1 Tapëtï ma nenye Yësu umu kyëtï Föfö 'ba Galilaya, mati ayɔlɔ kpa na Föfö 'ba Tiberiyasi. 2 Vïdï kayo usunnï gɔ mo ga kö’du ongɔnnï mo ëdï kyïnë 'ba kö’du korowe ko’dɔ zi kɔ’jɔ vo kɔe. 3,4 Kara zi kadra karama 'ba laga 'ba koli 'ba Yude, Yësu ï’bë rïyë da döku vo lö’bö 'bënïyë ëtï ehe alima akaŋo. 5 Mati Yësu ongɔ vïdï kayo tayinnï zi nï, mo ako’jo ha Pilipo iya henye, "Ta kila da ki’ja ze wakonyo kyɔ zi tɔ’bɔ vïdï nenyee biya?" 6 Mo iya nenye zi Pilipo yɔnzɔ. Mo ayɔlɔ ku nzɔ a’di ra mo ëdï tï’bë zi ko’dɔ.

7 Pilipo aya’ba dɔ mo iya henye, "Ayɔlɔ dë henye, akïrï kara kɔhi 'ba yehe modɔmowota nje zi kogo mangɔlɔ’bɔ tisi zi vïdï ma kölö nenyee?"

8 Anderiya, öndu 'ba Simona Petero, kölö tëmï vo lö’böwë, mo ame’do rïyë iya henye, 9 "Wisi maako ëdï kinye, mo ëdï mangɔlɔ’bɔ sisi aba muyï ehe kyenze rïyö. Mora a’di ra na laka ëdï zi vïdï biya nenyee?"

10 Dakaŋo ayöfu loma aba, ehe Yësu ayada zi vo lö’bö 'bënïyë zi yada zi vïdï biya lima akaŋo. Vïdï kora ëdï kaa kpulukumuyï mï vïdï kayo nenyee. 11 Yësu oba mangɔlɔ’bɔ ne mï kala nï ï’dï öwö’dï zi Wïrï. Here, mo idra mangɔlɔ’bɔ ne zi vïdïyë, mo o’dɔ kpa here kyenze ne aba, le vïdï ëdïnnï mo aba kyɔ zi konyo. 12 Vïdï onyonnï biya ma ombannï, ehe Yësu ayada zi vo lö’bö 'bënïyë zi tɔtɔ kɔsɔ mo ma ɔsɔ, here ma yaŋa dë. 13 Vo lö’böwë atɔtɔnnï dë zë bi kölö ehe oso koṛi 'butë dɔmorïyö wa mati ɔsɔ tëmï mangɔlɔ’bɔ muyï ne.

14 Tapëtï vïdï ongɔnnï kyïnë 'ba kö’du korowe ko’dɔ 'ba Yësu nenye, ayeto kiyannï henye, "Nenye atëdï tïnyö Nëbï mati ëdï zi tayi kinye mï damöku ne." 15 Yësu ayɔlɔ henye zë ombannï yɔnzɔ zi mo ko’dɔ na wehe zi tëdï na yere 'bëzë. Here mo ï’bë rïyë da döku, ani zi mo tëdï kutu nï aba.

16 Hutaga nani aba vo lö’bö 'ba Yësu ï’bënnï akaŋo zi föfö. 17 Zë ëkyïnnï mï töŋbö, ayetonnï kumu kyëtï zi Kaparanamo. Mati bi öndu Yësu gba ayi dë zi zë, 18 buluku kyigɔ ëdï ku kɔhɔ wini na kyënyë. 19 Mati vo lö’böwë opinnï ku kaa wiṛi wota mandere sowɔ, zë ongɔnnï Yësu lasi ta da wini. Mo asesi nduwë tayi kara ra töŋbö, zë gbɔ na tere. 20 Mora mo iya henye, "Ma Yësu ra! Ere dë!" 21 Vo lö’böwë ombannï zi mo koba mï töŋbö, kandi ɔkɔ gbɔ da götï bi mati ëdïnnï atï’bë zi mo.

22 Ko’do vere aba vïdï mati ëdïnnï gba ani humïrë kapa 'ba föfö, ayɔlɔnnï töŋbö ëdï nje kölö ani. Zë ayɔlɔnnï kpa henye, Yësu ï’bë dë mï mo vo lö’bö 'bënïyë ëtï. Zë ï’bënnï kutu nnï aba. 23 Töŋbö maakowe ta Tiberiyasi ï’bënnï kara ta bi mati vïdï kayo onyonnï mangɔlɔ’bɔ mati Yere ï’dï öwö’dï. 24 Zë ongɔnnï henye Yësu ehe vo lö’bö 'bënï ëtï ï’bënnï ku. Here zë ëkyïnnï mï töŋböwë ehe ï’bënnï gbɔ Kaparanamo Yësu koma. 25 Zë i’jannï mo kapa damïrë 'ba föfö ehe ako’jonnï hɔ mo iyannï henye, "Raboni, ɔkɔ ndala aba kinye?" 26 Yësu aya’ba dɔ mo iya henye, "Ma yada tïnyö zi ye, anze dë ma koma ga kö’du onge kyïnë 'ba kö’du korowe, mora ga kö’du onyowe biya wakonyo ma ombe. 27 O’de lɔɔ dë kö’du wakonyo mati ëdï rë nï yaŋa ne. O’de lɔɔ kö’du wakonyo mati ï’dï dïdï ma ŋburu ŋburu ne. Wisi 'ba Vïdï akï’dï wakonyo nenye zi ye, ga kö’du Wïrï 'Bu ï’dï kalakonda zi mo ko’dɔ here."

28 Vïdï ako’jonnï hɔ mo iyannï henye, "A’di ra tïnyö Wïrï omba ze zi ko’dɔ?" 29 Yësu aya’ba dɔ mo iya henye, "Wïrï omba zi ye tëdï koma aba mï vïdï mati mo utu." 30 Zë aya’bannï dɔ mo iyannï henye, "Kyïnë 'ba kö’du koro a’diye ra ako’dɔ, here zi ze tɔ’bɔ koma mï yï? A’di ra ako’dɔ? 31 Gɔ mo yada aba, mati zutu 'bezee ëdïnnï mï da lïpï, Wïrï ï’dï mana zi zë konyo. O’dɔ rë nï kaa mati wayöruwë iyannï henye, ‘Wïrï ï’dï mangɔlɔ’bɔ zi zë ta komorïyë zi konyo.’"

32 Yësu ayada zi zë henye, "Ma yada tïnyö zi ye henye, Mosa ra dë vïdï mati ï’dï mangɔlɔ’bɔ zi ye ta komorïyë. 'Bu ma ra ï’dï mangɔlɔ’bɔ tïnyö ne zi ye ta komorïyë. 33 Ehe mangɔlɔ’bɔ mati Wïrï ï’dï ne ëdï vïdï mati ayi akaŋo ta komorïyë zi dïdï kï’dï zi damöku."

34 Vïdï iyannï henye, "Kyedre, ï’dï zi ze mangɔlɔ’bɔ mati ɔrɔ dë nenye." 35 Yësu aya’ba dɔ mo zi zë iya henye, "Ma ra mangɔlɔ’bɔ ma ï’dï dïdï. Vïdï ma ayi zi ma, atanza dë na o’bo. Vïdï ma ëdï koma aba mï ma atanza dë na kɔdrɔ. 36 Ma yada ku nzɔ zi ye henye, onge ma mora gba anze dë koma aba mï ma. 37 Vïdï biya mati 'Bu ï’dï zi ma atayi zi ma. More ma kölö maako tëmï zë dë. 38 Mayi dë ta komorïyë zi ko’dɔ wa mati momba. Mayi zi ko’dɔ wa mati 'Bu omba ma zi ko’dɔ. Mo utu ma, 39 ehe mo omba zi ko’dɔ tïnyö ma kölö tëmï zë mati mo ï’dï zi ma ne ölu dë. Mo omba ma zi kïnjë zë zi dïdï mï ndundu 'ba ko’do aba. 40 'Bu ma omba vïdï biya mati ongɔnnï Wisi, zi tëdï koma aba mï mo, ehe zi tëdï dïdï ma ŋburu aba. Here ma kïnjë zë zi dïdï mï ndundu ko’do aba."

41 Vïdï ayetonnï hë nnï wasa ga kö’du Yësu iya henye, nï ra mangɔlɔ’bɔ mati ayi akaŋo ta komorïyë. 42 Zë ako’jonnï ha oka ma kölö maako iyannï henye, "Mo anza Yësu ra dë, wisi 'ba Yosepa? Da yɔlɔ ze 'bu mo dë ma mo aba? Hala mo atɔ’bɔ kiya henye, nayi akaŋo ta komorïyë?"

43 Yësu ayada zi zë iya henye, "Ɔre ta bi me’do 'be ne! 44 Vïdï maako ɔ’bɔ dë tayi zi ma, nje 'Bu mati utu ma ne o’dɔ zë komba zi tayi. Mora ëzë zë ayinnï, ma kïnjë zë na dïdï mï ndundu 'ba ko’do aba. 45 Kölö tëmï Nëbïyë ayöru henye, ‘Wïrï akayandi zë biya.’ Here vïdï biya ma owonnï da 'Bu ehe ayandi kazi mo atayi zi ma. 46 Nje vïdï kölö mati ongɔ 'Bu ne mo ra ayi kazi Wïrï. Vïdï maako gba ongɔ 'Bu dë. 47 Ma yada zi ye tïnyö vïdï biya mati ëdïnnï koma aba mï mo, ëdïnnï dïdï ŋburu aba. 48 Ma mangɔlɔ’bɔ ma ï’dï dïdï! 49 Zutu 'be onyonnï mana mï da lïpï ehe yaa, zë olinnï. 50 Mora kinye mangɔlɔ’bɔ 'ba komorïyë ne ayi ku akaŋo, here vïdï mati mo onyo ku oli dë. 51 Ma ra mangɔlɔ’bɔ dïdï mati ayi akaŋo ta komorïyë. Ëzë vïdï mati onyo mangɔlɔ’bɔ nenye, mo akalima ŋburu. Mangɔlɔ’bɔ mati ma kï’dï zi mo ida ra ma ra, mëdï kï’dï zi vïdï 'ba damöku nenye zi tëdïnnï na dïdï."

52 Zë ayetonnï hë nnï wasa oka ma kölö maako aba, ehe ako’jonnï kö’du iyannï henye, "Hala mo atɔ’bɔ kï’dï ida rë nï zi ze konyo?"

53 Yësu aya’ba dɔ mo iya henye, "Ma yada zi ye tïnyö, alime dë, nje ëzë onyowe ida ehe uwëë yama 'ba Wisi 'ba Vïdï. 54 Mora ëzë onyowe ida ma ehe uwëë yama ma, atëdïyë dïdï ma ŋburu aba, ehe ma kïnjëë na dïdï mï ndundu 'ba ko’do aba. 55 Ida ma wakonyo ma tïnyö ra, ehe yama ma wakuwë ma tïnyö ra. 56 Ëzë onyowe ida ma ehe uwëë yama ma, e kölö ma aba ehe ma kölö ëtï. 57 Kaa 'Bu wïdï ra utu ma, ehe mëdï dïdï aba ga kö’du 'bɔmo, vïdï biya mati onyonnï ida ma akalimannï ga kö’du 'bama. 58 Mangɔlɔ’bɔ mati ayi akaŋo ta komorïyë anza dë kaa wa mati zutu 'be onyonnï. Zë olinnï, mora vïdï mati onyo mangɔlɔ’bɔ nenye akalima ŋburu."

59 Yësu ëdï kö’du yëtï mï bi 'ba mötu mï Kaparanamo mati mo iya kö’du nenyee.

60 Vo lö’bö kayo 'ba Yësu owonnï mo ehe iyannï henye, "Kö’du yandi nenye ëdï ndra na kyigɔ zi vïdï maako yɔlɔ. Ëyï ra atɔ’bɔ yɔlɔ mo?"

61 Yësu ayɔlɔ henye, vo lö’bö 'bënïyë ëdïnnï ame’do na wayawaya. Here mo ako’jo iya henye, "Nenye o’de na riti? 62 A’di ra ëzë onge Wisi 'ba Vïdï ëdï tï’bë rïyë komorïyë bi mati mo ayi ta 'dɔmo? 63 Lawo mo ra ï’dï dïdï. Kyigɔ 'ba vïdï köndu o’dɔ waako dë. Me’do mati ma me’do zi ye ne, ëdï tëmï Lawo 'ba Wïrï ma ï’dï dïdï. 64 Mora kya e maakowe ombannï dë zi tëdï koma aba mï ma." Yësu iya nenye, ga kö’du tëmï biyeto aba mo ayɔlɔ ëyï ra atëdï koma aba mï nï. Mo ayɔlɔ kpa ëyï ra akasusu nï. 65 Yësu iya henye, "Kö’du nenye ra ma yada zi ye ɔ’be dë tayi zi ma, nje ëzë 'Bu ra o’de komba zi tayi."

66 Ga kö’du wa mati Yësu iya, vo lö’bö kayo 'bɔmowe opi gë nnï zi mo ehe ɔrɔnnï ta bi lö’bö ga ndï mo. 67 Yësu ako’jo ha vo lö’bö 'bënï 'butë dɔmorïyö, "E kpa ombe zi kila ma?"

68 Simona Petero aya’ba dɔ mo iya henye, "Yere, vïdï maako anza dë ani zi ze tɔ’bɔ tï’bë zi mo. Me’do 'bëyï ï’dï dïdï ŋburu. 69 Yaanya aba dëdï koma aba mï yï, ehe da yɔlɔ ku yï ra Wisi Kölö Ŋbala 'ba Wïrï."

70 Yësu ayada zi vo lö’bö 'bënïyë henye, "Ma jeli ye 'butë dɔmorïyö, mora ma kölö tëmï yë dakyikyi." 71 Yësu ëdï me’do kö’du 'ba Yudasi wisi 'ba Simona Sikereto. Mo yaa akasusu Yësu mo le kölö tëmï vo lö’bö 'butë dɔmorïyö.