1 Samuel 1

10 K’ọmmamma kw’owobh-ẹ k’ettem, Hana obhom, ozi njọhm ọnang Ọvaar Ibinọkpaabyi. 11 Ọn-ọtzọkha ọnwọhngi, oben bi, "O Ọvaar Ibinọkpaabyi kw’Ẹfa biphyir, idikha kọ afha are ọmmamma kwa kaam ọtzọhmnọng kwọ, abira ajim-m, ọtzọhmnọng kwọ karaam, anang-m nnwa kw’ijinọng, kaam ńdọkh-ẹ nnang-ọ k’akpen pẹ biphyir, ẹkpẹr manda dani ch’ephyuri isisa sẹ kéde."

12 Wa mada Hana ochin ororo om-ozi njọhm ọnang Ọvaar Ibinọkpaabyi, Ẹli om-okhẹ-ẹ otzum k’ẹmma. 13 Wa Hana om-ozi njọhm k’ettem ẹtzaanga, mmakpa sẹ mminyebh, yina, ọwọhng k’iyaan koyini. Mẹ wọ, Ẹli on-ochibhi bi, Hana ọkk’atzuk obuma. 14 On-oben-ẹ bi, "Ogbe obhir otzuma yan, kwa kọ awobha k’etzuk-buma o? Kwọbha ibubuma sọ."

15 Mẹ wọ, Hana on-obhina bi, "Itta kwaam, kwẹ mando kode. Kaam nde kwanọng kw’owobh k’ọmmamma kw’ideden e. Kaam atzuk manda bani ndimi mmingwa, kaam mmimgbaak Ọvaar Ibinọkpaabyi ọmmamma kw’ettem chaam e. 16 Kọ, kaam ọtzọhmnọng kwọ mach’inọng-dama kàtzọkha. Kaam mminzi njọhm s’ifon k’iyayakhi-dik saam s’ideden, ttara ittem-dọkhiji-dik saam e."

17 Mẹ wọ e, Ẹli obhin-ẹ bi, "Kọ rọhng k’odidiri. Tte Ibinọkpaabyi kw’anọng p’Israẹl akpobh, ọnang-ọ idik s’akk’ẹ aphyema."

18 Hana obhin-ẹ bi, "Tte kaam ọtzọhmnọng kwọ ndọkha ọphyaam ka kọ k’itzitzikha." Mẹ wọ, on-okpira itzitzikha, obiro ofona ọtza ochi ọchattọhk.

19 K’ekpekpebha ch’ewu ehobh, bẹ abina atza akpobha Ọvaar Ibinọkpaabyi. Mada bẹ akk’akyera, bẹ akpa nnam abhana ka Rama, kw’ode obhon kwabẹ. Iwa Ẹlkana oyima Hana abẹ, Ọvaar Ibinọkpaabyi ọbhaanga njọhm sa Hana. 20 Okwu opyiri k’ogbe mẹ, Hana otzima ibhọr, ọmaan ojinọng, ọkpẹ-ẹ Samwẹl*1.20 K’eHiburu, Samwẹl ede che ch’eyini odik, ebir ekher ọwọhng kw’ode bi, "Che chẹ ede Ibinọkpaabyi." Wa Hana ọnangi nnwa kwẹ che nda ifha ọnang Ọvaar Ibinọkpaabyi abarada, okhuri da Ọvaar Ibinọkpaabyi ọnang-ẹ ebhina k’ephyema chẹ., oben bi, "Kaam mphyem-ẹ k’Ọvaar Ibinọkpaabyi."