ ዔያቶሲ ቁምፓይቴ ማዒ ማንቆ ዓሶንታ ሜታዼ ዓሶንታ ጌኔና ቡራ ዓሲ ዓኣኔ።

15 ቁሉሢኮ፦ «ታኣም ዒንጌ! ዒዒንጌ!» ጌይ ጌይ ዒላታ ላምዖ ዉዱሮ ናይ ዓኣኔ፤

ዬያጉዲ ሃሣ ፔቴታዖ ሚሽኩዋያና «ኑኡም ጊዴኔ» ጎዑዋ ሃይሦ ባኣዚ ዓኣኔ፤ ዬንሢ ሌሊቱዋንቴ ዖይዶ ባኣዚኬ፦ 16 ዬንሢያ፦

«ዱኡፒ፥ ናይ ሾዓኒ ዓፃዻ ዞኦኮ ላኣሊ፥

ዒርዚ ዋርቃዛ ዎዑዋ ሳዓና

ዎዺንታኒ ዳንዳዑዋ ካይዚ ዓርቄ ታሚናኬ።»

17 ፔኤኮ ዓዶ ቶኦቻያና ዒንዳኣ ጋርቻዛ ዒዞ ቦሃ ዓሲኮ ማጊዳ ናንጋ ቁራካ ዓኣፖ ዒዛኮ ቆሂ ቆሂ ኬሳንዳኔ፤ ሃሣ ሃምፑራኣ ዒዛ ሙዓንዳኔ።

18 ታኣኒ ማሊ ጶቂሣኒ ዳንዳዑዋ ሚርጌና ዓኣሺንቴያ ማዔ ሃይሦ ባኣዚ ዓኣኔ፤ ዬንሢ ሌሊቱዋንቴ ዖይዶ ባኣዚኬ።

19 ዬንሢያ፦

«ጫሪንጫ ባራና ኮኦኬ፥

ላሌ ዑሢዳ ሃንታ ሾኦሺ፥

ባዚ ዑሢዳ ሃንታ ዋኣሢ ካኣሚሌና

ላኣሊ ናሽኪ ላጌሦ ዓርቄ ዓቲንቄናኬ።»

20 ጉሙርቂንቱዋ ማቾ ዛላኣ ዒማጉዲኬ፤ ዔኤቢ ሙዓዖ ሙሱሮ ዑጫ ዓሲጉዲ ዒዛ ዓኒ ዒዞኮ ዓኣንቴ ዞኦዜይዳ ኮኦሚጋፓ ጌኤሺ ዓሲ ፔና ማሊሲሢና፦ «ፔቴታዖ ዻቢንቲ ባኣዚ ታኣኒ ማዺባኣሴ» ጋዓኔ።

21 ሃይሦ ባኣዚ ዛላና ሳዓ ዓጊፃንዳኔ፤ ዬያ ኔኤኒ ጊቢ ዳንዳዒንዱዋሴ፤ ሃይሦ ሌሊቱዋንቴ ዖይዶኬ፤

22 ዬንሢያ፦ «ካራሚ ካኣታዻዛ፥ ቦኦዛ ዓሲ ሚሽካዛ፥

23 ዒፂንቴ ላኣሊ ዓሲም ሌዓዛ፤

ላኣሊ ካራሚታዖ ማኣሮ ዒንዶ ቤዛ ማቾ ማዓዛኬ።»

24 ዓጪዳ ጪንጩሞና ዔርቴ ዖይዶ ዻካ ዻካ ማዢንቲ ዓኣኔ፤

25 ዬንሢዳፓ ፔታሳዖ ዓንኮ፤

ዓንካ ዻካ ባኣዚኬ፥ ጋዓንቴ ዔያታ ፔኤኮ ሙዖ ዖጎፆና ቡኩሳኔ።

26 ላምዓሳዖ ሾኦኖ፤ ሾኦና ዶዲ ቦዖቱዋሴ፤

ጋዓንቴ ዔያታ ፔኤኮ ናንጎ ቤዞ ላሌ ባኣካ ኮሻኔ።

27 ሃይሣሳዖ ዓቢሢ፤ ዓቢሢኮ ካኣቲ ባኣሴ፤

ጋዓንቴ ቢያሢ ዳምቤና ባራኒ ሃንታኔ።

28 ዖይዳሳዖ ሞዾ፤ ሞዻ ኩቺና ዓዺንታኒ ዳንዳዓ፥ ፓሡዋ ማዢንቲ ማሊ ጴዼቴያ

ካኣቶ ማኣሮይዳታዖ ዓቱዋ ቢያ ቤስካ ጴዻኔ።

29 ሃንቲፃ ዎዛሳያ ማዔ ሃይሦ ባኣዚ ዓኣኔ፤ ዬንሢ ሌሊቱዋንቴ ዖይዶኬ፤

30 ዬንሢ ባካ፦ ካዮ ቦዖይዳፓ ዎልቄና ማዔያ፥ ሃሣ ዓይጎ ባኣዚያ ዒጊጪ ዓኣፖ ካሮ ሺርሹዋ ዞቢ፤

31 ዖቶርቂ ታኣካ ኮይዳ ዓዴና ዚያ ኮላይና፤

ዬያጉዲ ሃሣ ፔኤኮ ዴሮ ቤርታ ቦንቺንቲ ጴዻ ካኣቲ።

32 ኔኤኮ ዔኤዩማ ኔና ሄርሺንታያ ማዓንዳጉዲ ማሄም ፑርታ ባኣዚ ማዻኒ ኔ ቱኪ ዔቄቴ ታክ ጌይ ማሌ።

33 ዲኢቂ ዴቺንቴቴ ዖይሲ ኬስካኔ፤

ዓሲኮ ሲኢዺ ዹይንቴቴ ሶሶርቃኔ፤

ጎሪንቲ ማዢንቴቴ ዑራ ኬስካኔ።