1 ሃካፓ ሊካ ኬኤዚንታሢ ማኣሳ ዓጮ ካኣቲ፥ ሊሙዔኤሌም ዒንዳ ዞሬ ዞሮኬ።

2 «ናኣቢና ታኣኒ ሾዔ ናኣዚዮ፥ ሊሙዔኤሌ! ሂንዳ ኮሺ ዒናፓ ዋይዜ፤ 3 ሚርጌ ላኣሊ ዔኪ ዎልቆ ኔኤኮ ጋፒሲፖ፤ ዬያጉዴ ማዻ ካኣቶዋ ዓይሱዋዖ ዻውሲሴኔ።

4 «ሊሙዔኤሌ! ካኣታ ዎይኖ ዑዦ ዑሽካኒ፤ ሱኡጋኣ ካፄ ዑሺ ዑሽካኒ ሱኡካዻንዳያ ኮይሱዋሴ። 5 ዔያታ ዑሽኪ ማሢንቴቴ ዎጎ ዋላኔ፤ ሜታዼ ዓሶኮዋ ጌኤዞ ቄል ጋዓኔ።

6 «ሃይቃኒ ሳዛ ጋሽካ ዓሶና ዋኣዪ ናንጋ ዓሶናም ዎይኖ ዑዦንታ ማሣ ዑዦንታ ዒንጉዋቴ። 7 ዔያታ ፔኤኮ ዋኣዪፆና ማንቃቶና ዋላንዳጉዲ ዑሽኮንጎ።

8 «ታ ናዓሢዮ! ፔ ሜታሢ ዛሎ ኬኤዛኒ ዳንዳዑዋ ዓሶ ዛሎ ኔኤኒ ጌስቴ፤ ፒዜ ዎጌ ዴንቁዋዖ ሜታዼ ዓሶ ዛሎ ኔኤኒ ሞኦቲንቴ። 9 ዔያቶ ዛሎ ኔ ጌስቴ፤ ፒዜ ዎጌ ዔያቶም ዎጌ፤ ማንቆና ሜታዼ ዓሶ ዛሎናሮ ሞኦቴ።»

10 ኮሺ ላኣሊ ዖኦኒ ዴንቃኒ ዳንዳዓይ? ዒዛ ቦንቺንታያ ማዔ ሹጮፓ ባሼ ቦንቺንቴያኬ።

11 ዓኒ ዒዞኮ ዒዞ ጉሙርቃኔ፤ ዒ ኮዔ ባኣዚ ቢያ ዒዞይዳፓ ዴንቁዋ ዓቱዋሴ።

12 ዒዛ ናንጋ ዎዶ ቢያይዳ ኮሺ ባኣዚ ዒዛም ማዻንዳኣፓዓቴም ፑርታ ባኣዚ ማዺንዱዋሴ።

13 ማራይ ጋፓኔና ጉኡፂሲ ሱኮና ፓቲሌና ዓፒላ ዹይሲ፥ ዒዞም ኮሽኬያ ማዔም ማዾ ሌሊ ማዻኔ። 14 ኮርሞ ኮርማ ዓሶኮ ዋኣፆ ካኣሚሎጉዲ ሃኬ ቤሲ ዓኣዺ ዱማ ዱማ ሙኡዚ ዒዛ ቡኩሳኔ። 15 ዒዛ ፔ ማኣሮ ዓሶም ሙዖ ጊኢጊሻኒና ዒዞኮ ማዾ ማዻ ዓሶም ማዾ ጊሽካኒ ሃጊ ሳዓ ካሩዋንቴ ዔቃኔ።

16 ኮሺ ሳዓ ኮይ ዒዛ ሻንቃኔ፤ ዒዛ ማዺ ዴንቃ ሚኢሾና ዎይኔ ቱኮንዶ ቤሲ ጊኢጊሻኔ።

17 ዒዛ ጪንጫ ማዻያ ማዒፆ ሌሊቱዋንቴ ማዾናኣ ዶዲኬ።

18 ዒዛ ማዻ ባካ ቢያ ዒዞ ማኣዳያ ማዔሢ ዒዛ ዔራኔ፤ ዋንቶ ማዼ ጎይሣ ዒዛ ዎርቃሢሮ ፖዓ ዒዞኮ ሃይቁዋሴ፤

19 ዒዛ ፔኤኮ ቢላቢጮና ሱኪ ዓፒሎ ዹይሳኔ።

20 ማንቆና ሜታዼ ዓሶናም ዒዛ ዒንጋኔ።

21 ዒዞ ማኣሮ ዓሶኮ ቢያ ዖይዻ ማኣዓ ዓኣሢሮ ሻቺ ዋርቄቴታዎ ዒዛ ዓልቱዋሴ።

22 ሻኣሎ ዑፃ ሂኢሦ ዓፒሎ ዒዛ ማዣኔ፤ ዞቄ ዲንኪ ሼኤሜና ኮሾና ሚዛጲ ማኣዖ ዒዛ ማኣዓኔ።

23 ዓኒ ዒዞኮ ዓጮ ጋርቻ ቡኪንታ ጶኦካ ቦንቺንታያኬ።

24 ሻኣዣሲ ሱኪ ዹይሶና ዓፒሎ ዒዛ ሻንቻኔ፤ ኬርና ቱኮ ቃልሾዋ ኮርሞ ኮርማ ዓሳ ዒዞ ኮይላፓ ዔኪ ዴንዲ ኮርማኔ።

25 ዒዛ ዶዲ፥ ሃሣ ቦንቺንታያኬ፤ ሙካ ዎዶይዳ ቢያ ዒዛ ዎዛዺ ናንጋኔ።

26 ዒዛ ዔራቶና ጌስታኔ፤ ጊንሣ ሃሣ ኮሺ ዞሮዋ ዞራኔ።

27 ቢያ ዎዴ ማዾ ማዺ ማኣሮ ዓሶ ቶኦኮ ዒዛ ዛጋሢሮ ቤልፁሞ ዒዞኮ ባኣሴ።

28 ናኣታ ዒዞኮ ዒዞ ሄርሻኔ፤ ሃሣ ዓኒያኣ ዒዞ ጋላታኔ።

29 «ኮሺ ማቾ ማዔ ሚርጌ ላኣሊ ዓኣኔ፤ ኔኤኒ ጋዓንቴ ቢያፓ ባሼኬ» ዒዞም ጋዓኔ።

30 ሚዛጱሞ ጉሪኬ፤ ሱጉሢ ዴንቃ ዓሲ ማዒፃኣ ባባይቃኔ፤ ናንጊና ናንጋ ጎዳ ዒጊጫ ላኣሊ ጋዓንቴ ጋላቲንታንዳያ ኮይሳኔ።

31 ዒዛ ማዻ ባኮ ቢያ ዛጊ ዒዞ ጋላቱዋቴ፤ ዒዞኮ ኮዦ ማዾና ዓሲ ቢያ ቤርታ ዒዛ ቦንቺንታኒ ኮይሳኔ።