Waannisa 9

Yesuusa to7a maaqqii yelintteez atha patheeza

1 Yesuusa yhanigittar yelintteezaypp to7a maaqqii yez pettii atha be7eeza. 2 E tamaaritay, «Asitamaarayyo, yha athay to7a maaqqii yelinttod garkk nagara ootheezay oonoo? E oothenenne eza yeleezitay ootheenee?» yeegii oyiceeza.

3 Yesuusa, «Xoossa ooso ezal afa benttod garkkepp attin E woy eza yeleezitay nagara ootheez gishos baaya. 4 Gallasa yezin tana kiitteezay oosa ta oothodayis beeziza. Oonkka oothodayis danda7oowa qammay yi7iza. 5 Taanii alamayid yezar alamayis poo7o» yeegeeza.

6 Yesuusa yeya gi sa7a cutteeza. Fa cuchchayir laafa biitta laakithii ye urqqayir to7a athay aafa tizheeza. 7 Yeezii, «Yhanigii Salihoome giz teqintteez haatha ne aafa meecinttoba» yeegeeza. (Salahoome guussay kiitintteeza guusii) Yeyi gishos, athay yhanigii fa aafa meecinttii bi7ittar maaqqeeza.

8 Athay shooritaynnee athay tiin woossodar be7eez asay, «yhayi bettii woossiza atha baasa?» yeegeeza.

9 Pettii pettii asay, «yhayi eza» yeegeeza.

Yhankkitay ma, «Wa77a, yhayi eza aazizapp attin eza baaya» yeegeeza.

Zin athay, «Ee, tana» yeegeeza.

10 Unttii eziko, «Yeezin ne aafay wayizii be7eenee?» yeegii oyiceeza.

11 E mahii, «Yesuusa giz athay xiqqa urqqa laakithii ta aafa tizhii, ‹Salihoome yhanigii ne aafa meecinttoba› yeegin, taanii yhanigii meecinttii bi7ii atteeza» yeegeeza.

12 Unttii eziko, «E aba yenee?» yeegii oyiceeza.

Athay, «Taanii erooya» yeegeeza.