8 ሃይ ታ ኬኤዛሢ ቤርታ ኑ ዓዶንሢም ዒንጊንቴ ሃጊ ማዓንዳ ዎዛ ኩማንዳጉዲና ፆኦሲኮዋ ጉሙርቂንቲፃ ዔርታንዳጉዲ ኪሪስቶሴ ዓይሁዴ ማዒባኣ ዓሶም ማዻያ ማዔኔ ጌይኬ። 9 ኪሪስቶሴ ዓይሁዴ ማዒባኣ ዓሶም ማዻያ ማዔ ሜሌ ጎይፃ ዓይሁዴ ማዒባኣ ዓሳ ፆኦሲኮ ማኣሪፆ ዛሎ ጋላታንዳጉዲኬ፤ ዬይያ፦
«ዓይሁዴ ማዒባኣ ዓሶ ባኣካ ታ ኔና ጋላታኔ፤
ኔ ሱንፆዋ ዓይኑሞና ታ ጋላታኔ»
ጌይንቲ ፃኣፒንቴሢጉዲኬ። 15፡9 2ሳሙ. 22፡50፤ ዓይኑ. 18፡49። 10 ሃሣ፦
«ዒንሢ ዓይሁዴ ማዒባኣ ዓሳ
ፆኦሲ ዶኦሬ ዴሮና ዎላ ዎዛዹዋቴ»
ጌይንቲ ፃኣፒንቴኔ። 15፡10 ላሚ. ዎማ 32፡43።
11 ላሚ ሃሣ፦
«ዓይሁዴ ማዒባኣ ዓሳ ቢያ ፆኦሲ ጋላቱዋቴ፤
ዴራኣ ቢያ ፆኦሲ ጋላቱዋቴ»
ጌይንቲ ፃኣፒንቴኔ። 15፡11 ዓይኑ. 117፡1።
12 ዬያጉዲ ዒሲያሴ፦
«ዴሮ ቢያ ዑፃ ካኣታዻንዳያ
ዒሴዬ ዜርፃፓ ሾይንታንዳኔ፤
ዒዛይዳ ዓይሁዴ ማዒባኣ ዓሳ
ሃጊ ማዓንዳ ዎዛ ጌሣንዳኔ»
ጌዔኔ። 15፡12 ዒሲ. 11፡10። 13 ዒንሢኮ ሃጊ ማዓንዳ ዎዛ ዓያኖ ጌኤዦ ዎልቆና ዲጪ ዲጪ ዓኣዻንዳጉዲ ሃጊ ማዓንዳ ዎዞ ዒንጋ፥ ጎዳ ዒንሢ ጉሙርቄሢሮ ዎዛና ኮሹሞና ሚርጊሺ ዒንሢም ዒንጎም።