1 ጎሜ ማዺሢና ዴሮ ፔኤኮ ሄርቂ ዎይሥሢና ዒኢቴያ ማዒ ዋይዞ ዒፄ ዬሩሳላሜ ካታሜሎም ባዴዔ! 2 ዒዛ ዖኦማኣ ዋይዙዋሴ፤ ዞሪ ዒዞ ጎሮ ጎሮዋ ዒዛ ዔኩዋሴ፤ ናንጊና ናንጋ ጎዳኣ ዒዛ ጉሙርቁዋሴ፤ ፔኤኮ ፆኦዛሢ ባንሢያ ዒዛ ዑኩዋሴ። 3 ሱኡጋ ዒዞኮ ጉዻ ዞቢ ጉዲኬ፤ ዎጎ ዎጋ ዓሳኣ ዚራኣሮ ዓይሱዋዖ ዴንቄ ባኮ ቢያ ሙዒ ጋፒሳያ ናይዺንቴ፥ ዋንታኣ ያኣዮኬ። 4 ፆኦሲ ማሊፆ ኬኤዛዞንሢያ ዖቶርሙሞና ታንጋርጬያና ጌኔ ማሊሢያኣ ኩሜያኬ፤ ቄኤሳ ፆኦሲም ዱማዼ ቤዞ ዒዒኢሳያኬ፤ ዎጎማኣ ዔያታ ዋይዚ ዒፃያኬ። 5 ናንጊና ናንጋ ፂሎ ጎዳሢ ዒኢካ ናንጋኔ፤ ዒዚ ዻቢንቱዋሴ፤ ዒዚ ቢያ ኬሊ ፒዜ ዎጌ ዎጋኔ፤ ጉቶ ጉቶዋ ዬያ ማዺፆ ሃሹዋሴ፤ ፑርታ ማዻ ዴራ ጋዓንቴ ቦርሲንቱዋያኬ።

6 ናንጊና ናንጋ ጎዳ ሂዚ ጋዓኔ፦ «ሜሌ ዴሮ ካኣቶ ታኣኒ ባይዜኔ፤ ዔያቶኮ ዋርዲዮ ቤዞዋ ታኣኒ ሻሄኔ፤ ዔያቶኮ ጎይፆና ዖኦኒያ ዓኣዹዋጉዲ ታ ሴሚሴኔ፤ ካታሞ ታ ዔያቶኮ ዖኦኒያ ናንጉዋያ፥ ጉሪ ቤሲ ማሄኔ። 7 ታኣኒ ዬያ ቢያ ማዼሢሮ፥ ‹ታ ዴራ ታና ቦንቻንዳኔ፤ ታኣኮ ዞሪ ጎሮ ጎሮዋ ዔካንዳኔ፤ ዔያቶ ሄሌ ዞሪ ጎሮና ጎሪፆዋ ዔያታ ዋላዓኬ› ታኣኒ ጌዔኔ፤ ታኣኮ ዴራ ጋዓንቴ ሃቺም ፑርቴኔ፤ ፔኤኮ ፑርቶ ማዾናኣ ዒኢቴኔ።»

8 ናንጊና ናንጋ ጎዳ ሂዚ ጋዓኔ፦ «ዻካሮ ጊቢ ዳንዳዑዋቴ፤ ታኣኒ ዔያቶ ዑፃ ዎጋንዳ ዎዴ ዬዓንዳኔ፤ ሜሌ ዴሮንታ ካኣቶንታ ቡኪሲ ታኣኮ ዼኤፖ ዻጎ ታ ዔያቶ ዑፃ ኬይሳንዳኔ፤ ታኣኮ ዬያ ዻጎ ዎልቃዺፆፓ ዔቄያና ሳዓ ሙይንቲ ባይቃንዳኔ።

9 «ዬኖ ዎዶና ሜሌ ዴሮ ፒዜ ጌኤሲ ታኣኒ ጌስቲሳንዳኔ፤ ዬያ ታኣኒ ማዻንዳሢ ቢያ ዓሲ ታና፥ ናንጊና ናንጋ ጎዳኮ ሱንፆ ዔኤላንዳጉዲና ፔቱሞና ታኣም ማዻንዳጉዲኬ። 10 ዜሪንቲ ዴንዲ ናንጋ፥ ታና ካኣሽካ ዴራ ዒቶጲያ ዎሮኮ ሱካፓ ታኣም ዒንጎንዶ ባኣዚ ዔኪ ሙካንዳኔ። 11 ዖቶርቃ ዓሶና ሄርሺንታ ዓሶ ታ ዒንሢ ባኣካፓ ሺኢሻንዳሢሮ ታኣም ዒንሢ ዓይሢንቶ ዒፂ ዻቤ ዻቢንቶሮ ዬኖ ዎዶና ዒንሢ ቦርሲንታዓኬ፤ ሃካፓ ሴካ ታኣም ዱማዼ ዹኮይዳ ዴይ ዒንሢ ዖቶርቃዓኬ። 12 ዒንሢ ባኣካፓ ፔና ሂርኪዲ ሼሌዔዞንሢ ታኣኒ ዓይሳንዳኔ፤ ዔያታ ታና ጉሙርቂ፥ ታ ማኣዶዋ ኮዓያ ማዓንዳኔ። 13 ዲዒንታፓ ዓቴ ዒስራዔኤሌ ዴራ ዓይጎ ዓሲ ዑስካኣ ፑርታ ባኣዚ ማዻዓኬ፤ ሉኡዙሞዋ ሉኡቃዓኬ፤ ዔያታ ፔ ዻንጎና ጌሺያ ጌሻዓኬ፤ ዬያሮ ዔያታ ሙኡዚ ሙዒ ኮሺና ሃውሺ ናንጋንዳኔ፤ ዔያቶ ዒጊቻንዳ ባኣዚያኣ ባኣሴ።» ✝

14 ፂዮኔ ናዔሌ! ዓይናዼ!

ዒስራዔኤሌ ዴሬዮቴ!

ዓይናዹዋቴ! ዒላሹዋቴ!

ዬሩሳላሜ ዴሬዮቴ!

ጉቤ ዒናፓ ዎዛዹዋቴ።

15 ናንጊና ናንጋ ጎዳ ዒንሢዳ ዓጋኒ ማሌ

ፑርቶ ሜታሢ ሺኢሼኔ፤

ሞርኮዋ ዒንሢኮ ዒ ባይዜኔ፤

ዒስራዔኤሌ ዓሶኮ ካኣታሢ፥ ናንጊና ናንጋ ጎዳ

ዒንሢ ባኣኮይዳኬ፤

ሃካፓ ሴካ ባይሲንታ ኑና ሄላንዳኔ ጌይ ዒንሢ ዒጊጫዓኬ።

16 ዬኖ ዎዶና ዬሩሳላሜ ዛሎ ሂዚ ጌይንታንዳኔ፦

«ፂዮኔ ካታሜሌ! ዒጊጪፖ!

ኩጫ ኔኤኮ ዶጮፓ!

17 ናንጊና ናንጋ ጎዳ ማዔ ኔ ፆኦዛሢ ኔኤና ዎላኬ፤

ዒዚ ፔ ዎልቆና ኔና ባሺሳንዳኔ፤

ናንጊና ናንጋ ጎዳ ኔኤኒ ዎዛሳያ ማዓንዳኔ፤

ፔ ናሹሞና ኔና ዒ ዓካሳንዳኔ፤

ዴራ ቦንቾ ኬሊና ዓይኑሞና ዎዛዻሢጉዲ

ዒዛኣ ኔኤኒ ዎዛሳያ ማዓንዳኔ።»

18 ናንጊና ናንጋ ጎዳ ሂዚ ጋዓኔ፦

«ቦንቾ ኬሊና ዎዛዺንታ ዎዛጉዲ ታ ኔና ዎዛሳንዳኔ፤

ሃካፓ ሴካ ፔቴታዖ ኔ ቦርሲንታዓኬ።

19 ኔና ሄርቂ ዎይሣዞንሢዳ ቢያ ዬኖ ዎዶና ሜቶ ታኣኒ ዓጋንዳኔ፤

ኔኤኮ ዎቦ ዓሶ ቢያ ታኣኒ ዓውሳንዳኔ፤

ዱማዺ ዣኣሌዞንሢያ ማሂ ታ ቡኩሳንዳኔ፤

ዔያታ ቦርሲንታንዳጉዲ ማዾና ቤዞይዳ ቢያ

ቦርሲንቶ ዔያቶኮ ጋላታና ቦንቾና ማሂ ታኣኒ ላኣማንዳኔ።»

20 ናንጊና ናንጋ ጎዳ ሂዚ ጋዓኔ፦

«ዬኖ ዎዶና ታ ዒንሢ ቡኩሲ ጊንሣ ዒንሢ ዓጮ ማሃንዳኔ፤

ዒንሢ ዒንሢ ዓኣፖና ዛጋንቴ ታ ዒንሢኮ ዲዒንቲ ዔኮና ባኮ ማሃኣና

ሳዖይዳ ዓኣ ሜሌ ዴሮ ቢያሢ ባኣካ

ዒንሢ ቦንቺቴያና ዔርቴያ ማዓንዳኔ።»