1 "Mëdï yada zi ye wa nenyee, here kazi otɔ de 'de. 2 Akore yaga tëmï bi 'ba mötu, ehe kadra atayi mati vïdï akofonnïyë, ehe zë asösunnï, nëdïnnï kö’du laka ra ko’dɔ zi Wïrï. 3 Zë ako’dɔnnï wa nenyee ga kö’du zë ayɔlɔnnï 'Bu mandere ma dë. 4 Mëdï akiya nenye zi ye yaanya aba, here ëzë kadra ne ayi ku akasösuwë wa mati miya."

"Ma mëdï ëtï tëmï dagba, ehe here ma yada wa nenyee dë zi ye. 5 Mora yaanya aba mëdï ku tï’bë hulëhu zi 'Bu mati utu ma, ehe vïdï maako tëmï yë ako’jo ha ma dë mëdï tï’bë kila. 6 E kazi rakyenyi biya ta bi kö’du nenye kowo. 7 Mora ma yada zi ye, mëdï tï’bë zi ko’dɔ wa mati ëdï na laka kö’du wë. Kö’du nenye ra mëdï tï’bë 'de. Lawo Laka ɔ’bɔ dë tayi zi ye kɔnyi le ëzë mile ku. Mora tapëtï mï’bë ku, ma kutu mo zi ye. 8 Lawo atayi akayada zi vïdï 'ba damöku nenye kö’du tïnyö kö’du yaŋa ehe kö’du laka 'ba Wïrï ehe vurë. 9 Lawo akayada zi zë henye, zë 'ba kö’du kyënyë ko’dɔ, ga kö’du zë anzannï dë koma aba mï ma. 10 Zë na lïtë kö’du wa 'ba Wïrï mati ëdï tïnyö na laka, ga kö’du mëdï tï’bë zi 'Bu, onge ma dekpe löhu. 11 Ehe zë na lïtë kö’du 'ba vurë, ga kö’du Wïrï ikye vurë 'ba yere 'ba damöku nenye ku nzɔ.

12 "Mëdï kö’du aba kyɔ zi kiya zi ye, mora yaanya aba atëdï ndra ta da mati atɔ’be yɔlɔ. 13 Lawo ayada wa mati tïnyö ehe atayi gage mï tïnyö ma ndɔ. Lawo ame’do dë ga kö’du nï. Mo akayada zi ye nje wa mati mo owo kazi ma, ehe mo ako’dɔ zi ye yɔlɔ a’di ra ëdï tï’bë zi rë nï ko’dɔ. 14 Lawo akï’dï wayeto zi ma kö’du kise 'bama koba ehe yada mo zi ye. 15 Wa biya mati 'Bu ëdï mo aba 'bama ra. Kö’du nenye ra miya henye Lawo oba kö’du kise 'bama ehe yada mo zi ye."

16 Yësu ayada zi vo lö’bö 'bënïyë, "Tisiwa aba, onge ma dekpe, mora tapëtï mo tisiwa akonge ma."

17 Zë iyannï zi oka ma kölö maako henye, "A’di ra Yësu iya henye, tisiwa aba donge mo dë, mora tapëtï mo tisiwa aba, da kongɔ ze mo? Kö’du a’di ra mo iya henye, nëdï tï’bë zi 'Bu? 18 A’di ra 'bënï nenye tisiwa aba, mati mo ëdï ame’do kö’du mo? Da yɔlɔ dë a’di ra mo ame’do kö’du mo."

19 Yësu ayɔlɔ zë ëdïnnï kö’du ko’jo maakowe aba, here mo iya henye, "E na rasösu a’di ra ma me’do kö’du mo mati miya henye tisiwa aba onge ma dë, mora tapëtï mo tisiwa aba akonge ma. 20 Ma yada zi ye tïnyö henye, akuduwë ehe atëdïyë kazi rakyenyi, mora damöku atëdï rakyenyi aba. Atëdïyë kazi rakyenyi, mora yaa atëdïyë na rakyenyi. 21 Ëzë mbara omba ku zi ko’jo, mo ëdï mï watɔɔ kyedre. Mora tapëtï ko’jo, watɔɔ ne ölu ta dɔ mo ehe na rakyenyi, ga kö’du mo ika wisi ku mï damöku ne. 22 E yaanya aba kazi rakyenyi, mora yaa ma konge, ehe atëdïyë na rakyenyi. Vïdï maako ɔ’bɔ dë zi kobe ta gërï mati asösuwë.

23 "Ëzë kadra nani ayi ku, ako’jowe ha ma dë kö’du wa maako. Ma yada tïnyö zi ye henye, 'Bu akï’dï zi ye wa mati ako’jowe kö’du mo mï ru ma. 24 Ako’jowe kö’du wa maako dë gba mï gërï nenye. Mora yaanya aba ako’jowe mï ru ma ehe akïrïyë."

25 "Ma me’do ha kahi aba zi yada wa nenyee zi ye. Mora kadra mo atayi mati ma kame’do dekpe ha kahi aba, mora ma kame’do zi ye huwë kö’du 'ba 'Bu. 26 Akako’jowe ha 'Bu mï ru ma. Ma kako’jo hɔ mo dë zi ye. 27 Wïrï 'Bu ɔwe ga kö’du ɔwe ma, ehe ome mayi kazi mo. 28 Mayi ta ra 'Bu mï damöku ne, mora mëdï ku damöku ne kila ta’ba zi 'Bu."

29 Vo lö’böwë iyannï henye, "Yaanya aba ëdï ku ame’do huwë zi ze! Anza dë ame’do ha kahi aba. 30 Ndundu mo aba da yɔlɔ ku henye, ayɔlɔ wa biya, ehe omba dë zi vïdï hë yï ko’jo. Yaanya aba doma tïnyö ayi ta ra Wïrï."

31 Yësu aya’ba henye, "Tïnyö yaanya ome ma ku? 32 Kadra atayi ehe ëdï ku nzɔ kinye, mati akapere biya. Vïdï biya na kölö kölö tëmï yë atï’bë hulëhu liŋɔ ehe akila ma na bi da ma. Mora 'Bu atëdï ma aba, ma tanza dë kutu ma aba. 33 Ma yada nenye zi ye, zi ye tëdïyë rakyëyï aba mï di’di ye ga kö’du ma. Ëzë ëdïyë mï damöku ne, atëdïyë riti aba. Mora ëdïyë kazi tere, ma’da damöku ne ku."