Mateus 20

Woyne gancce oothiz ooso asitay aaziso

1 «Xooss kaatetithay fa woyne gancce ooso asita oosisodays wontta guura kezeez gade goda aaziza. 2 E ye ooso asitayis pettii gallasis pettii diinaare*20:2 Pettii diinaare: Pettii asii pettii gallas oothii peezhii ekkiza miishe. gachchodayis unttar giigii, unttan fa woyne gancce dakkeeza.

3 «Ma wonttapp hayidzii saate maaqqodar kezii ooso dhabin gaabel afa eqqeez hara asitakka denggeeza. 4 E unttiko, ‹Yinttikka ta woyne gancce yhanigii oothoytta, ta yinttis beeziza damooze gachchoda› yeegeeza. 5 Unttikka yhanigeeza. Maakka E usuppun saaterannee uddufun saater kezii yhay garkk ootheeza. 6 Taphpho pettii saate maaqqin E kezodar yhankkita eqqeezita denggii, ‹Yi ooso oothekka gallas muda yhaydda abis eqqii peezheenee?› yeegeeza.

7 «U mahii, ‹Nuna oosisiza asii dhabeez gishshosi› yeegeeza.

«Ezii, ‹Yinttikka ta woyne gancce yhanigii oothoytta› yeegeeza.

8 «Sa7a omathin, woyne goday ooso asitay halaqayiko, ‹Ooso asita xeegii guyepp ooso gelezitaypp aykkii tiina geleezita hellodays unttis damooze gachchoba› yeegeeza.✝20:8 Lewii. 19:13; Nam7i. 24:15 9 Taphpho pettii saater ooso aykkeezitay yi7ii, ommar ommar pettii pettii dinnare ekkeeza. 10 Tiina ooso aykkeezitay yi7ii, paas gaame inginttoda gi qoppeeza. Zin unttikka ommar ommar pettii pettii dinnare ekkeeza. 11 Fa miisha ekkii maaqqii gade godayil afa oolleeza. 12 ‹Yhayititay guyepp yi7ii pettii saate aadda ootheeza. Zin gallas muda awa mishar daaburii peezheez nuur unttii wayizii petto maaqqode› yeegeeza.

13 «Woynnee tukkeez goday ooso asitaypp pettayiko, ‹Ta ishayyo, taanii nena qohekkaya; ne taar giigintteezay pettii diinnares baasa? 14 Ne gishito ekkii ne kara qitoba. Ta omathi ye7eezayssikka neesay garkk immadayis koyiza. 15 Taanii ta miishayir koyeez baz oothodayis taasi mawute baasa? Woy taanii keeha maaqqeez gishos nena qinaatisinee?› yeegeeza.

16 «Yey garkk yhatte guyitay, tiinatoda ma tiinitay guyitoda» yeegeeza.✝20:16 Mat. 19:30; Mar. 10:31; Luq. 13:30