Gênesis 18

23 Abraham orenga otzor Ọvaar Ibinọkpaabyi ka for, ọbọbh-ẹ bi, "Ma, na kọ atzọkha anọng p’asi ẹmmaana ọkkakka, afhu attara k’anọng p’asi ẹmmaana-tzama o? 24 Idikha ira kọ are, anọng arọbh afa obhiri jobh, p’asi ẹmmaana ọkkakka m’obhon nwa, na ira kọ akhọkha anọng mba nkwu-osisi, atte obhon nwa ọbọhk o? 25 Tzọmi-tzọmi okponga k’idachen bi, kọ atzọkha anọng p’asi ẹmmaana ọkkakka attara k’ayok p’asi ẹmmaana-tzama afhu. Ka yan wọ kw’ira ọkpaar-aponga kw’ọyagbin biphyir, oni odik kw’otzor-otzor osi o?"

26 Mẹ wọ, Ọvaar Ibinọkpaabyi obhin-ẹ bi, "Idikha kaam nne anọng arọbh afa obhiri jobh, p’asi ẹmmaana ọkkakka m’obhon nwa, kaam ńnenga anọng mba abẹ, ńtte obhon nwa ọbọhk."

27 Mẹ wọ, Abraham obhin-ẹ, oben bi, "Tzotzokhaan, Ọvaar Ibinọkpaabyi kwaam, kaambi, ode bi, nde idọdọhbh, mbiri nde itzọtzọhng macha nde ma, kaam mbar ettem mgbaak atzim nnang-ọ. 28 Idikha on-ode bi, anọng azen kade k’anọng arọbh afa obhiri jobh ma obhon nwa, p’asi ẹmmaana ọkkakka khi, ma na ira kọ adimi obhon nwa, okhuri anọng azen o?"

Ọvaar Ibinọkpaabyi obhin-ẹ bi, "Mma e, idikha kaam nne anọng arọbh afa obhiri azen, p’atzor-otzor, kaam ngọkha bẹ nkwu-osisi ọkhọkha, ńtte obhon nwa ọbọhk."

29 Abraham ochina ororo ọbọbh-ẹ bi, "Idikha ira on-ode bi, kọ are anọng arọbh afa, p’asi ẹmmaana ọkkakka, ma na ira kọ adimi obhon nwa o?"

Ọvaar Ibinọkpaabyi obhin-ẹ bi, "Mma e, okhuri anọng mba arọbh afa, kaam ńgọhkha bẹ nkwu-osisi ọkhọkha, ńtte obhon nwa ọbọhk."

30 Mẹ wọ, Abraham obhin-ẹ bi, "Tzotzokhaan Itta, oning-ọ obhemi, tte nchina ororo mphyem-ọ. Idikha ira on-ode bi, kọ an-are anọng ẹrọbh obhiri jobh ma obhon nwa khi?"

Ọvaar Ibinọkpaabyi obhin-ẹ bi, "Mma e, idikha kaam nne anọng ẹrọbh obhiri jobh, kaam ira ntte obhon nwa ọbọhk otte."

31 Mẹ wọ, Abraham oben bi, "Mada kaam nkk’ettem mbara bi, mphyem-ọ, tte mbiri mbọbh-ọ. Idikha ira on-ode bi, anọng ẹrọbh bẹ-bẹ bọ p’are ma khi?"

Ọvaar Ibinọkpaabyi obhin-ẹ bi, "K’odik ọkkakka, ira nne ọnọngmik-dema nwa, ka nho s’anọng mba ẹrọbh, kaam ira ntte obhon nwa ọbọhk otte."

32 Mẹ wọ, Abraham oben bi, "Tzotzokhaan Itta, tte oning-ọ obhemi, tte nna mphyem ogbe nwa wani. Idikha ira bẹ an-ade anọng jobh bẹ-bẹ khi?"

Obiro obhin-ẹ bi, "K’odik ọkkakka, ira nne ọnọngmik-dema nwa, ka nho s’anọng mba jobh, kaam ira ntte obhon nwa ọbọhk otte."

33 Mada Ọvaar Ibinọkpaabyi okk’atzim ọgbaakha biphyir ttara Abraham, ofona. Abraham obiro ọkpa nnam k’ikhira sẹ.