Hebreus 8

6 Ama thlǝr kǝra Yesu dlǝwuri a ndiyari nǝr nda, arya alkawal mbamba kǝra naja ngǝ tsupamǝ kǝra ndiya hahala nyi ta, arya alkawal mbamba nyi nji mbiya ar alkawal kǝra ndiya.

7 Maja abǝr alkawal mbamba nǝ tanggǝrma aˈyi tuwa mai, aˈyi nju ɓǝra gal nǝ mǝthlǝkura nyi kǝra ndiya mai. 8 Ta Hyal lari bikǝr nda, ba ji na,

"Pǝci wu shili, ǝngwar Thlagǝu,

yu nda mǝliya alkawal mbamba nǝ mafǝliyangǝ ǝnga njir Izirayila, ba ǝnga tsu culi Yahuda.

9 Aˈyi culi alkawal mbamba

kǝra yi mǝl ǝnga ǝjir ndaˈyar mai,

ar pǝci kǝra yi mbar pǝla nda

aga ya hǝbiya nda sara wu ˈyiˈyir Masaru,

arya nanda aˈyi taˈyi ǝnga alkawal ɗa mai,

ca ngǝ ɗa yi tǝkǝ ǝnga nda, ǝngwar Thlagǝu.

10 Najakǝ ngǝ alkawal mbamba kǝra yu sa mǝl

ǝnga njir Izirayila, ayukuɗa pidaˈyar kau,

ǝngwar Thlagǝu,

yu fuwa highiɓǝ ɗa wu ɗǝfuwa nda.

Yu tsǝfǝri wu huɗa nda.

Yu nggya Hyalǝr nda,

nanda tsu ndu nggya nji ɗa.

11 Aˈyi kǝl ndǝ a highiɓǝ anǝ tǝwul nyi mai,

alaga zamǝ nyi, ju na,

‘Ga sǝn Thlagǝu,’

Arya kalar ndu sa sǝn ɗa,

dzǝguya ar kusha nda baˈanǝ dǝgala nda.

12 Ara yu sa tǝfǝbiya nda bikǝr nda

aˈyi tsu yu ɓǝra ɗǝngari ǝnga sǝ ndzǝndzǝr nda mai."

13 Ta Hyal ngga kau, ǝnga alkawal mbamba mafǝliyangǝu, a cabiyari abǝr nǝ tanggǝrma ta a hiliri ba ji hal. Sǝra hil ǝnga sǝra hal wu sǝkar mai, ba ja tǝrabiya kabangǝkau.