Me’do 'ba Dïdï
1 Mï biyeto aba Me’do ëdï. Me’do ne ëdï Wïrï aba ehe tïnyö Wïrï ra. 2 Tëmï biyeto, Me’do ne ëdï Wïrï aba. 3 Ehe Me’do nenye aba, Wïrï o’dɔ wa biya. Wa maako o’dɔ dë kazi Me’do ne. 4 Dïdï ayi kazi mo, ehe dïdï 'bɔmo ï’dï bikanyi zi vïdï biya. 5 Bikanyi ne asesi tanyi mï biköndu, ehe biköndu ayölu dë.
6 Wïrï utu kora maako ru mo Yowani. 7 Mo ayi zi yada kö’du 'ba bikanyi ehe zi gaga vïdï biya zi tëdï koma aba. 8 Yowani ra dë bikanyi nenye. Mo ayi nje zi yada kö’du 'ba bikanyi ne. 9 Bikanyi tïnyö mati ayanyi bi da vïdï biya, ëdï tayi mï damöku ne.
10 Me’do ne ëdï mï damöku ne, mora vïdï maako ayɔlɔ mo dë, Wïrï o’dɔ damöku ne le me’do 'bɔmo aba. 11 Mo ayi gogo mï damöku 'bënï, mora vïdï 'bɔmowe ïrïnnï mo dë kalakyedre aba. 12 Vïdï maakowe ombannï mo ehe ï’dï koma 'bënnï mï mo. Here mo ï’dï dangölö zi zë, zi tëdïnnï na gisi 'ba Wïrï. 13 Zë anzannï dë gisi 'ba Wïrï, ta da rë zë, mandere ga kö’du komba 'ba vïdï köndu, mandere kö’du komba 'ba o’di. Wïrï ra na bi dë nï o’dɔ zë na gisi 'bënï.
14 Me’do ne ayi na vïdï köndu, ehe alima kinye ze aba. Dongɔ ze bikanyi kyedre tïnyö 'bɔmo, bikanyi kyedre 'ba Wisi nje kölö 'ba 'Bu. Mo ndɔ rakyëyï ehe tïnyö.
15 Yowani ame’do kö’du mo ehe agbögbö, "Nenye mo mati ma yada zi ye atayi! Mo kyedre ta da ma, ga kö’du mo ëdï na wïdï gba kazi ma ko’jo."
16 Kazi rakyëyï 'bɔmo dïrï ze ya’da kayo 17 Mosa ra ï’dï kö’du kï’dï, mora Yësu Korisitɔ ika zi ze kö’du laka tïnyö aba. 18 Vïdï maako gba ongɔ Wïrï dë. Nje Wisi kölö ne mo ra tïnyö Wïrï ehe ëdï kara ra 'Bu, ayada zi ze Wïrï ëdï kaa a’di.
Kö’du kise 'ba Yowani Bapatisi
(Mt 3:1-12; Mk 1:1-18; Lk 3:1-18)