1 Here Yësu ila bi nani, ënyï ï’bë mï dakaŋo 'ba Yudiya, ehe umu da ranga 'ba Yeredene. Vïdï ayinnï na kayo zi mo löhu, mo ayandi zë kaa mati mo ëdï 'duwï ako’dɔ. 2 Here kya 'ba Farasiye ayinnï zi mo, ayɔnzɔnnï zi mo kuyï. Zë ako’jonnï hɔ mo iyannï henye, "Ayada te zi ze, kö’du kï’dï 'beze akila vïdï zi mbara 'bënï yëyï?" 3 Yësu aya’ba dɔ mo tëmï kö’du ko’jo iya henye, "Kö’du kï’dï a’di ra Mosa ï’dï zi ye?" 4 Da kö’du ya’ba 'bëzë ëdï henye, "Mosa ï’dï dangölö zi vïdï waraga 'ba rayëyï yöru, ehe kore mbara 'bënï 'de."

5 Yësu iya zi zë henye, "Mosa ayöru kö’du kï’dï ne here zi ye, ga kö’du de 'e na kyigɔ zi yandi. 6 Mora biyeto aba, mï kadra nani mati bi o’dɔ rë nï, Wïrï ï’dï kora mbara aba. 7 Mora ga kö’du nenye, kora akila 'bu nï ma nï, aba akadrɔko rë nnï mbara 'bënï aba, 8 ehe zë rïyö ne, ata’bannï na wa kölö. 9 Inye’e dë wa mati Wïrï adrɔko ku bi kölö ne."

10 Mati zë a’bannï löhu hulëhu loko, vo lö’bö’e ako’jonnï ha Yësu ga kö’du ne. 11 Here mo iya zi zë henye, "Kora mati ayëyï mbara 'bënï ehe oze mbara vere, mo o’dɔ ndoro ta da mbara 'bënï. 12 Mï ga gërï kölö ne, mbara mati ayëyï kora 'bënï, ehe oze kora vere, ne o’dɔ ndoro."

13 Here kya vïdï maako’e ikannï gisisiye zi Yësu, ga kö’du zi mo kala nï kï’dï dë zë, mora vo lö’bö’e amonnï vïdï ne ëtï. 14 Mati Yësu ayɔlɔ kö’du nenye, mo na kamo ehe iya zi vo lö’bö 'bënïye henye, "Ila’e gisisiye 'bayinnï zi ma, ayata’e zë dë, ga kö’du damöku 'ba Wïrï ne ëdï kö’du zë kaa ma nenye’e. 15 Miya zi ye henye, mo mati ïrï damöku 'ba Wïrï dë kaa wisi tisi, ödu dë mï mo." 16 Here mo ïrï gisisiye hu förö nï, ï’dï kala nï dë zë, ehe ï’dï ya’da zi zë.

17 Mora kaa Yësu ayeto ku da gërï 'bënï löhu, kora maako aho alɔdrɔ da komo mo, ako’jo hɔ mo iya henye, "Vo komoyandi laka, mako’dɔ a’di zi ma dïdï ma ŋburu ki’ja?" 18 Yësu ako’jo hɔ mo iya henye, "Kö’du a’di ako’jo ma na laka? Vïdï maako anza na laka, nje kölö Wïrï. 19 Ayɔlɔ kö’du kï’dï ne’e ku. Ofo vïdï dë, o’dɔ ndoro dë, alogo dë, asusu vïdï maako dë na ndɔndɔ, o’ba vïdï dë, ɔwɔ 'bu yï ma yï aba."

20 Kora ne iya henye, "Vo komoyandi, kyere ma gba na ɔbi, mɔwɔ kö’du kï’dï ne biya." 21 Here Yësu ongɔ bi mbïyï dɔ mo lɔvɔ aba, iya henye, "O’dɔ wa kölö dë gba. Ï’bë, ogo wa mati ëdï mo aba ne biya, ï’dï kɔhi mo zi vo leriye, atëdï wa aba kyɔ komorïyë, ayi alö’bö ga ndï ma."

22 Mati kora ne owo kö’du ne, biköndu apere rë nï ta komo mo, ehe ï’bë 'de na rasösu, ga kö’du mo na vo wakayɔ. 23 Yësu ongɔ bi kpo da vo lö’bö 'bënïye, iya zi zë henye, "Atëdï na kyigɔ zi vïdï 'ba wakayɔ aba zi tödu mï damöku 'ba Wïrï."

24 Mora here, vo lö’bö’e na rakaga mï me’do ne. Mora Yësu ï’bë nduwë kiya mo aba henye, "Gisi ama’e, ëdï na kyigɔ zi tödu damöku 'ba Wïrï. 25 Atëdï na kyigɔ ndra zi vïdï 'ba wakayɔ aba zi tödu mï damöku 'ba Wïrï, ta da jemele zi tï’bë kpuru ta komo wogo 'ba ibira." 26 Mora here ne, vo lö’bö’e rakaga aba ndra, ako’jonnï oka maako, "Mora here ne, ëyï ra atɔ’bɔ yɔmɔ?" 27 Yësu ongɔ bi mbïyï dë zë, aya’ba dɔ mo henye, "Nenye wa mati vïdï ɔ’bɔ dë ko’dɔ mo, mora anza dë na kyigɔ zi Wïrï. Wïrï atɔ’bɔ wasisi ko’dɔ mo biya."

28 Here Petero ame’do rïyë, "Ongɔ te, dila wasisi ku biya, da’ba dalö’bö ku gë yï." 29 Yësu alëzë ɔɔ, iya zi zë henye, "Mayada zi ye henye, vïdï maako mo ila liŋɔ, mandere öndu’e, mandere ëmïye, mandere ma’e, mandere 'bu’e, mandere gisisiye mandere yaka’e, ga kö’du ma, ehe ga kö’du yöyö laka, 30 mo aki’ja ndra mï ko’do ma ndenye ne. Mo aki’ja loko lami da kyɔ, öndu’e, ëmïye, ma’e, gisisiye, yaka’e, ehe riti kpa. Mï ko’do mati atayi ne, mo aki’ja dïdï ŋburu. 31 Mora vïdï kyɔ mati dagba ne, atëdïnnï hulëhu, ehe vïdï kyɔ mati hulëhu ne, atëdïnnï dagba."

32 Yësu vo lö’bö 'bënï ëtï, yaanya aba ëdïnnï ku da ga gërï mati ï’bë le mï Yerusalema. Yësu ëdï atï’bë dagba komo vo lö’bö’e. Zë ndɔ na rakaga. Vïdï mati alö’bö 'bënnï hulëhu ne, na tere. Da kölö löhu Yësu oba vo lïtu 'butë dɔmorïyö ne’e dakapa, ame’do kö’du wa mati ako’dɔ rë nï zi nï. Mo iya zi zë henye, 33 "Owo’e te, dëdï tï’bë’e le mï Yerusalema, ani Wisi a Vïdï akï’dï zi kyedre 'ba vo karasa’e ehe vo komoyandi 'ba kö’du kï’dïye. Zë akombannï da kö’du zi mo kofo, akï’dï mo zi vo leze’e, 34 mati ako’dɔnnï wari rɔ mo, ko’binnï oro rɔ mo, aku’bönnï hu mo, ehe akofonnï mo. Mora ko’do da wota aba, mo atënyï na dïdï."

35 Here Yemisi nnï Yowani aba zë gisi 'ba Zebedeyo, ayinnï zi Yësu, iyannï henye, "Vo komoyandi, waako ëdï ani domba zi yï ko’dɔ mo zi ze." 36 Yësu ako’jo hë zë iyannï henye, "A’di ra here?" 37 Zë aya’bannï da me’do iya henye, "Ëzë alima ku da kyïtï 'ba bikanyi kyedre 'ba damöku 'bëyï, domba yï zi kila ze lima yï aba, ma kölö da kala yï ma tïrï, ehe ma kölö da kala yï ma gali."

38 Yësu iya zi zë henye, "Ayɔlɔ’e dë, a’di ra ëdïye kö’du ko’jo gɔ mo. Akatɔ’bɔ’e köfö 'ba riti mati makuwë ne? Akatɔ’bɔ’e bapatisi tëmï gërï mati abapatisi ma?" 39 Aya’bannï da me’do henye, "Dakatɔ’bɔ." Yësu iya zi zë henye, "Akuwë’e köfö mati makuwë, ehe akabapatisiye tëmï gërï mati abapatisi ma. 40 Mora mo’bɔ dë zi vïdï maako kinzi, ëyï ra akalima da kala ma ma tïrï, ehe da kala ma ma gali. Wïrï ra akï’dï bi nenye’e zi zë mati mo akɔ’jɔ ga kö’du zë."

41 Mati kya 'ba vo lïtu’e 'butë owonnï kö’du ne, zë na kamo kazi Yemisi Yowani aba. 42 Here Yësu ako’jo zë biya zi nï ga bi kölö, iya zi zë henye, "Ayɔlɔ’e ku here, yere 'ba vo leze’e ëdïnnï yere kyigɔ’e kalakonda aba. 43 Nenye anza dë gërï mati ëdï mï kutë’e. Ëzë vïdï ma kölö tëmïye omba zi nï tëdï na kyedre, mo mëdï na vo kalima zi oka’e, 44 ehe vïdï ma kölö tëmïye omba zi nï tëdï dagba, mo mëdï na vo kalima zi oka’e biya. 45 Here Wisi 'ba Vïdï ayi dë zi vïdïye lɔɔ ko’dɔ zi mo, mo ra ayi zi ko’dɔ, ehe zi dïdï nï kï’dï zi vïdï kayo yɔmɔ."

46 Here zë ayinnï mï Yerïkö. Mati Yësu ila gawo vo lö’bö 'bënïye ëtï ehe vïdï kayo ëtï, vo komoköndu ru mo Baratamoya, Wisi 'ba Tomasi, ëdï alima da kapa gërï. 47 Mati mo owo henye Yësu 'ba Nazereta ra, mo ayeto hë nï gbögbö, "Yësu Wisi 'ba Dawidi akɔnyi ma." 48 Vïdï kayo ne’e ënyïnnï mo aba na kamo, iyannï zi mo zi lima ti. Mora mo agbögbö hë nï gbɔ ndra rïyë, "Wisi 'ba Dawidi akɔnyi ma."

49 Here Yësu ɔrɔ, iya henye, "Ako’jo mo." Here zë ako’jonnï kora vo komoköndu ne gbɔ. Zë iyannï henye, "Ëdï rakyenyi aba, ënyï rïyë, mo ëdï yï ko’jo." 50 Mo umë bɔngɔ 'bënï 'de, öfu rïyë, ayi zi Yësu. 51 Yësu ako’jo hɔ mo, "A’di ra omba zi ma zi ko’dɔ zi yï?" Kora vo komoköndu ne, aya’ba da me’do henye, "Vo komoyandi, momba zi bi kongɔ löhu." 52 Yësu iya zi mo, "Ï’bë, kö’du koma 'bëyï akɔ’jɔ yï ku." Kandi mo ɔ’bɔ zi bi kongɔ, alö’bö gbɔ ga Yësu da gërï.