Lucas 18

Yesu Mbǝɗana Ndǝr Kǝdiyau Kǝra Lǝfau

35 Ənggǝra Yesu dla lǝhǝu wu dzǝri Yariko, kǝ ja ndǝ lǝfau a vǝr nggya ar thlǝr pa lagu, ja kǝdiyau. 36 Ənggǝra ji nggari nji gangǝu a vǝr tǝrabiya, kǝ ji yiwa sau ji na, "Mi nga vǝr ɗa?" 37 Kǝ ndǝ na anǝ nyi, abǝr, "Yesu ndǝr Nazǝratu nga vǝr tǝrabiya."

38 Kǝ ji hyaˈana ɗahǝu ji na, "Yesu! Zǝr Dawuda!*18:38 Najakǝ ngǝ thlǝmǝ kǝra nji nǝ nyi anǝ Yesu ndǝr mbǝɗa nji. Aˈyi cabiya abǝr Dawuda ngǝ tada yaya nyi mai, ama sara wu culi nyi ǝnggǝra nabi ɗǝɗǝmˈyar nana. Tsamiya Luk 1:32; 4:31. Tǝhuɗǝ ǝgya yau!"

39 Njira a dumwa ndǝ kughi anǝ nyi aga ja haɗiya miya ja. Ama kǝ ji ɓǝra hyaˈana ɗahǝu gagaɗau ja vǝr na, "Na gǝ, Zǝr Dawuda, tǝhuɗǝ ǝgya yau!"

40 Kǝ Yesu taˈyau, ji na, "Shila mau ǝnga ja ǝnggau." Ənggǝra ji shili lǝhǝu, Yesu yiwa nyi, 41 "Mi nga gu yiwu ya mǝliya nga?" Kǝ lǝfǝ kǝ shaɗǝwa, ji na, "Thlagǝu, ya yiwu ya lari sau."

42 Yesu na anǝ nyi, "Lari sau! Mbǝrsa ngau a pahǝnari liya gau."

43 Aga zǝmǝ kǝ liya ja lari sau, kǝ ji nu Yesu, ja vǝr dlǝvǝ Hyal. Ənggǝra nji lari sǝ kǝ ɗa kau, kǝ ndǝ patǝ fal Hyal.