23 Ayukuɗa sojaˈyar kǝ dlakǝya Yesu, ba ndǝ faˈari kar ha nyi, ndǝ tǝkǝya bwata foɗǝu, kǝ kalar soja hǝri bwata pathlǝu. Ndǝ ɓǝra hǝri lǝgutǝ dzǝgamǝ nyi kǝra aˈyi nji mbǝ mai, ama tsa nga nji tsa mbari a du kǝr baˈa a gyiwu ndǝl. 24 Kǝ ndǝ na wu pama nda, "Mǝna sara ta lǝgutǝ kǝ mai, ama mǝna tǝɗǝ shiˈwu a miya ndǝla nyi mǝna lari ndǝra wu sǝmku." Sǝˈyar kǝ ɗarkǝr aga ja nyabiya sǝra tsǝtsǝfau wu lǝkakaɗǝ nǝ Hyal kǝra na abǝr,

"Ndǝ tǝkǝya kar ha ɗa

wu pama nda,

ndǝ tǝɗǝ shiˈwu

ar kǝra lǝgutǝ ha ɗa."

Ya kǝja sǝra sojaˈyar kǝ mǝliya ngau. 25 Tataˈyi lǝha dzǝr wu dladlakǝ nǝ Yesu, ca ngǝ mǝnyi ǝnga kwamǝ nyi ǝnga Maryamu mala Kǝliyopasu ba Maryamu Magǝdaliya. 26 Ənggǝra Yesu lari mǝnyi a ndǝna ǝnga zǝmbǝlma kǝra ju yiwu ta tataˈyi lǝha dzǝr nyi, kǝ ji na anǝ mǝnyi, "Ama, kǝja zǝr ngau." 27 Əngwar ja anǝ zǝmbǝlma kau, "Kǝja mǝ ngau." Ənggǝ ngǝ zǝmbǝlma kǝ hǝr nyi a ndu ki nyi.