Mateus 21

Yezu ajà omu Yeruzalemu

1 Erhi bacihika hôfi h’e Yeruzalemu, oku ntondo y’Emizêti, e Betefaje, Yezu arhuma baganda bâge babiri. 2 Ababwîra, erhi: «Jimwo cira cishagala cimmuyêrekîre: ho n’aho mwashimâna endogomi nshwêke n’omucukà gwâyo haguma nayo; muyishwêkûle, mubinderhere. 3 "Hakayish’ijira awammubwîra, mpu": "Kurhi oku? Munamubwîre oku Nyakasane abilonza; ho n’aho anabirîka"». 4 Ebyo byoshi byanacibà ntyo mpu lyo kulya kwaderhagwa n’Omu­lêbi kubà, erhi: 5 Mubwîre omunyere w’e Siyoni, erhi: Lolà oku Mwâmi wâwe ayishire emunda oli; ayishire mutûdu, abwârhîre oku ndogomi n’omucukà gwâyo. 6 Obwo abaganda bagenda, bajira okwo Yezu ali arhegesire. 7 Banacilêrha erya ndogomi n’omucukà gwâyo. Babibambakwo ebishûli byâbo, bamuburhamazakwo. 8 Engabo y’abantu yakabamba ebishûli byâbo omu njira; n’abandi bakaz’itwa amashami g’emirhi, banagabamba omu njira. 9 Orhutù rhwàli rhushokwîre n’orhwali enyuma rhwakaz’ibanda orhuhababo, rhwanaderha, mpu: «Aganze Mwene Daudi! Agishwe oyu oyishire oku izîno lya Nyakasane! Hozana*21, 9 Hozana, kuli kuderha: «irenge», «aganze»! omu mpingu enyanya!» 10 Erhi acija omu Yeruzalemu, ecishagala coshi cageramw’omusisi. Bakacîdôsa, mpu: «Ye ndi oyu wa?» 11 Olubaga nalo lwakaz’ishuza, mpu: «Oyo ye Yezu, mulêbi w’e Nazareti omu Galileya».