Lucas 8

Yesu Kughi Anǝ Majigwal

22 Vanyi pǝci Yesu ǝnga zǝmbǝlma nyiˈyar gwu kwambwal, ba ji na anǝ nda, "Mǝna maˈyi a biyar ya dǝl." Kǝ ndǝ mbar lagu ndu maˈyi. 23 Ənggǝra nda vǝr maˈyi ba ji ghanyi. Kukuthlǝu, kǝ majigwal shili ǝnga dǝnama ja vǝr sǝ a shili ar ˈyimi, ǝnggau, ba ndǝ ɗa tǝtǝwulu ara ǝnggǝra ˈyimi gwu kwambwalǝr nda. 24 Zǝmbǝlma nyiˈyar, hyabiya Yesu wu ghanyi, ndǝ na, "Thlagǝr ki! Thlagǝr ki! Kǝja mǝna sa!" Yesu hyaˈari kǝ ji kughiya majigwal ǝnga ˈyimi kǝra a vǝr thlǝkau, ba ndǝ bǝgǝ zǝmǝu. 25 Kǝ ji na anǝ zǝmbǝlma nyiˈyar, "Əmani ngǝ mbǝrsar hya?"

Kǝ hivǝr mbar nda gagaɗau, ndǝ na wu pama nda, "Wathlǝmǝ culi najaka nda? Patǝ ǝkkǝˈyi majigwal ǝnga dǝl wu gǝnggǝr nyi sǝli ka?"

Yesu Mbǝɗana Ndǝra Ənga Mambǝl Ɗǝmwaˈyu

26 Yesu ǝnga zǝmbǝlma nyiˈyar nda vǝr maˈyi wu kwambwal ar ˈyimi, ba ndǝ dla wu ˈyiˈyi nǝ Garasina, kǝra a biyar ya dǝl Galili.