1 ናንጊና ናንጋ ጎዳ ዒንሢም ሃቻቡሮ ዒርዚ ዋርቂሳንዳጉዲ ዒዛ ሺኢቁዋቴ፤ ዒርዚና ዓኣ ሻኣሬ ዳካሢ ናንጊና ናንጋ ጎዳኬ፤ ዒርዚንታ ዱማ ዱማ ባቃላ ባኮዋ ባቃልሳሢ ዒንጋሢ ዒዛኬ። 2 ሜሌ ፆኦዛ ፓሡዋ ባኣዚ ኬኤዛኔ፤ ዦዋኣ ሉኡዙሞ ባኣዚ ዴንቄኔ ጌይ ኬኤዛኔ፤ ማቂሢ ዓውቲያ ዓውታዼኔ ጌይ ጌስታኔ፤ ዔያታ ዓሶኮ ዒኖ ዶዲሻሢያ ጉሪ ማዔ ባኣዚናኬ፤ ዬያሮ ዴራ ሄንቃ ዓሲባኣ ማራይጉዲ ዣኣሊ ካራ ባይዜኔ።

3 ናንጊና ናንጋ ጎዳ ሂዚ ጋዓኔ፦ «ታኣኮ ዼኤፖ ዻጋ ታ ዴሮ ሄንቃ ሱኡጎ ታሚጉዲ ሙዓንዳኔ፤ ታኣኒ፥ ቢያ ባኮ ዎይሣ ጎዳሢ ታ ቆልሞ ማዔ ዪሁዳ ዴሮ ዓውሳኒ ኮዓሢሮ ዔያቶኮ ሱኡጎይዳ ሜቶ ታኣኒ ዓጋንዳኔ፤ ዪሁዳ ዴሮ ዖሊ ባሼ ዶዲ ፓሮ ታኣኮ ታ ማሃንዳኔ። 4 ዪሁዳ ዴሮ ባኣካፓ ሹዎና ማዦ ማኣራ ዎላ ካኣማ ካራ ጌሦ ሹጮጉዴ፥ ዓፒሎና ማዦ ማኣሮ ዾቆ ዓንጎጉዴ፥ ዖልዚ ዖሎ ሂኢሺጉዴ ሱኡጌንታ ዖሎ ዓሶ ዓይሣ ቢቲያ ኬስካንዳኔ። 5 ዪሁዳ ዴራ ፔኤኮ ሞርኮ ጎይሢ ዾቃሌጉዲ ሄርቂ ዳኣፃ፥ ዶዲ ዖልዚ ዓሲ ማዓንዳኔ፤ ናንጊና ናንጋ ጎዳኣ ዔያቶና ዎላታሢሮ ዔያታ ዶዲ ዖሊ፥ ፓራሢና ዖልታ ዎልቆና ዓኣ ዓሶ ባሻንዳኔ።»

6 «ታኣኒ ዪሁዳ ዴሮ ዖልዚ ዖላ ዶዲ ዓሲ ማሃንዳኔ፤

ዮሴፔ ማኣሮዋ ታኣኒ ዓውሳንዳኔ፤

ታኣኒ ዔያቶ ሚጪንቲ ቲኢራንዳሢሮ ቢያሢ ፔ ዓጮ ዓጮ ታ ማሃንዳኔ፤

ሃያኮ ቤርታ ፔቴታዖ ታ ዔያቶ ኬኤሪ ቤቂባኣያ ዔያታ ማዓንዳኔ፤

ታኣኒ ናንጊና ናንጋ ጎዳ ዔያቶኮ ፆኦሲ ማዔሢሮ

ሺኢጲፆ ታ ዔያቶኮ ዋይዛንዳኔ።

7 ዔፕሬኤሜ ዴራ ዖልዚ ዖላ ዶዲ ዓሲ ማዓንዳኔ፤

ዎይኔ ዑሺ ዑሽኬ ዓሲጉዲያኣ ዔያታ ዎዛዻያ ማዓንዳኔ፤

ዔያቶኮ ናኣታኣ ዬያ ባሺፆ ጶቂሢ ጶቂሢ ዎዛዻንዳኔ፤

ናንጊና ናንጋ ጎዳሢ ማዼ ባኮሮዋ ዔያታ ዎዛዻንዳኔ።»

8 «ታ ዴሮ ታኣኒ ታ ባንሢ ዉቲ ዔኤሊ

ፔቴይዳ ቡኩሳንዳኔ፥ ታ ዔያቶ ዓውሳንዳኔ፤

ሃያኮ ቤርታ ዔያታ ዓኣ ጎይፆ ፓይዶ ታ ዔያቶኮ ሚርጊሻንዳኔ።

9 ሜሌ ዴሮ ባኣካ ታኣኒ ዔያቶ ዜርቄያ ማዔቴያ

ዔያታ ናንጋ ሃኬ ዓጮይዳ ዓኣዖ ታና ጶቂሣንዳኔ፤

ዔያቶንታ ዔያቶኮ ናኣቶንታ ሼምፔና ዓኣያ ማዒ ፔ ዓጮ ማዓንዳኔ።

10 ጊብፄ ዓጫፓ ታ ዔያቶ ማሂ ዔኪ ዬዓንዳኔ፤

ዓሶኦሬፓኣ ዔኪ ዬይ ታ ዔያቶ ቡኩሳንዳኔ፤

ሳዓ ኩሜም ቤሲ ዔያቶኮ ባይቃንዳሢሮ

ጌሌዓዴንታ ሊባኖኦሴ ዓጮንታይዳኣ ታ ዔያቶ ዴይሣንዳኔ።

11 ዼኤፖ ሜቶ ባዞ ባኣኪና ዔያታ ዴንዳኣና

ታኣኒ፥ ናንጊና ናንጋ ጎዳ ዒኢካ ዔቃ ባዞ ጉዳሢ ጎሪ ዚቲዳንዳኔ፤

ዔታዼ ቁልቦይዳ ዴዒ ዓኣ ዓባዬ ዎሮ ዋኣፃኣ ሚጫንዳኔ፤

ዖቶሬላ ዓሶኦሬ ዻውሲንታንዳኔ፤

ጊብፄያ ካኣታቲ ዎይሣ ዎይሢፃፓ ኬዳንዳኔ።

12 ታኣኒ፥ ናንጊና ናንጋ ዔያቶኮ ጎዳሢ ዔያቶ ዶዲሻንዳኔ፤

ታ ሱንፆና ዔያታ ዖቶርቃንዳኔ።»

ዬያ ጌዔሢ ታና፥ ናንጊና ናንጋ ጎዳኬ።