Yahwana 20

11 Maryamu nǝ nyi taˈyi a miya huwa nyi ja vǝr tiwi. Tsu ja vǝr tiwi, ba ji uzhau, ju tsamǝ gwu huɗa huwa nyi. 12 Maja vǝr tsamǝ, ba ji lari waladiˈyar mǝthlǝ wu kar pǝrtǝ ngganggashiu ar vira nji pina dza Yesu ar ta. Waladi pathlǝ a vǝr nggya a dar vir kǝra ja ǝnga vanyi tsu a gyar vir hiya ja.

13 Kǝ waladiya nyiˈyar yiwa nyi ndǝ na, "Mala, mi ngǝ ɗa gwu tiwi ya?"

Əngwar ja, "A hǝnar nda Thlagǝ ɗa sara ǝnggau, ya, nayi wu sǝni vira ndǝ hǝna nyi a ndar mai." 14 Ənggǝra ji kuɗǝna na abangau, ba ji shabiya dzau, ba ji lari Yesu taˈyi a ndǝna, ama naji tsamǝ ri abǝr Yesu ngǝ mai.

15 Kǝ Yesu yiwa nyi, ji na, "Mala, mi ngǝ ɗa gwu tiwi ya? Wa nga gu gala?"

Ma ju nggani abǝr ndǝr mǝl thlǝr wu fa wu ta ngau, ǝngwar ja anǝ nyi, "Malǝmǝ, ma nagǝ ngǝ hǝr nyi sara ǝnggau, nar ɗa vira gǝ fiya nyi ari, aga ya nda hǝr nyi."

16 Kǝ Yesu ngga nyi, ji na, "Maryamu." Ji shabiya dzǝ a ndara ja, ji na ǝnga miya njir Yahudiya, "Rabwani!" (Kǝra ca ngǝ Malǝmǝ.)

17 Əngwar Yesu anǝ nyi, "Ga sara mba ɗa mai, ara tsu yi gǝra sha a da ara Tada kwatahǝu. Ama ga maˈyi a ndara zamǝɗaˈyar ga nda nar nda, sha nga yi a dara Dǝɗa ǝnga Dǝrhyi, ba a dǝgya Hyal ɗa ǝnga Hyalǝr hyi."

18 Kǝ Maryamu Magǝdaliya maˈyi, ji nda nar nyi anǝ zǝmbǝlma nyiˈyar, "A lar yi Thlagǝu!" Kǝ ji nar nda sǝra Yesu nar nyi.