Matiwu 3

Tǝtǝlna Ndǝr Hyal Nǝ Yahwana Ndǝr Mǝl Baɓǝtizǝma

1 Ayukuɗa fa gangǝ tǝrabiya, ngǝ Yahwana ndǝr mǝl Baɓǝtizǝma shili, ja vǝr tǝtǝlna ndǝr Hyal ar tagǝ nǝ ˈyiˈyir Yahudi, 2 ju na, "Hya tubi, ara tǝlkur Hyal a ɗari lǝhǝu." 3 Naja ngǝ ndǝra nabi Əshaya ndǝr ar kǝri, ji na,

"Ɗahǝ a vǝr ngga a gwar tagǝu,

ja vǝr na,

‘Hya pabǝri nyi lagu anǝ Thlagǝu,

hya mǝliya lagu tataˈyi pir

wu mwa nyi.’ "

4 Lǝgutǝ ha nǝ Yahwana ǝnga shisha dlǝgwam nga nji mǝliya. Sǝr mba sar nyi ca ngǝ takulagǝ ci. Sǝr sǝm nyi tsu ca ngǝ ndzǝkwa ǝnga ˈyimir ciɗi tagǝu. 5 Njira maˈyi a ndǝgya ja nji sara wu Urshalima ngau ǝnga patǝr ˈyiˈyir Yahudi ǝnga patǝkura ˈyiˈyir dǝl Urdǝnu. 6 Ndu nana bikǝr nda, kǝ ji mǝliya nda baɓǝtizǝma wu dǝl Urdǝnu.