João 19

Ikye vurë ra Yësu zi tötö

1 Pilato ï’dï kö’du gbɔ zi Yësu ku’bö so’da aba. 2 Vo kanye o’dɔnnï safo 'ba yere yaga tëmï ngora kono ï’dïnnï da Yësu. Here zë usunnï bɔngɔ 'buluyë rɔ mo. 3 Zë ayinnï zi mo da kyɔ ehe iyannï henye, "He, yï Yere 'ba Yude!" Zë isannï mo kpa kala nnï aba.

4 Kpa löhu Pilato ï’bë yaga. Kadra nenye aba mo iya henye, "Ma kika Yësu zi ye yaga löhu, here atɔ’be kongɔ na bi de henye, mi’ja mo dë kö’du kyënyë maako aba." 5 Yësu asi yaga usu safo 'ba yere kono bɔngɔ 'buluyë aba. Pilato iya henye, "Kinye kora ne ëdï."

6 Mati kyedree 'ba vo karase ehe kanye 'ba yëkëlu ongɔnnï mo, zë agbögbö hë nnï iyannï henye, "Ma tötö mo da taka! Ma tötö mo da taka!" Pilato ayada zi zë, henye, "Obe mo, ehe atötöwë mo da taka. Mi’ja kö’du kyënyë ko’dɔ 'bɔmo maako dë."

7 Yude nee aya’bannï henye, "Mo iya zi nï tëdï na Wisi 'ba Wïrï! Kö’du kï’dï 'beze iya henye, mï’dï mo zi koli."

8 Mati Pilato owo nenye, mo ndra na tere. 9 Mo ï’bë hulëhu loko ehe ako’jo ha Yësu henye, "Yï ta kila?" Mora Yësu aya’ba dë. 10 Pilato ako’jo henye, "Kö’du a’di aya’ba da kö’du ko’jo 'bama ne dë? Ayɔlɔ dë mëdï kyigɔ aba zi yï kinga na dangölö mandere yï tötö da taka?"

11 Yësu aya’ba henye, "Ëzë Wïrï ï’dï kyigɔ ne dë zi yï, ɔ’bɔ dë wa maako ko’dɔ zi ma. Mora mo mati ï’dï ma zi yï, o’dɔ ndra na kyënyë." 12 Here Pilato omba zi Yësu kinga na dangölö. Mora Yude agbögbö hë nnï löhu, "Ëzë inga kora nenye ku na dangölö, anza dë aboka 'ba Yere 'ba Roma. Vïdï maako mati iya zi nï tëdï na yere, vo wehe 'ba Yere 'ba Roma."

13 Mati Pilato owo nenye, mo ika Yësu yaga. Here mo alima akaŋo da kyïtï 'ba vurë bi mati ako’jo, "Yïtö Dakaŋo." Mï ha 'ba Hïbïru ëdï "Gabata." 14 Ëdï kaa kadra kutë mï ko’do, gba kazi karama 'ba laga 'ba koli, ehe Pilato iya zi vïdï kayo nee henye, "Ongɔ bi da yere 'be!" 15 Zë agbögbö hë nnï henye, "Ofo mo! Ofo mo!Atötö mo da taka!" Pilato ako’jo henye, "Here ombe ma zi tötö yere 'be da taka?" Kyedree 'ba vo karase aya’bannï henye, "Yere 'ba Roma ra yere 'beze." 16 Here Pilato ï’dï Yësu gbɔ zi tötö da taka.

Atötö Yësu

Oba Yësu 'de, 17 ehe mo ïnjë taka 'bënï bi ma ëdï na yɔlɔ henye, "Yingɔ da." Ha 'ba Hïbïru bi nenye, ako’jo "Gologota." 18 Ani atötö Yësu gbɔ da taka, ehe dakapa mo da taka, atötö kora kpa rïyö, ma kölö kapa mo ma kölö, Yësu mï kutë zë. 19 Pilato ï’dï kö’du zi kö’du kyënyë ko’dɔ 'ba Yësu zi yöru da wa ehe kï’dï rïyë da taka. Ako’jo henye, "Yësu 'ba Nazereta, Yere 'ba Yude." 20 Me’do ne ayöru mï ha 'ba Hïbïru, ha 'ba Lateni ehe ha 'ba Gïrïgï. Bi mati oba Yësu zi mo ne, anza na kɔwɔ ta ra gawo kyedre, ehe Yuda kayowe ako’jonnï kö’du yöru rɔ mo ne. 21 Here kyedree 'ba vo karase ï’bënnï zi Pilato iya henye, "Kö’du a’di ayöru henye, mo Yere 'ba Yude? Akayöru kyere henye, ‘Mo iya zi nï tëdï na Yere 'ba Yude.’" 22 Mora Pilato ayada zi zë henye, "Wa mati ma yöru ku, ma lima here!"

23 Tapëtï vo kanye atötönnï Yësu ku da taka, zë inyennï mï bɔngɔ 'bɔmo sowɔ, ma kölö zi ma kölö tëmï zë. Mora bɔngɔ 'bɔmo ma ta yaga o’dɔ tëmï nzoyi bɔngɔ kölö, anza dë kapa maako aba. 24 Vo kanye iyannï zi oka ma kölö maako henye, "Dize dë, du’duwë födö aba zi kongɔ ëyï ra akïrï." Nenye o’dɔ rë nï here zi wayöru tayi tïnyö, mati iya henye, "Zë inyennï mï bɔngɔ ame ehe u’dunnï födö kö’du bɔngɔ ame." Vo kanye o’dɔnnï wa mati zë ombannï.

25 Ma 'ba Yësu ɔrɔ dakapa taka 'bɔmo ëmï nï aba ehe Mariya mbara 'ba Kalapasi. Mariya Magadala ëdï kpa atɔrɔ ani. 26 Mati Yësu ongɔ ma nï, ehe vo lö’bö mati mo ɔwɔ mo ëtï, mo iya zi ma nï henye, "Kora nenye yaanya aba wisi 'bëyï." 27 Here mo iya zi vo lö’bö ne henye, "Mo yaanya aba ma yï ra." Tëmï ndenye dagba ani, vo lö’bö nani oba mo gbɔ liŋɔ 'bënï.

Koli 'ba Yësu

28 Yësu ayɔlɔ henye, yaanya aba ninde lɔɔ 'bënï ku. Ehe zi ko’dɔ wayöru tayi tïnyö, mo iya henye, "Ma na kɔdrɔ."

29 Sikɔ ëdï ani ndɔ a’ji aba. Vïdï maako usu lifa mï a’ji ne ehe ïnjë rïyë ï’dï ha Yësu kaga 'ba isipɔ aba. 30 Tapëtï Yësu uwë a’ji ne, mo iya henye, "Wa biya o’dɔ rë nï ku!" Mo umbï dë nï ehe oli.

Isi rɔtɔ Yësu

31 Yaanya aba ëdï ko’do 'ba rakɔ’jɔ, 'dö ko’do 'ba ralawo ehe karama 'ba laga 'ba koli. Ëdï ko’do lele zi Yude, ehe zë ombannï dë zi ida ra nee zi lima rïyë da taka mï ko’do nenye. Here zë ako’jonnï ha Pilato zi ndï kora nee kowe ehe koba ida rë zë akaŋo. 32 Vo kanye dagba owennï ndï 'ba kora agamowe rïyö mati atötö zë ani ne. 33 Mora mati zë ayinnï zi Yësu, zë ongɔnnï mo oli ku nzɔ, ehe zë owennï ndï mo dë. 34 Ma kölö tëmï vo kanye isi mbese Yësu wehe aba, yama ehe wini asi yaga. 35 Da yɔlɔ nenye ëdï tïnyö, ga kö’du vïdï maako ra ayada wa mati mo ongɔ o’dɔ rë nï. Yaanya aba atɔ’bɔ tëdï kpa koma aba. 36 Biya nenye o’dɔ rë nï here, zi wayöru tayi tïnyö, mati iya henye, "Yingɔ 'ba ida rɔ mo ma kölö akowe dë," 37 ehe "Zë ongɔnnï ma kölö mï dakapa mbese mo isi wehe aba."

Kusu 'ba Yësu

38 Yosepa tëmï Arimataya ëdï kölö tëmï vo lö’bö 'ba Yësu. Mo asesi na koho, le ga kö’du mo na tere kazi vo dagbe 'ba Yude. Mora yaanya aba mo ako’jo ha Pilato zi mo ida ra Yësu koba. Pilato ï’dï dangölö zi mo, ehe Yosepa oba mo akaŋo ta da taka. 39 Nikodïmö ayi nï mo aba, ehe ika kpa kaa 'butëwota kilɔgaramo 'ba wakëzï ngutru aba o’dɔ tëmï murë ehe alɔyisi 'ba yöku kusu. Nenye kpa te Nikodïmö kölö mati ï’bë zi Yësu yɔndɔ kölö maako aba. 40 Vïdï kora rïyö nee, olonnï ida ra ne mï bɔngɔ 'ba yöku, bi kölö wakëzï ngutru aba, mati ëdï hala Yude ombennï yöku 'bënnï. 41 Mï bi mati atötö Yësu da taka, ani yaka ëdï wogo aba mati gba ombe vïdï maako dë mï mo. 42 Dawogo ne ëdï kara, ehe kyere ne kadra 'ba zi ra kɔ’jɔ kö’du ko’do 'ba ralawo, zë na kɔrɔkɔrɔ zi ida ra Yësu kï’dï ani.