1 Samwẹl 2

Hana ọtzọhng Ibinọkpaabyi

1 Mẹ wọ, Hana ozi njọhm oben bi,

"Kaam ngaam ọdadaami kw’ideden k’ettem chaam k’Ọvaar Ibinọkpaabyi;

Ọvaar Ibinọkpaabyi ọkk’aam ẹfa ch’ekhema*2.1 EHiburu ẹkkẹri bi, "Obhik kwaam okk’otzini k’ẹrọng k’Ọvaar Ibinọkpaabyi." Ọwọhng nwa oyini bi, "Ọvaar Ibinọkpaabyi ọkk’aam ẹfa ch’ekhema ọnanga." ọnanga.

Kaam nsi ẹmma nnang attattaanga-nọng paam,

kaam ndaami ettem, okhuri ẹnaanga cha kọ akk’aam ananga.

2 "Ọnọng kode kw’owuri macha kọ Ọvaar Ibinọkpaabyi;

ọnọng ọdọdọk kode kw’oyongi kọ Ọvaar Ibinọkpaabyi;

Ẹtzakpa kede ch’ẹgaangi mach’Ibinọkpaabyi kwaman.

3 "Bọng ka mgbagbaakha kàge,

Bọng ẹmma kàben,

okhuri bi, Ọvaar Ibinọkpaabyi ode Ibinọkpaabyi kw’eronga,

kẹ wọ ọm-ọttọhna aponga p’osisi kw’anọng.

4 "Ayuk p’akkakkaama akk’aphyakhi,

yina, anọng p’asar atto, akk’ẹfa abira akhaama.

5 Anọng mbuma p’iwa am-achi adọhbh, an-ayini ayok abẹ yina bẹ an-are ọchattọhk,

yina, ayok mbuma p’iwa am-ayima okwo, an-achi ọchattọhk adọhbh.

Kwanọng kw’iwa ọkpaan-ọkpaana, okk’va azenamfa ọn-ọmmaana,

yina, oyok kw’iwa okk’va ọmmaana k’ọhaabh, manda wani dọk kọ̀khaam.

6 "Ọvaar Ibinọkpaabyi wọ otzim obo, obiro otzima akpen;

kẹ wọ otzim apfura ochina k’opfura-bhon, obiro otzima bani ọkpa nnam.

7 Ọvaar Ibinọkpaabyi wọ ọtzọhmi opyibhada, obiro ọtzọhm ojibhaada;

kẹ wọ ọm-ọhakha anọng bani ewobha, obiro otzini ayok bani k’ẹrọng.

8 Kẹ wọ om-otzini agbogbora k’ọkpọm, obiro otzini anọng p’arukhi k’owora k’ẹraamma.

Otzini bẹ ohok ẹwọr k’ibe s’avaar-vaara, obiro osi bẹ atzọkha mvaar-chi s’ikpokpobha.

"Ọvaar Ibinọkpaabyi wọ ọkhaam ittẹwọr s’ọyagbin;

okk’ọyagbin otzini ọnana m’atza mba.

9 Kẹ wọ ọ́baabha orenga kw’anọng pẹ p’akhaam nnam-ophephe,

yina, kẹ wọ ódimi anọng-dama k’ipyerungi.

"Ẹfa arang ch’ọnọng om-otzima okhema erima,

10 Ọvaar Ibinọkpaabyi ódimi anọng p’arim-ẹ abẹ odimi.

Kẹ owobha k’ẹrọng otto bẹ etzum,

Ọvaar Ibinọkpaabyi wọ ọ́kpaara aponga p’ọyagbin biphyir.

"Kẹ ọ́nang ọvaarnọng kwẹ agbọhkhiji,

ọnang kẹ nwuma kw’okk’ana obyengi k’eho ẹfa ch’ekhema."