2 Avaar 4

Nnwa kwa kwanọng kw’ofon Shunẹm ọphyọbh k’obo

8 Iwa ewu dani, Elisha ọtza ka Shunẹm, kẹ da kwanọng wani kw’ọbọhk ọyaang-ọyaanga orukhi, kw’ọchọhm-ẹ bi, owobha ochi ọttọhk. Mẹ wọ osi, ogbe kpenamkpen kw’oreng mẹ, ọyaakha ochi ọttọhk. 9 Kwanọng nwa oben odim bi, "Kaam nnong kẹ bi, ojinọng nwa kw’om-orenga ọkwọbha ma, ode ọsẹjaakhi kw’Ibinọkpaabyi e. 10 Tte mosi imaanggọkha k’ọhọhm ebir-ebir, mọtzọkha eyima, ọmaana okpokkoro, ọmaana ogbera, akwu attara k’otwikhikkaang ober-ẹ mẹ, ifha om-owobha mẹ k’ogbe kpenamkpen kw’okwu odibh man."

11 Iwa ewu dani, mada Elisha okwu, ovura otza oyima k’ẹmaanggọ chẹ. 12 Oben Gehazi bi, "Yeri oShunem-kwanọng nwuma okwu." Mando kw’oyer-ẹ, kwanọng nwa okwu obe Gehazi k’itzitzikha. 13 Elisha oben Gehazi bi, "Gbaak kwanọng nwa bi, ‘Kọ akk’ọyayaakhi nwa biphyir asa okhuri man. Na gbaak man ọttọhk fa mọfha osi ọnang-ọ. Mọgbaak atzim ọnang ọvaarnọng k’eho chọ ọ, ode bi, odenho kw’arim-egbong wọ kw’am-ọgbaak atzim k’eho chọ ra a?’ "

Kwanọng nwa obhina bi, "Mma e, kaam ngaam oruk k’ottem kw’anọng paam kẹ e."

14 Mẹ wọ osi, Elisha ọn-ọbọbh bi, "Mbọng fa mọfha osi ọnang-ẹ?"

Gehazi oben bi, "Kwanọng nwa nnwa kw’ijinọng kọkhaam e, ayongi mẹ, odim ọkk’ọtzam e."

15 Elisha oben bi, "Yer-ẹ okwu." Mando kw’oyer-ẹ okwu obe m’ọmma. 16 Elisha oben bi, "Ikhina cho nnamanda, awọkha nnwa kw’ijinọng ka ngọhnga sọ."

Kwanọng nwa obhum odik nwa, oben bi, "Mma e, itta kwaam, tzotzokhaan kaam ọtzọhmnọng kwọ, kabọhra e!"

17 Iwa kwanọng nwa okwu otzima ibhọhr, okwu opyiri m’ogbe nwuma wani kwa cho kw’Elisha ọkk’ẹ ọgbaakha, ọmaan nnwa kw’ijinọng.

18 Mada nnwa ọkk’ọbara, ewu dani, ofona ọtza okhebha otte kẹ da owobh ttara anọng bani p’am-asi ipha. 19 Oben otte bi, "Eho chaam e! Eho chaam e!"

Otte oben ọtzọhmnọng wani bi, "Tzin-ẹ achena ọkka." 20 Mando kw’ọtzọhmnọng nwa otzini nnwa nwa ochena ọkka. Nnwa owobha ọkka ẹwọr ka ndaak maa, opyiri k’ẹya, okponga mẹ ope. 21 Kwanọng nwa otzini nnwa nwa ọtza oruri k’eyima ch’ọsẹjaakhi kw’Ibinọkpaabyi, ọtzọkha ọmma ọgbak, ofona.

22 Mẹ wọ ofon, kwanọng nwa oyeri odim, oben bi, "Tzotzokhaan, tzọhm ọtzọhmnọng wani ochen-m ẹnyanyaang, ifha nda k’ibe s’ọsẹjaakhi kw’Ibinọkpaabyi ẹbhar-ẹbhar, mkpa nnam."

23 Odim ọn-ọbọbh bi, "Ode yan kw’an-abeni bi, atza kẹ mayina? Ọdadaami kw’Ophe Ọbhakwẹ arang, Ẹwọhngkwokhawu arang dọk."

Kwanọng oben odim bi, "Odik kode."

24 Kwanọng nwa odo ẹnyanyaang ewobha, yina on-obeni ọtzọhmnọng kwẹ bi, "Yaar ẹbhar-ẹbhar; kàkwọhbha maa, mben-ọ bi, akwọhbha." 25 Mando kwa kwanọng nwa ofon ọtza okhebha ọsẹjaakhi kw’Ibinọkpaabyi k’Egbegbeho cha Karmẹl.

Mada ọsẹjaakhi ore kwanọng nwa da om-okwu k’ororo, oben Gehazi bi, "Kker e, oShunem-kwanọng nwuma wọ om-okwu mẹ e! 26 Rọbh atza abọbh-ẹ bi, ‘Ode yan o? Odim ọmaana nnwa kwọ osi bẹ yan o?’ "

Kwanọng nwa oben bi, "Odik kode."

27 Mada okhebh ọsẹjaakhi kw’Ibinọkpaabyi k’egbegbeho, ọbọkha ọsẹjaakhi ka mmokpatzọkhi. Mando kwa Gehazi okwu onyun-ẹ, yina, ọsẹjaakhi kw’Ibinọkpaabyi oben bi, "Tte ọbọhk! Kkeri, ettem dọ epyibh-ẹ, yina, Ọvaar Ibinọkpaabyi kwẹ otzim ọjaakhi ọnang-m, kaam kwẹ otzim ọgbaakha."

28 Kwanọng nwa, oben bi, "Itta kwaam, iwa nkk’ọ nnwa mphyema? Wa kọ kimbeni bi, ‘Aningi achibhi paam agbyokhi’?"

29 Elisha oben Gehazi bi, "Kpa mkpansin atzima abọkha ọnọhma-baba kwọ, atzọkha ochikhura kwaam, arọhng. Ọnọng manda wani k’eden kàrima. Ọnọng orim-ọ, ẹmọng kàsi. Tzọkha ochikhura kwaam anana nnwa nwa k’itzitzikha."

30 Yina, ọkka kwa nnwa nwa, oben bi, "K’odem kw’Ọvaar Ibinọkpaabyi orukhi akpen, kọ abira aruk akpen, kaam kọ ọbọhk kíntte." Mando kw’Elisha obin otzor-ẹ nnam.

31 Iwa Gehazi ofona bi gbẹng ọtza ọnana nnwa nwuma ochikhura nwa k’itzitzikha, yina, nnwa nwa konyengi, ẹmọng kobiro osi. Mẹ wọ osi, Gehazi ọkpa nnam ọtza ọgbaak Elisha bi, "Nnwa nwa kọphyọbh."

32 Mada Elisha opyiri k’ọhọhm, ore da nnwa-bukhi oyim k’eyima cha kẹ Elisha. 33 Odim obhen ọmma okpori kẹ ọmaana nnwa-bukhi k’ẹtzaanga, ozi njọhm ọnang Ọvaar Ibinọkpaabyi. 34 Mando kw’ovur k’ebin, oyima ọkpẹkhi nnwa nwa, ọnan-ẹ ẹmma k’ẹmma chẹ, chen ka chen pẹ, ọmaana mbọhk ka mbọhk sẹ. Mada onemi for sẹ k’ebir-ebir kwa for sa nnwa nwa, nnwa nwa ọttẹwọr ọpọhkha ka fọr. 35 Elisha obina orenga ọkhọri ẹmaanggọ, ọkpa nnam ọtza ovura k’eyima, obiro onemi for sẹ k’ebir-ebir kwa for sa nnwa nwa. M’ogbe nwa, nnwa on-ozi ikpeni igbe izenamfa, obiro okwonga chen.

36 Mẹ wọ ofon, Elisha oyeri Gehazi, oben bi, "Yeri oShunem-kwanọng nwuma." Gehazi osi mando. Mada okwu opyiri, Elisha oben bi, "Tzọkha nnwa kwọ." 37 Mando kwa kwanọng nwa odimi k’ẹtzaanga, otto Elisha ma ndọkhi obiro okhubha itzitzikha k’irerek. Ọtzọkha nnwa kwẹ otzima ofona.