1 Farasiye owonnï henye, Yësu ëdï ku laga dagba ehe bapatisi kï’dï zi vo lö’böwë ndra ta da Yowani. 2 Tïnyö Yësu abapatisi vïdï kölö maako dë, nje vo lö’bö 'bɔmowe ra o’dɔnnï. 3 Mati Yësu owo kö’du mati ëdï akiya ne, mo ila Yudiya ehe ï’bë hulëhu zi Galilaya. 4 Ta da gërï 'bɔmo ani, mo omba zi tï’bë kpuru ta Samariya.

5 Mï Samariya mo ayi zi gawo maako ru mo Seka, anza dë na kɔwɔ ta ra yaka mati Yakoba ï’dï zi wisi 'bënï Yosepa. 6 Ku’ju 'ba Yakoba ëdï ani, ehe Yësu na riti ta bi lasi, alima akaŋo dakapa ku’ju ne. Ëdï kaa kadra kutë here.

7 Mbara vïdï 'ba Samariya maako ayi zi wini kuwu, ehe Yësu iya zi mo henye, "Ï’dï wini kuwë zi ma." 8 Vo lö’bö 'bɔmowe ï’bënnï ku mï gawo zi wakonyo kogo.

9 Mbara ne aya’ba dɔ mo henye, "Yï Yuda ra ehe ma vïdï 'ba Samariya ra, hala atɔ’bɔ ko’jo ha ma kö’du wini kuwë?" Yude uwënnï wini dë tëmï sikɔ kölö vïdï 'ba Samariya ëtï.

10 Yësu aya’ba dɔ mo henye, "Ëzë ayɔlɔ nje wa ma Wïrï ï’dï, ehe ëyï ra ëdï hë yï ko’jo kö’du wini kuwë, ako’jo hɔ mo, ehe mo akï’dï zi yï wini mati ï’dï dïdï."

11 Mbara ne iya henye, "Kyedre, anza kpa dë kyere wini aba, ehe ku’ju ne ëdï na yöndu. Ta kila aki’ja wini mati ï’dï dïdï? 12 Zutu 'beze Yakoba ra ole ku’ju nenye zi ze, mo gisi 'bënïyë ëtï ehe ngötu 'bɔmowe uwënnï biya tëmï mo. Yï kyedre ta da Yakoba?"

13 Yësu aya’ba dɔ mo iya henye, "Vïdï biya ma uwë wini nenye atëdï na kɔdrɔ löhu, 14 mora vïdï ma uwë wini mati ma kï’dï zi mo atanza dë na kɔdrɔ löhu. Wini mati ma kï’dï zi mo atayi mï mo na ku’ju mati akï’dï zi mo dïdï ma ŋburu."

15 Mbara ne aya’ba dɔ mo iya henye, "Kyedre, ï’dï zi ma wini nani! Here ma tanza dë na kɔdrɔ löhu, mandere kazi ma tayi kinye zi wini kuwu."

16 Yësu ayada zi mo iya henye, "Ï’bë ako’jo kora 'bëyï ehe ayi löhu." 17 Mo aya’ba dɔ mo iya henye, "Manza dë kora aba." Yësu aya’ba henye, "Kö’du 'bëyï ne tïnyö mati iya henye anza dë kora aba ne. 18 Oze yï ku zi kora muyï, ehe kora ma ëdï lima mo aba yaanya aba ne anza tïnyö kora 'bëyï ra dë. Ayada zi ma kö’du tïnyö ra."

19 Mbara ne iya henye, "Kyedre, mongɔ yï nëbï ra. 20 Zutu 'ba Samariya amötunnï Wïrï da döku nenye, mora e Yude iye henye, Yerusalema ra bi ma da kamötu zi Wïrï."

21 Yësu iya zi mo henye, "Oma mï ma, mbara, kadra mo ëdï atayi mati vïdï amötunnï 'Bu dekpe da döku nenye mandere mï Yerusalema. 22 E Samariye ayɔle dë tïnyö ëyï ra ëdï yë amötu, mora ze Yude, da yɔlɔ ku ëyï ra dëdï mötu, ga kö’du ëdï kazi Yude ra vo wayɔmɔ ayi. 23 Mora kadra mo ëdï tayi, ehe ëdï ku nzɔ kinye, mati kyigɔ Lawo 'ba Wïrï aba vïdï akamötunnï 'Bu kaa mo tïnyö ëdï, kï’dï zi mo mötu ma tïnyö mati mo omba. 24 Wïrï ëdï Lawo ra, ehe nje kyigɔ 'ba Lawo 'bɔmo aba vïdï atɔ’bɔ mötu mo kaa mo tïnyö ëdï."

25 Mbara ne iya zi mo henye, "Ma yɔlɔ ku Masiya ne atayi, ehe ëzë mo ayi, mo akayada zi ze wa biya." 26 Yësu aya’ba henye, "Ma ra mo, ma ra mo mati ëdï ame’do yï aba yaanya."

27 Mï kadra nani vo lö’bö 'ba Yësu a’bannï, ehe zë na rakaga zi ki’ja mo ëdïnnï ame’do mbara aba. Mora vïdï maako tëmï zë ako’jo ha mbara ne dë, "A’di ra omba?" Zë ako’jonnï ha Yësu dë, "Kö’du a’di ëdïyë ame’do mbara ne aba?"

28 Mbara ne ila tele wini 'bënï ne ï’bë hulëhu mï gawo, ehe iya zi vïdïyë ani henye, 29 "Ayi onge kora ne, mo ayada zi ma biya wa mati mo’dɔ! Mo atëdï Korisitɔ ra?" 30 Zë ilannï gawo ehe ï’bënnï zi kongɔ Yësu.

31 Mï kadra ne vo lö’böwë alenzennï Yësu iyannï zi mo henye, "Raboni, oba wa maako zi konyo!" 32 Mora mo aya’ba henye, "Mëdï wakonyo maako aba ayɔle kö’du mo dë."

33 Here vo lö’böwë ayetonnï, kö’du ko’jo tëmï kutë nnï na bi dë nnï, "Vïdï maako ika wakonyo ku zi mo?" 34 Yësu iya zi zë henye, "Wakonyo 'bama ëdï zi koro kö’du 'ba Wïrï mati utu ma ehe zi kinde lɔɔ mati mo ï’dï zi ma zi ko’dɔ. 35 Akiye henye, ‘ëdï gba yehe sowɔ zi wakumu ta yaka.’ Mora ma yada zi ye henye, ongɔ bi te na laka da yake, wa mï yaka yaanya aba ahi ku, ehe ku nzɔ zi kumu. 36 Vïdï mati umu ehe atɔtɔ dɔ mo ika ku zi dïdï ma ŋburu ŋburu, ehe agamo mati ïlï ehe mo mati umu aba, atëdïnnï na rakyenyi bi kölö. 37 Kö’du kiya ne ëdï tïnyö, ‘Maako ïyï, agamo umu.’ 38 Mutu wë zi nyenyo kumu mï yaka mati o’dɔ lɔɔ mo dë. Vïdï maakowe o’dɔnnï lɔɔ ani, ehe i’je wa kyɔ tëmï lɔɔ 'bëzë ne."

39 Vïdï kayo 'ba Samariya mï gawo nani omannï mï Yësu ga kö’du mbara ne iya henye, "Mo ayada zi ma biya wa ma mo’dɔ." 40 Here mati vïdï 'ba Samariye ayinnï zi mo, zë alenzennï mo zi lima nnï aba, ehe Yësu alima ani ko’do rïyö aba.

41 Vïdï kayo 'ba Samariya maakowe omannï ga kö’du 'ba kö’du kise. 42 Zë iyannï zi mbara ne henye, "Doma ku yaanya aba, anza dë ga kö’du mati iya, mora ga kö’du ze na bi de ze dowo mo ku, ehe da yɔlɔ henye, mo ra tïnyö ëdï vo yɔmɔ 'ba damöku."

43 Tapëtï ko’do rïyö aba ani, Yësu ila bi nani ehe ï’bë zi Galilaya. 44 Kö’du mo na bi dë nï iya henye, nëbï ɔwɔ dë mï dakaŋo 'bɔmo. 45 Mati mo ɔkɔ mï Galilaya, vïdï karani ïrïnnï mo kalakyedre aba, ga kö’du zë ï’bënnï mï karama 'ba laga 'ba koli mï Yerusalema ehe ongɔnnï biya wa mati mo o’dɔ.

46 Mati Yësu a’ba zi Kana mï Galilaya, bi mati mo opi wini na a’ji. Vo mï turu maako ëdï ani wisi 'bɔmo na kɔɔ mï Kaparanamo. 47 Mati mo owo henye, Yësu ayi ku ta Yudiya zi Galilaya mo ï’bë zi mo ako’jo hɔ mo zi tï’bë Kaparanamo ehe zi kɔ’jɔ wisi 'bënï, mati mo ku kara zi koli. 48 Yësu iya zi mo henye, "Vïdï maako tëmï yë oma dë nje ëzë onge kyïnë 'ba kö’du korowe ehe rakage." 49 Kora vo mï turu ne aya’ba dɔ mo henye, "Yere, ayi gba kazi wisi ama koli."

50 Yësu iya zi mo henye, "Ï’bë wisi 'bëyï akadïdï."

Kora ne oma mï me’do 'ba Yësu, ehe ï’bë gbɔ. 51 Da gërï 'bɔmo liŋɔ vo lïtu 'bɔmowe andɔsi dë nnï mo aba kö’du kise aba zi mo. "Wisi 'bëyï ëdï ku zi tï’bë zi dïdï!"

52 Mo ako’jo hë zë iya henye, "Kadra vala ra mati wisi 'bënï ne na laka?" Zë aya’bannï henye, "Ëdï ndï kadra kölö mataganya tapëtï kadra kutë mati rakyïtu ne ila mo." 53 Here 'bu mo asösu ëdï mï kadra kölö nani mati Yësu ayada zi nï, "Wisi 'bëyï akadïdï." Here mo ehe biya vo dakota 'bënï ëtï omannï gbɔ. 54 Nenye kyïnë 'ba kö’du koro ma rïyö mati Yësu o’dɔ tapëtï tayi 'bɔmo ta Yudiya zi Galilaya.