Mateus 21

A̠zizo̠s A̠d̠igh d̠a̠ A̠zeruse̠le̠m ma̠ Agu̠o̠ O̠li̠le̠ma

1 Igiel bho̠ awa na̠ etua̠n A̠zeruse̠le̠m bho̠, sa̠ i̠gbari̠ d̠a̠ igu Roliv d̠a̠ e̠ma Abe̠tfagi̠. Sa̠ A̠zizo̠s a̠ruom a̠duom i̠wal ogbo atu̠ghan d̠o̠yo̠. 2 Sa̠ i̠na agba a̠nigha̠ awa ma̠a̠, "I̠gi̠e̠ d̠a̠ e̠ma wa̠ a̠sumogha̠n inyin bho̠, sa̠ inyin ta̠ o̠bi̠gh okubh ado̠ki̠ ola̠ u̠kpu̠o̠m na̠ o̠nyi̠ d̠o̠yo̠. I̠ko̠gi̠o̠ne̠ awa ma̠ ebhin eruom ami̠. 3 Sa̠ ku̠gba ma̠ o̠ni̠ a̠pura̠n inyin abar, i̠wo̠rane̠ ma̠a̠, Wa̠nwuna̠ bho̠ na̠ abho̠ro̠ghan orughom, sa̠ i̠na ta̠ a̠ma̠ra̠ a̠nigha̠ inyin."

4 Eb̠la̠ i̠nye̠n imite ma̠ agu̠o̠ ola̠ omuzughod̠iom iwowa̠ ya̠ owil bho̠ a̠wa̠ bho̠, ma̠a̠:

5 "I̠gba ma̠ enigha̠ ma̠ O̠nyani̠ ta̠ Azayo̠n ma̠a̠,

‘Kpone, O̠li̠le̠ma d̠oyom na̠ a̠ru d̠oyom,

ti̠to̠i̠ny d̠a̠ anyu̠ ado̠ki̠,

olobhiri o̠nyi̠ ado̠ki̠, e̠nam a̠dol.’ "*21:5 Azak 9:9

6 Sa̠ ogbo atu̠ghan bho̠ i̠gi̠ ka̠ igir agu̠o̠ A̠zizo̠s a̠ruom awa bho̠. 7 Sa̠ awa ibhin ado̠ki̠ bho̠ na̠ olobhiri o̠nyi̠ ado̠ki̠ bho̠ iru, sa̠ ibhin rakapa d̠awa i̠de̠ d̠a̠ anyu̠ rado̠ki̠ bho̠, ma̠ A̠zizo̠s od̠igh orile. 8 Sa̠ obom o̠lo̠gh a̠nwunom i̠de̠de̠gi̠ ma̠ ibom rakapa d̠awa d̠a̠ eten bho̠, sa̠ ipa̠n a̠nwunom isobhi ma̠ igologo a̠d̠e*21:8 Iriren ya̠ i̠ro̠ ma̠ esi bho̠ bha̠ ra̠d̠e. Igologo ra̠d̠e d̠awa bho̠ ekper epu ma̠ ita̠ i̠yar. ibhin i̠de̠de̠gi̠ d̠a̠ eten bho̠. 9 Sa̠ ro̠lo̠gh ogele i̠ro̠ d̠a̠ ed̠ia̠ na̠ d̠a̠ aman d̠o̠yo̠ bho̠ imulughu ma̠a̠,

"Itutumeni e̠ro̠ enigha̠ ma̱ O̠nyi̠ ta̠ A̠devidi!"

"E̠no̠gho̠man na̠ e̠te̠i̠ o̠ni̠ wa̠ na̠ a̠bhin a̠d̠ien ta̠ Wa̠nwuna̠ na̠ a̠ru bho̠."

"Itutumeni *21:9 Ekpo a̠fugh d̠a̠ o̠nu̠ Ibru ola̠ a̠ma̠ra̠ ma̠a̠, tenemeni. D̠iobh na̠ ogho o̠gu̠r (15)e̠ro̠ enigha̠ ma̠ A̠zib̠a̠ wa̠ od̠i d̠a̠ ote̠nai̠ny, wa̠ agi̠ ma̠ anyu̠ a̠pu bho̠!"

10 Sa̠ i̠na a̠d̠igh d̠a̠ A̠zeruse̠le̠m, sa̠ eb̠la̠ e̠ma bho̠ na̠ a̠nye̠ge̠re̠, sa̠ na̠ epura̠n ma̠a̠, "Onon ka̠ a̠nyen?"

11 Sa̠ a̠nwunom bho̠ i̠wo̠ran ma̠a̠, "Onon owil A̠zizo̠s, wa̠ Anazare̠t d̠a̠ Agalili bho̠."