19 "Mwa cipakera rufumo pano pashi, apa pa di menje no ñarawe, apa pa di ethzi o ku twethsa ku tuva manthzio enu no kwithza. 20 Unone mu cipakere rufumo ku wiru, ko kupira menje no ñarawe yo ku rwipithsa, omu ku na piri nethzi o ku twethsa ku tuva manthzio no kwithza. 21 Inene oku ru di rufumo rwoe no mucima woe kodiyo u di.
Mwethzi werama
(Luk 11.34-36)
22 "Dithziho po odiyo mumunyi werama. Ngeci dithziho dyoe dyaa mona nawa, erama yoe yoihe yaekara mu mwethzi. 23 Unone ngeci meho oe ka a mona nawa, erama yoe yoihe yaekara mu mirema. Ngeci mwethzi ou u di ku koe awopo wikara mirema, ethzo mirema kenge thza kwikara thzothzikuru nene.
Mwa cithzekera
(Luk 16.13; 12.22-31)
24 "Kwithsa munu o ku twethsa ku kwamena añathsire aidi. Inene kenge a thzimbapo yofoci no ku shima yumweya, nji ku remekapo yumweya no ku shwahura yumweya. Tumba mu twethsa ku kwamena Nyambi no ku kwamena madi.