1 Samwẹl 19

11 Wa Saul ọtzọhm ajinọng bẹ atza abaabha ọhọhm kwa Devid m’erungiwu nduma, ifha bẹ afhẹ-ẹ k’ekpebha. Yina, wa Mikal, kw’ode kwanọng kwa Devid, ọtzọr odim Devid itzọhng bi, "Idikha an-arori bi ape m’erungiwu cha mayina, arọbh akkaana akpen pọ, ophyini bẹ afhọ-ọ ofhu e." 12 Mẹ wọ, Mikal orenga ka ọmma kw’ikhakhari kw’echumi ọkkaana Devid. Devid ọrọbh ọnaanga. 13 Mikal e, ọn-ọtzọkha ọgbatza oruri k’eyima, ọtzọkha ẹnọhmakpa obubh-ẹ, obiro ọtzọkh-ẹ ọnana eho k’ichikhuma s’ivu-phyubha.

14 Mada Saul ọtzọhmi ajinọng mba bi, bẹ atza abọkha Devid, Mikal ọgbaak bẹ bi, "Devid ọmmẹ-ẹ ọmma e."

15 Mẹ wọ, Saul ọtzọhm ajinọng mbuma bẹ akpa nnam ka Devid, oben bẹ bi, "Bọng din-ẹ k’eyima chẹ ch’oyim achen-m, ifha mfhẹ-ẹ." 16 Yina, mada ajinọng mba an-adimi k’ọhọhm kwa Devid, bẹ atza are bi, ọgbatza kw’ọnan eho k’ichikhuma s’ivu-phyubha wọ oyim kẹ.

17 Wa Saul ọn-ọbọbh Mikal bi, "Ode yan kw’abọr-m manda maa, asi ọttattaanga-nọng kwaam ọrọbh o?"

Mikal obhin-ẹ bi, "Kẹ oben-m bi, ‘Idikha nnẹ-ẹ ọbọhk ntte ọrọbh, kẹ ófhu-m ófhu.’ "

18 Mada Devid ọkk’ọrọbha otza okhebha Samwẹl ka Rama, ọtzọkha odik kpenamkpen kwa Saul ọkk’ẹ ọsa ọgbaakh-ẹ. Mẹ wọ, kẹ ttara Samwẹl bẹ afona achina ka Naiyọt atza aruk kẹ.