Hebreus 8

6 Yhatti maaqqiko Yesuusa gancce gelii dabbothiza qaala caaqay, tiina qaala caaqaypp aadhizay gishos E ekkeez oosay unttiisaypp aadhiza. Yeyi eqqeezay aadhiz ufayis qaalayida.

7 Tiina qaala caaqayid boro baa maaqqeezako nam7inth qaala caaqo koshshooya. 8 Zini Goday eza borii, yhaygarkk yeegeeza:

«Taanii Isreele asayirannee Yihuda asayira

oroth qaala caaqo caaqqiza wode ye7oda.✝8:8-12 Erim. 31:31-34

9 Ye qaala caaqay ta u aditay Gibxxe biittapp kushe aykkii,

goochchii kesseez wode unttar caaqqeez caaqay garkk baaya.

Goday unttii ta caaqayid ammaninttekkazay gishos

taanii unttan olii ashsheeza yeegiza.

10 Zini yikkepp guye Isreele asayira

ta caaqqod caaqay yhaya yeegiza Goday.

Taanii ta higga u kahayid gaddoda;

u wozinayidakka xaafoda.

Taanii u Xoossa maaqqoda;

unttikka ta woya maaqqoda.

11 Unttapp oonkka fa shoora woy fa isha,

‹Goda eroba› yeegii tamaarssamii.

Unttii xiqqapp damma hellodayis

ubbay tana eroda.

12 Taanii u naaqa atto goda;

u qoha mahii qoppaamii»

yeegiza.

13 Xoossii yha caaqa «Orothi qaala caaqo» guussay tiinaasa cima maheeza. Yikkee, cimayinnee ceegay dhabiza wode helleeza.